1 आंय नजर उसे टाक्यी आन ओं पाल्यो, करुबोअ मुन्काआ उसे जुग होय, आन तिया जुगोमेहें राजगादीइ होस कि तेबी ओतो, जों निलमोंड्याआ होस समकीइतोतो.✝ 2 ताहां यहोवा तिया हुत्राव आंगड़े पोवित रोल्या माट्योहो कोयो, "करुबोअ निसे साकाआ विसमेहें जा, आन करुबोअ निसर्‍याआ ईंगाआ ताआ बेनु मुठी पोइत होयरोपोअ वेरी दे." तियाहा काजे तो माआ देखताइज तियांआं विसमेहें गोयु. 3 जेहेलाम तो माटी मायते गोयु, ताहां ते करुब मंदिरोअ हाजाड़्यीइ वोल उबा ओता; आन वाद्लो खोलीइ मायतेए वोल पोआइत ओतो. 4 ताहां यहोवा देवोअ महिमा करुबोपोअ रोत निहींत मंदिरोअ बाअणापोअ आवीत लागी; आन तों मंदिर यहोवा देवोअ महिमा वाअहीं पोआइत गोयो. 5 करुबोअ फाकड़ाआ आवाज खोलीइ बाअथे जाआं होंबलाअतुतो, तो आवाज आखाम रोत वोडा सेक्तिमान देवोअ जेहें ओतु.

6 जेहेलाम तिये हुत्राव आंगड़े पोवित रोल्या माट्योहो करुबोअ निसऱ्याआ साकाआ मायते रोत आग लेतावीइलोअ आदेश आप्युतो, ताहां तो तियांआं विसमेहें साकाआ जागे जात उबू रोयु. 7 ताहां करुबोअ विसमेहें रोत एका करुब आथ वादाड़ीत कोइत, तियी आगी मेहें रोत जे करुबोअ विसमेहें ओती, थोड़ीक विसीत कोइत हुत्राव आंगड़े पोवित रोल्या माटीइ मुठी मेहें आपी देदी; आन तो तियीही लेत कोइत बाअथे जातु रोयु.

8 करुबोअ फाकड़ाआ थुड़ी ते माअहूंउं आथ जेहे कि तेबी देखाअतोतो. 9 ताहां आंय पाल्यो, के करुबोअ जागे शार साके होय; मोन्ज्ये एक एक करुबोअ जागे एक साको होय, आन साकाआ रुप फिरोजा डोणोअ होस होय. 10 तियां शारु साकाआ रुप एक सारकू ओतू, ते एका साकाआ विसमेहें बिहीरो साको जेहें देखाअतेते. 11 तें सालीइली वेले शारु वोगेहे बिगर वोल्येज सालीत सेकतेते; आन सालीइली वेले ने वोलतेते, आन जेहें तियांआं मुन्को रोतोतो तेहेंज तें सालतेते आन सालतामेहें ने वोलतेते. 12 टुंग, आथ, फाके आन साके एहें कोइत जों तियांआं पुरो डिल ओतो, तों आखो डोआ वाअहीं पोआलो ओतो. 13 तियां साकाहा फिरनारे साके एहें कोत्लाहा आंय उनाअयू.

14 एकेकाआ शार सोबी ओती: पेहली सोब करुबोअ होस, दुसरी माहुंउं होस, तिसरी सिहांआ होस, आन शोवथी मोरागाआ होस ओती. 15 तें करुब पुंयपोअ रोत उठीत गोये. एं तें जनवारे होय, जें आंय कबार नोयीइ जागे देख्येते. 16 जाहां जाहां ते करुब सालताते ताहां ताहां तें साके तियांअरी आरीज सालतेते; आन जाहां जाहां करुब धरती पोअ रोत उडीइलोअ काजे तियांआं फाकड़े उसलीइतेते, ताहां ताहां तें साके तियांआं जागू ने सोड़तेते. 17 जाहां ते उबा रोताते ताहां तें साके बी उबे रोतेते; आन जाहां ते उसे उडताते ताहां तें बी उसे उडतेते; काहाके तियां जिवोअ आत्मा तियांम रोतुतो.

18 यहोवाआ महिमा मंदिरोअ बाअणापोअ रोत उडीत करुबोपोअ रुकात गोयू. 19 ताहां करुब तियांआं फाका वाअहीं उडीत कोइत माआ देखताइज धरतीपोअ रोत जाता रोया आन साके बी तियांअरीज जाते रोये, आन ते आखा यहोवाआ मंदिरोअ उगतामाआ बाअणाआ वोल उबा रोत गोया; आन इस्राएलोअ देवोअ महिमा तियापोअ रुकात गोयी. 20 ए तेज जिव ओता जियांहां कबार नोयीइ मेरे इस्राएल देवोअ गादीइ निसे देख्या, आन आंय जाईंत लेदो के ते बी करुब होय.

21 हर एक जिवोअ शार सोबी आन शार फाके आन फाकाआ थुड़ी माहुंउं आथ जेहें देखाअताते. 22 तियांआं मुखोअ रुप तोज होय जो आंय कबार नोयीइ मेरे देख्युतो. तियांआं सोब एतीज नाहां पोन आखो डिल तेहेलोज ओतो. तें तियांआं हुंबर होल्लेज सालतेते.