1 दाहवा वोरह्योअ दाहवा मोयनाआ बारावे दिहे यहोवा देवोअ ओं वसन माआ जागे पोतो: 2 "ए मोनवीइ पोर्‍या, मिसर देसोअ राजा फारोअहें ताआ सोब कोइत तियाआ आन पुरा मिसरोअ विरुद्दाम भविश्यवाणी कोअ; 3 तियाहा को, यहोवा देव एहें कोहे: ए मिसरोअ राजा फारो, आंय ताआ विरुद्दाम होय, ताआ नोयीम पोड़ीत रोनारा वोडा मोगरावा ताआ, तु कोहे, ‘माआ नोय माआ सोताआ होय, आन आंयुंज तियीही माआ काजे बोणावयीही.’ 4 आंय ताआ जोड़बाम आकड़ा टाकीहीं आन ताआ नोयीइ मासाहा ताआ खोरपण्यामेहें सिटकाड़ीहीं, आन ताहूं ताआ खोरपण्यामेहें सिटकीइल्ये नोयीमेएं मासेनहासे ताहूं बारथे ओसकीत काडीहीं. 5 ताहां आंय ताहूं ताआ नोयीइ आखे मासेनहासे उजाड़ीम काडी देहीं, आन तु रानोमेहें पोड़ीत रोही; कोडोज ताहूं ओर ने कोए. आंय ताहूं रांठ्या जनवारोअ आन जुगोमेऱ्याआ सिड़ाआ खाणो कोइ देदुहू. 6 ताहां मिसरवाला आखाहा मुंदू पोड़े के आंय यहोवा होय. तें ते इस्राएलोअ घराणाआ कोअते बुआंआं होस टेकू ठोऱ्येते.✝ 7 जेहेलाम तियां ताहूं आथोवाअहीं तोअयु ताहां तु खिजवाइत आन तियांआं खांदे मुड़ीत टाक्ये; आन तें तापोअ टेकू लेदू, ताहां तु मुड़ात गोयू, आन तुमे तियांआं कंबर डिली पाड़्यी. 8 तिहीं वाअहीं यहोवा देव एहें कोहे: पाल, आंय तापोअ तारवाआ सालाड़ीत कोइत, ताआ माअहें आन जनवारे, आक्खाहा आरवीहीं. 9 ताहां मिसर देस उजाड़ पोड़ीत जाय; ताहां तियांहां मुंदू जाय के आंय यहोवा होय."

"तुमे कोयोहो, ‘माआ नोय माआ सोताआज होय, आन आंयुंज तियीही बोणावयीही.’ 10 तियाहा काजे पाल, आंय ताआ आन ताआ नोयीइ विरुद्दाम होय; मिसर देसोहो मिग्दोलोअहीं रोत ते सवेनेएहीं जाआं एतोज नाहां पोन कूश देसोअ हाद्दीइ जागे जाआं होकालोज आन उजाड़ पाड़ी देहीं. 11 सालीही वोरह्ये जाआं तियाम माहुंउं नेताहां जनवारोअ डोंग ने पोड़े; आन तियामेहें कोडो वोहती बी ने कोए. 12 सालीही वोरह्ये जाआं आंय मिसर देसोहो उजड़ीइल्या देसोअ विसमेहें उजाड़ी देहीं; आन तियांआं होयरे उजड़ीइल्या होयरोअ होसे खेकरावी देहीं, आंय मिसरवालाहा राज्या राज्यामेहें आलाग आलाग कोइ देहीं, आन देसो देसोमेहें वेरासेर कोइ देहीं."

13 "यहोवा देव एहें कोहे: सालीही वोरह्ये वितीत जाय तिहींइं फासाड़ी, जियी जातीमेहें मिसरवाले वेरासेर ओत गोयेते, तिहींम रोत आंय तियांहां टोलू कोअहीं; 14 आंय मिसरवालाहा गुलामीम रोत सोड़वीत कोइत फाशुउ पत्रास देसोम पोताड़ीहीं, जिहींमेहें तें उब्ज्येते; आन तिहीं तियांआं हान्नो एवडोहो राज्य बोणीत जाय. 15 आन तों आखा राज्याम रोत हानो रोय; आन फाशोअ कोड्लाज राज्याअरी ने सुलाय; काहाके आंय मिसरवालाहा एहेलुहू कमी कोअहीं के तें फाशेए राज्या राज्यापोअ राज ने कोए. 16 तो ओमे रोत इस्राएलोअ घराणाआ आधार ने बोणे; काहाके जेहेलाम तें तियांअहें फाशेए पाले, ताहां तें तियांआं पापोहो ओर कोए. ताहां तियांहां मुंदू जाय के आंय यहोवा देव होय."

17 फाशोअ सात्ताविसवा वोरह्योअ पेलठा मोयनाआ पेलठे दिही यहोवा देवोअ ओं वसन माआ जागे पोतो: 18 "ए मोनवीइ पोर्‍या, बाबेलोअ नबुकदनेस्सर राजे सोरोहो केंडवारीलोअ काजे तियाआ सेनाहा जास्ती मेहेंनत कोआड़्यी; हारेक जोओंअ मुन्काआ टाली पोड़ीत गोयी, आन हारेक जोओंअ खांदोअ सांबड़े होरात गोये; तेबी तियाहा सोरोप रोते यी वोडी मेहेंनतीइ मोजरी वाजीहीं बी ने जोड़्यी आन तियाआ सेनाहा बी ने जोड़्यी. 19 तिहीं वाअहीं यहोवा देव एहें कोहे: पाल, बाबेलोअ नबुकदनेस्सर राजाहा आंय मिसर देस आपीहीं; आन तो तियाआ दुन्याहां लेत जाय, आन तियाआ मालधनोहों लुटीत कोइत ताबे कोइत लेय; आन एज तियाआ सेनाहां मोजरी जोड़े. 20 तियां माअहूं माआ काजे काम कोअयोतो, तिहीं वाअहीं आंय तियाआ मेहेंनतीइ बोदले मिसर देस आप्योहो. एहें कोइत यहोवा देव कोहे."

21 "तेदिहीं आंय इस्राएलोअ घराणाआ एक हिंग उगाड़ीहीं, आन तियांमेहें ताआ सोब उगाड़ीहीं. ताहां तियांआं मुंदू जाय के आंय यहोवा होय."