यहेज्केल 34

इस्राएलोअ सारवाली

1 यहोवा देवोअ वसन माआ जागे पोतो: 2 "मोनवीइ पोऱ्या, इस्राएलोअ विरुद्दाम भविश्यवाणी कोइत तियां सारवाल्योहों को, देव यहोवा एहें कोहे: जे सोताआ पेट पोअताहा तियां सारवाल्योअ केतीही विते! केहें सारवाली मेडा-बोकड़ाहां ने तारवुहूं जोवे? 3 तुमू सरबी खाताहा, तियांआं ऊनोअ आंगड़े पोवताहा, हाजाम हाजे मेडे देखीत तियांहां माइत खात लेताहा; पोन तुमू तियांहां नाहां सारता. 4 तुमू नोबलाहा ताकत ने आप्यी, मांदवाड़्याहां ने हुदाऱ्ये, तुमू दुखाअलाआं पाटा ने बांद्या, काडी देद्लाहां वापिस ने लेताया, टाकाअलाहां ने होद्ये, पोन उलटा तियांअरी जोराखा वाग्या. 5 ते सारवाली ने ओता तिहींवाअहीं मेडे वेरासेर ओत गोये; आन जोंगल्या जनवारों तियांहां खात लेदे.✝34:5 गणती 27:17; 1 राजां 22:17; मत्तय 9:36; मार्क 6:34 6 माआ मेडे आखा डोगोअ टेंबा-टेकड़ीपोअ भटकीइते फिऱ्ये, तें पुरी धरतीइ पेटोपोअ वेरासेर ओत गोये, पोन तियांहां होदनारु फुसनारु कोडू ने ओतू."

7 "तिहींवाअहीं ए सारवाल्यों, देव की कोहे तों उनाआ: 8 देव एहें कोहे, माआ जिवनोअ शप्पत, माआ मेडाहां रानठ्ये जनवारे माइत खात गोये. काहाके तियांआं सारवाली कायने ओतू; माआ सारवाली मेडाहां होदीत ने गोया, तियां सोताआ कालजी लेदी, पोन माआ मेडाआं कालजी ने लेदी. 9 तियाहा काजे ए सारवाल्यों, देवोअ गोठ उनाआ: 10 देव यहोवा एहें कोहे, आंय तुमाआं विरुद्दाम होय. आंय तियापोअ माआ मेडाआ इसाब मागीहीं; ओमे रोत तियांहां ने सारुहूं देंव; ताहां तियांआं पोटा पोइलोअज रोत जाय. आंय तियांआं जोड़बाम रोत माआ मेडे टाकाड़ीत लेहीं, तिहीं रोत तें तियांआं हावोज ने बोणे."

11 "माआ प्रभु यहोवा कोहे, आंय सोताहाज माआ मेडाआं कालजी लेहीं, आंयज तियांहां होदीहीं. 12 जेहें कोइत एक सारवाली टाकाअला मेडा-बोकड़ाहां वापिस होदीत टोलाम लेतावेहे, तेहेंज कोइत आंय माआ भटकीइल्या मेडा-बोकड़ाहां टोलू कोअहीं. तिया वाद्लाआन काला दिहोअ दिही तें जिहीं जिहीं वेरात गोयेय, तिहीं रोत आंय तियांहां वापिस लेत आविहीं. 13 आंय तियांहां बिहीरा बिहीरा देशोम रोत वापिस काडीत लेताविहीं, तियांआं वावड़्या देशोम लेताविहीं; आंय तियांहां इस्राएलोअ डोगोपोअ, खाडीइहीं आन वोहतीम सोरुहूं देहीं. 14 आंय तियांहां तिहीं हाजा हाजा साराम सारीहीं, आन इस्राएलोअ उसा-उसा डोगोपोअ तियांहां बाहरी सारु जोड़े. तिहीं तें निला निला साराम सोऱ्या कोए. 15 आंय सोताहा माआ मेडाआं सारवाली बोणिहीं, आंय तियांहां बाहरी जागे गोठाआ बोहाड़ीहीं. माआ प्रभु देव एहें कोहे."

16 "आंय टाकाअला मेडाहां होदीहीं, पुलवाअलाहां वापिस फेरवीत लेताविहीं, दुखाअलाहां पाटा बांदीहीं आन मांदवाड़्याहां हुदारीहीं. आंय तियां मात्ला जाडा सारवाल्योहों माइत टाकीहीं; आन माआ मेडाआं सारवाली न्यायोवाअहीं कोअहीं."

17 "माआ प्रभु यहोवा कोहे, माआ टोला, मेडाआं-मेडाम आन बोकड़ाआ-बोकड़ाम आंय बोराबर न्यायनिवाड़ू कोअहीं. 18 तुमू हाजु सारु सोरीत लेतेहे, पोन बाकी रोहे तो काहा खुंदरीत टाकतेहे, तुमू हाजो पाईं पीत लेतेहे, पोन रोल्यो पाईं काहा डोअवी देतेहे, केहें तुमुहूं ए मामुली गोठ लागेहे के? 19 माआ मेडे तुमू खुंदरीइल्यु सारु खातेहे आन तुमू डोअवीइल्यो पाईं पितेहे."

20 तिहींवाईं यहोवा देव तियांहां कोहे, "पाला, आंय लुलान मात्ला मेडामेहें बोराबर न्यायनिवाड़ू कोअहीं. 21 तुमू मांदवाड़्या मेडाहां ठेपलीइतेहे आन हिंगोवाअहीं सुंदतीज टोलाम रोत काडी देतेहे, ताहरेए तें आलाग आलाग ओत जातेहे. 22 पोन आंय माआ मेडाहां वासाड़ीहीं, तिहीं रोत आगाड़ी तियांहां किज ने खानो आवे. तिहींम रोत आंय हाजाआ आन बाक्ताआ विसमेहें न्याय कोअहीं. 23 आंय तियांहां सारे एहेलुहू सारवाली नेमी देहीं, तो माआ सेवक दाविद रोय, तोज तियांहां सारे आन तोज तियांआं सारवाली रोये. 24 आंय यहोवा, तियांआं देव ठरिहीं आन माआ सेवक दाविद तियांआं राजा बोणीत रोय, आंय यहोवा ओं कोयोहो. 25 आंय माआ मेडांअरी होकेए शप्पत खाहीं, आंय तियांआं विसमेहें रोत रानठ्या जनवारोहों ओड़ीत काडीहीं, ताहां माआ मेडे होकेहे रोय आन रानोम बी हाजी हुतेहे हुवीत रोय.

26 "आंय तियांहां आन आसेपासेए माआ टेकड़ीही आशिर्वाद आपीहीं, आन वोरहात बी बोराबर वेलेपोअ पाड़ीहीं; आन तिहीं आशिर्वादोअ वोरहात पोड़े. 27 साड़े फल आपे वोले, खेतोमेऱ्योअ ओन जाअखो पाको वोले, तें तियांआं देसोम होकेहे जिवे. जें माहें तियांहां वेठाड़तेते, तियांआं आथोम रोत माआ माहुंहूं आंय सुटका आपीहीं, ताहां तें जांइत लेय के आंय यहोवा देव होय. 28 तिहीं रोत बिहीरा देसोवाले तियांहां ने लुटे, रानठ्ये जनवारे तियांहां ने खाने आवे. तें बेफिकऱ्ये रोय, आन तियांहां कोडो ने बिवाड़े. 29 आंय तियांहां हाजो पाक आपनारु जागू आपीहीं, आन तें फुकल्ये ने मोए. आगाड़ी रोत बिहीरा देसोवाले तियांआं निंदा ने कोए. 30 ताहां तियांहां समजाय के आंय तियांआं देव होय आन तें माआ माहें होय, एहें कोत यहोवा देव कोहे."

31 "तुमू माआ मेडे, माआ साराम सोरनारु गोवारु होय, तुमू माआ माहें होय आन आंय तुमाआं देव होय, एहें माआ देव यहोवा कोहे!"