1 यहोवाआ वसन माआ जागे पोत्यो, 2 "ए मोनवीइ पोर्‍या, आखा साड़ोमेहें दाराक्शाआ वेलाआ खास गोठ की होय? दाराक्शाआ वेलामेहें की गुण होय, जो रानोमेऱ्याआ साड़ोमेहें उब्जेहे? 3 केहें एखू वस्तु बोणावीइलाअ काजे तियाआ लाकुड़ वापर कोए के? नेताहां टांगीइलाआ कोअते एखू खुटी बोणीत सेके के? 4 पाल, तो ते पेटाड़ीइलाआ वस्तु बोणावीत कोइत आगीमेहें टाकाअहे, तियाआ बेनु सेंडे आगीवाअहीं बोलीत जातेहे, आन विसमेऱ्युउ भाग आरवात जाहे. केहें तो काविहीं काम लागेहे के? 5 पाल, जेहेलाम तों बोण्योतो, ताहां बी किज कामोअ ने ओतो, जाहां तों आगीम पेटात आरवात गोयोहो, ताहां तों ओमे की कामोम आवीत सेकेहे?"

6 तियाहा कोत प्रभु यहोवा एहें कोहे, "जेहें कोइत रानोमेऱ्याआ साड़ोमेहें रोते आंय दाराक्शाआ वेलाहा आगीम पेटाड़ीलोअ वस्तु कोइ देहो, तेहेंज कोइत आंय येरुसालेमोवालाहां आरवी देहीं. 7 आंय तियांआं विरुद्दाम रोहीं, आन तें एकी आगीम रोत काडीत कोइत फाशेए बिहीरी आगीम पेटाइलोअ वस्तु बोणे; आन जाहां आंय तियांअहें रोत फिरीत वोलहीं, ताहां आंय यहोवा होय ओं तुमुहूं समजाय. 8 आंय तियांआं देस उजाड़ी देहीं; काहाके तियां माआ विश्वास तोड़्युहू. प्रभु यहोवाआ ओंज वसन होय."