यहेज्केल 40

येरुसालेमोम यहेज्केलोअ पोतीइलोअ

1 आमाआ गुलामीमेऱ्याआ पोसीही वोरह्योम, मोन्ज्ये नोवा सालोअ सुरुवातीइ मोयनाआं दाहवा दिहोम येरुसालेम होयर बिहीराआ ताबाम ओतो, तेहलाम देवोअ सेक्ती मापोअ आयी आन तिये माहूं तिहीं पोताड़्यू. 2 दर्शनोम देव माहूं इस्राएल देशोम लेत गोयू. तिये माहूं जास्ती उसा डोगोपोअ मिक्यू. तिया डोगोपोअ होयरोअ होस देहामाआ वोल बांद्ल्यो कि तेबी देखाअयो. 3 जाहां तो माहूं तिहीं लेत गोयू, तिहीं माहूं एक माटी देखाअयू; तियाआ रुप तांबाआ होसऱ्युउ ओतू; तो आथोम हुत्लीइ दोअड़ी आन मापीइलोअ डेंगार तोइत तिहींइं तिया बाअणाअहीं उबू रोत रोयुतो.

4 तिये माट्ये माहूं कोयो, "मोनवीइ पोऱ्या, वारुहूं कान देत उनाआ आन आंय जों देखाड़ोहो तों वारुहूं पाल, काहाके यीज गोठीइ काजे ताहूं इंहीं पोताड़्युहू. इंहीं देखल्यो आखो ताहूं इस्राएल माअहुंहूं कोत आपीइलोअ होय."

उगतामू दरवाजू

5 ताहां मी एक मंदिर देख्यो, आन तियाआ शारी सोमकीर पितड़ो ओतो. तिये माट्ये तो मापीइलोअ डेंगार दोहो फुट लेत कोइत तिया पितड़ाहा माप्यो. ताहां तों पितड़ो सोव आथ पोलो आन सोव आथ उसो निहींयो.✝40:5 प्रगटी 21:15 6 ताहां तो उगतामा वोल्याआ बाअणाअहें आयू, आन तो तिहीं पायतरीपोअ सोड़्यू, आन बेनू ओटा माप्या ताहां एक डेंगार पोइत निहींया. 7 तिहीं जागल्याआं तिन खुली ओती. आखी खुलीइ माप आखी वोल दोहो फुट ओतो आन तियांआं विसमेऱ्योअ गालो पास आथोअ ओतो. आन मंदिरोअ सामनेए बाअणाअहींइं ओटू एक डेंगार पोइत निहींयू. 8 जाहां तिये मंदिरोअ सामनेए तो बाअणाआ ओटू माप्यू, ताहां तो एक डेंगार पोइत निहींयू. 9 तिये तिया बाअणाआ ओटू माप्यू, ताहां तो शार मिटर निहींयू; तियाआ खांब बेन आथ निहींया; ओ बाअणाआ ओटू मंदिरोअ सामने ओतू. 10 उगतामा वोल्याआ बाअणाआ यी वोग आन तिवोग तिन तिन सोवकी ओती; तियीं तिनू सोवकीइ माप एक सारकोज ओतो; आन बेनु वोल्याआ खांबा बी एकाज मापोअ ओता.

11 तिये तों बाअणो माप्यो, ताहां होल फुट पोलो आन बावीस फुट नांबो निहींयो. 12 तियीं सोवकीइ बेनू वोगेहे एकेक आथोअ जागू ओतू. ते सोवकी बेनू वोल विही विही इंसीइ ओत्यी. 13 तिये एकी सोवकीइ जागे रोत ते बिहीरी सोवकीइ जागे जाआं बाअणाहा तोइत माप्यो ताहां बेशाड़ीस फुट पोलो निहींयो. 14 तिये ओटाआ माप लेदो; ताहां तों विस आथ निहींयो; आन तिया ओटाअरीज खोली ओती. 15 जाअला वाटेएहें रोतीज कोओअ बाअणा आगाड़ी जाआं शोवतीस फुट निहींयो 16 तियां शारु खुणाआ आन दरवाजाआ मायतीइ वोग तियां खांबोअ डुसाला ओता; पितड़ाआ खिड़कीइरी बी डुसाला ओता; मायते शारु वोग खिड़कीज ओत्यी आन खांबोअरी खारक्याआ साड़े कोरवीत मिक्येते.

बारथेए खोली

17 तेहेलाम तो माहूं बाअथे खोलीम लेतायु ताहां तिहीं सोमकीर खुल्यी ओती तिहीं बाअथे ओटू बोणायुतो एहेलोहो देखाअयो; या ओटापोअ तिस खुल्यी ओती. 18 ओ ओटू मोन्ज्ये निसेए दरवाजाआ एतुहू नांबू ओतू.

19 ताहां तिये निसेए दरवाजाआ सामने रोत मायतेए जागू मोज्यू; तो जागू उगतामा आन पालामाआ वोल होव आथ निहींयू.

पालाम्यू दरवाजू

20 ताहां तिये बाअथेए खोलीम टेकतीज पालामा वोल्याआ बाअणाआ नांबोन पोलो मोजमाप कोअयो. 21 तिहीं एकी वोल तिन सोवकी आन बिहीरी वोल तिन सोवकी ओती; तियाआ खांबा आन महिरपी ए पेलठा दरवाजाआ मापोअ होसुज ओती; तों पोन्‍नास आथ नांबो आन पोसीही आथ हाकड़ो ओतो. 22 तियाआ खिड़की, महिरपी आन कोरविइल्ये खारक्याआ साड़े उगतामा वोल्या बाअणाआ मापोअ होस ओते; तिहींपोअ सालीत जाअलोअ हाँत पायतऱ्यी ओती आन तियांआं सामने महिरपी ओती. 23 मायतेए खोलीम मायते उगतामा दरवाजाआ होसे पालामाआ दरवाजाआ सामने एक दरवाजू ओतु; एका दरवाजाअहीं रोत ते बिहीरा दरवाजाअही जाआं तिये एक होव आथ माप्यो.

देहाम्यू दरवाजू

24 ताहां तो माहूं देहामाआ वोग लेत गोयू, तेहेलाम तिहीं देहामाअहें एक दरवाजू देखाअयू; तियाआ खांब आन ओटू तिये माप्यू, ताहां पेल्लुउ ओतू तेतुहूज निहींयू. 25 उसे कोत देखाड़्योहो तियी खिड़कीइ होसूज यी खिड़कीइ बी ओटू ओतू, आन पोन्नास आथ नांबी आन पोसीही आथ हाकड़ी ओती. 26 तियापोअ सोड़ीत जाअलो हांत पायतऱ्यी ओत्यी, आन तियांआं सामने ओटू ओतू, तियाआ खांबोपोअ आगाड़ी-फासाड़ी एकेक खारक्याआ साड़ कोरवीत बोणायोतो. 27 देहामाआ वोल्याआ मायवाली खोलीइ दरवाजू ओतू; देहामाअहें या दरवाजाअहीं रोत ते तिया दरवाजाअहीं जाआं एक होव आथ निहींयो.

मायतऱ्यीइ खोली: देहामू दरवाजू

28 तेहेलाम तिये माहूं देहामा वोल्यीइ खोलीम लेत जात देहामा वोल्युउ दरवाजू माप्यू, तो बी तेतुहूज निहींयू. 29 तेहेंज कोइत तिये तियाआ शारु सोवकी, खांब आन ओटू माप्यू, ते बी तेतोहोज माप निहींयो; तियाआ सोमकीर ओटू आन खिड़की ओती. तियांआं माप पोन्नास आथ नांबो आन पोसीही आथ हाकड़ो निहींयो. 30 तियाआ सोमकीर ओटा ओता; ते पोसीही आथ नांबा आन पास आथ हाकड़ा ओता. 31 याआ खांबोअ ओटू बारथीइ वोल ओतू. या खांबोपोअ बी खारक्याआ साड़ोअ सित्रे कोरवीत मिक्येते; तिहींपोअ सोड़ीत जाअलोअ हाँत पायतऱ्यी ओत्यी.

मायतेए खोली: उगताम्यू दरवाजू

32 तिहीं रोत तो माहूं उगतामाआ वोल्यीइ मायतऱ्यीइ खोलीमेहे लेत गोयू, तियाआ वोल्याआ दरवाजाआ बी तेतोहोज माप निहींयो. 33 उगतामा वोल्यीइ खोली, दरवाजाआ खुली आखाआ माप एक सारकोज ओतो. 34 याआ खोली बी बारथेए वोल ओती. तियाआ बेनू खांबापोअ खारक्याआ साड़े कोरवीत बोणायेते. तिहीं सोढ़ीइलोअ काजे हाँत निहीणे ओते.

मायतेए खोली: पालाम्यू दरवाजू

35 तिहीं रोत तों माहूं पालामा वोल्याआ दरवाजाआ वोल लेत आयो. तिहींइं जागू बी माप्यू ताहां तियाआ बी माप बिहीरा दरवाजाअहीं ओतो तेतोहोज निहींयो. 36 तियाआ खोली आन खांबाआ माप बिहीरी खोली आन खांबाआ एतोहोज ओतो. तियाआ लांबी आन पोलो पोसीही आथ ओती. 37 तियाआ खांबा खोलीइ बारथेए वोल ओता, दरवाजाआ बेनु वोल खारक्याआ साड़े कोरवीत बोणायेते. तिहीं सोड़ीइलोअ काजे हांत निहीणे ओते.

पालामाआ वोल्यीइ आवाली

38 तिहीं रोत बाअणाआ आहने दरवाजाअहीं पेटाड़ीइलोअ गाराहाआ जागे खुली ओती. 39 पेटाड़ीइलोअ, पापोअ आन दोशोअ गाराहाआ काजे मेडो-बोकड़ो 40 आन बाअथे खोली एहें पालामाआ वोग दरवाजाअहें सोढ़ीत जाअलोअ बेन रांग ओती; तेहेलीज बिहीरी वोग खोलीम ओटापोओज बेन रांग ओती. 41 बाअणा बाअथे खोलीम बेनु वोगेहे शार-शार रांग ओती; एहेलिही; गाराहा आपिइलोअ जागे बी आंठ रांग ओती. 42 आगीइ गाराहा कोइलोअ काजे वाडीइलाअ डोणोअ शार रांग ओती; ते डेड़ आथ नांबी आन डेड़ आथ टोकी आन एक आथ उसी ओती; जिया आथार्‍यो वाअहीं आगीइ गाराहा आन एहेलेहे गाराहा आपिइलोअ काजे वाडतेते, आन तें तियापोअ मिकतेते. 43 शार आंगीइ एताहा नांबा आकड़ा मंदिरोमेहें ओता, आगीइ गाराहा आपल्यो माहां तिया मिकतेते.

44 मायते बाअणाआ बाअथे पोरापोर बेन खुल्यी ओत्यी, एक पालामाआ वोल देहोअ विरुद्दाम ओती आन बिहीरी देहामाआ वोल पालामाआ विरुद्दाम ओती. 45 तिये माहूं कोयो, ए देहामाआ विरुद्दामेऱ्यीइ खुली मंदिरो राखवाली कोअनारा पुंजाराआ काजे होय. 46 आन पालामाआ विरुद्दाम होय ते खुली देवान्याआ राखवाली कोअनारा पुंजाराआ काजे होय, ते सादोक पारवाड़ होय, ते लेवी पारवाड़ी ओते तेबी देवे जागे सेवा कोइलो काजे जातेते.

मायतीइ वोगऱ्यीइ खुली आन मंदिरोअ आवाली

47 तिये बाअथे खोली माप्यी ताहां एक होव आथ नांबी आन एक होव आथ हाकड़ी एहें कोत सोवकड़ीम ओवी; आन मंदिरोअ सामने देवान्यो ओतो. 48 ताहरुउ तो माहूं मंदीरोअ मायते लेत गोयू आन मायतेए ओटाआ आखा भाग माप्या, ताहां एकी वोग पास आथ आन बिहीरी वोग पास आथ निहींयू, तिया बाअणा बेनू खुणा तिन-तिन आथ निहींया. 49 ओटापोअ सोढ़ीत जाअलोअ काजे पायतऱ्यी ओत्यी, तियी वोग रोत विही आथ आन बिहीरी वोग रोत इग्यार आथ पोआयी. ते खांब बेनु वोग एकेक आथ एहेलाहा हाना खांब ओता.