यहेज्केल 11

येरुसालेमोहों डोंड

1 ताहां आत्मा माहूं आखलीत कोइत यहोवाआ मंदिरोअ उगतामा बाअणाआ जागे जियाआ सोब उगतामाआ वोल पोताड़ी देदू; आन तिहीं आंय बाअपुरे पोसीही माटी देख्या. आंय तियांआं विसमेहें आज्जुरोअ पोर्‍यु याजन्याहा आन बनायाआ पोऱ्यु पोलत्याहा देख्या, जे माअहोंअ पुडारी ओता.

2 ताहां तिये माहूं कोयो, "ए मोनव्योअ पोर्‍या, जें माअहें या होयरोमेहें बाक्ती गोठी आन खाराब विसार कोअतेहे तें एं होय. 3 एं कोतेहे, ‘कोअ बांदीइलाआ वेल नाहांजी आयी. ओं होयर आंड्लो आन आमू तियामेएं माहां होय.’ 4 तियाहा कोत मोनव्योअ पोर्‍या, यांआं विरुद्दाम भविश्यवाणी कोअ, भविश्यवाणी!"

5 ताहां यहोवाआ आत्मा मापोअ उतर्‍यू आन माहूं कोयो, "एहें को, यहोवा एहें कोहे: ए इस्राएलोअ घराणा, तुमू एहेंज कोयोहो; जों किबी तुमाआ मोनोमेहें आवेहे, तों माहूं मुंदू होय. 6 तुमू ते या होयरोमेऱ्येए वारुज माअहें माईंत टाक्ये, आन तिहींइं सड़क तोड़ोवाअहीं पोई देदीही.

7 "तियाहा कोत प्रभु यहोवा एहें कोहे: जें माअहें तुमू यामेहें माईंत टाक्येहे, तियांआं तोड़ेज या होयरोअ रुप आंड्लामेर्‍योअ माहां होय; आन तुमुहूं तिहींमेहें रोत काडी देहीं. 8 तुमू तारवाइही बितेहे, आन आंय तुमापोअ तारवाआ सालाड़ीहीं, एहें कोत प्रभु यहोवा कोहे. 9 आंय तुमुहूं यामेहें रोत काडीत बिहीराआ आथोम होपी देहीं, आन तुमुहूं डोंड आपाड़ीहीं. 10 तुमू तारवाइ वाअहीं मोअहा, आन आंय तुमुहूं इस्राएलोअ हींवेपोअ डोंड आपीहीं, ताहां तुमू जाईंत लेहा के आंय यहोवा होंव. 11 ओं होयर तुमाआ कोअते आंड्लो ने बोणे, आन तुमू यामेर्‍योअ माहां ने रोहा; आंय तुमुहूं इस्राएलोअ हींवेपोअ डोंड आपीहीं. 12 ताहां तुमू जाईंत लेहा के आंय यहोवा होय; तुमू ते माआ नियमोपोअ नाहां साल्ये, आन माआ नियमोहों ने मान्ये; पोन तुमाआ आसेपासेए देसोअ रितीइ पुरमाणे साल्येहे."

13 आंय एहें कोइत भविश्यवाणी कोअतुतो के बनायाआ पोर्‍यु पोलत्यू मोइत गोयु. आंय उबडू पोड़ीत वोडा आवाजोम आअड़्यू, आन कोयो, "कि ओवे, प्रभु यहोवा! केहें तु इस्राएलोअ वासात रोल्याहां आरवीत टाकही के?"

गुलामीम गोल्या माअहुंहूं देवोअ आथवसन

14 ताहां यहोवाआ वसन माआ जागे पोत्यो, 15 "ए मोनव्योअ पोर्‍या, येरुसालेमोअ रोनारा ताआ जागेए पायहोहों आन इस्राएलोअ आखा घराणाहा बी कोयो के, ‘तुमू यहोवा रोत सेटे रोवा, ओ देस आमाआ आधिकारोम होपाअयुहू.’

16 "पोन तु तियांहां को, प्रभु यहोवा एहें कोहे: आंय तुमुहूं सेटे सेटेए माअहूंमेहें बोहाड़्ये आन देसो देसोमेहें वेरासेर कोइ देदे, तेबी जियां देसोमेहें तुमू आयेहे, तियांमेहें तुमाआ काजे आंय थोड़ाक दिही जाआं सोकू जागू कोत बोणीहीं.

17 "तियाहा कोत तियांहां को, प्रभु यहोवा एहें कोहे: आंय तुमुहूं राज्या राज्यामेहें माअहोंम रोत टोलु वालीहीं, आन जिया देसोमेहें तुमू वेरासेर ओत गोयेहे, तियामेहें रोत आंय तुमुहूं टोलु वालीहीं, आन तुमुहूं इस्राएलोअ जागू आपीहीं. 18 ते तिहीं पोतीत कोइत तिया देसोअ आखी सोगद्यी मुर्ती आन आखे खाराब कामे बी तियामेहें रोत सेटे कोए. 19 आंय तियांआं मोन एक कोइ देहीं, आन तियांआं आत्मा नोवू बोणाविहीं, आन तियांआं डिलोमेहें रोत डोणोअ मोन काडीत तियांहां आंय माहोंअ मोन आपीहीं. 20 ताहां तें माआ नियमोपोअ हादाफल साल्या कोए आन माआ नियमोहो माने; आन तें माआ माहें बोणे, आन आंय तियांआं देव ठरिहीं. 21 पोन जें माअहें तियांआं सोगद्यी मुर्ती आन खाराब कामोमेहें मोन लागाड़ीत सालतेहे, तियांहां आंय एहेलोहो कोअहीं के तियांआं कामोअ फल तियांआं मुन्कापोअ पोड़े, एहें कोत प्रभु यहोवा कोहे."

येरुसालेमोमेहें देवोअ महिमा निहीइलो

22 तिहींइं फासाड़ी करुबों तियांआं फाके उसे कोअये, ताहां तें साके बी तियांअरीज विसाइत गोये; आन इस्राएलोअ देवोअ महिमा तियांपोअ ओती. 23 ताहां यहोवाआ महिमा होयरोअ विसमेहें ओत कोइत तिया डोगोपोअ रुकात गोयी, जो उगतामाआ वोल ओतू. 24 फाशोअ तिया दर्शनोमेहें आत्मे माहूं आखलीत देवोअ आत्माआ सेक्तीवाअहीं खास्द्याआं देसोमेहें गुलामीम पोताड़ी देदो. जों दर्शन आंय पाल्योतो तों आरताइत गोयो. 25 ताहां जेती गोठी यहोवा देवे माहूं देखाड़्यीते, ते आखी आंय जें गुलामीम ओते तियांहां कोत देदी.