1 यहोवाआ वसन माआ जागे पोतो. 2 "ए मोनव्योअ पोर्‍या, इस्राएलोअ जे भविश्यवक्ता सोताआज मोनोवाअहीं भविश्यवाणी कोअताहा, तियांआं विरुद्दाम भविश्यवाणी कोइत तु को, यहोवा देवोअ वसन उनाआ!"

3 प्रभु यहोवा ओं कोहे: "यां फोगा भविश्यवक्ताआ कि ओवे, जे तियांआंज मोनोअ परमाणे सालताहा, आंय यांहां माआ कोड्लोज दर्शन नाहां आप्यो. 4 ओ इस्राएल देस! ताआ ए भविश्यवक्ता हुंद्ला रानोम रोनारा कोल्याआं होस होय 5 तुमू इस्राएलोअ घराणाआ कोअते पितड़ो नाहां हुदाऱ्यो, जियावाअहीं ते यहोवाआ दिही लड़ायीमेहें मजबुत रोत सेके. 6 यहोवा देवे तियांहां नाहां मोकल्या, तेबी ओ देवोअ आवाज आन वसन एहें कोत कोनारा ठोगोअ होप्ने आन खोटो भविश्य पालनारा ओत जाय कोत आहरु मिकताहा. 7 ने ओवनारो दर्शन तुमू पाल्यो, ठोगोअ भविश्य कोयो आन जों आंय नाहां कोयो तियाहा बी यहोवा देवोअ वसन होय कोत कोयो के नाहां?"

8 तियाहा कोत यहोवा देव एहें कोहे: "तुमू ठोगोअ गोठी कोयी आन ठोग दर्शने पाल्ये, तियाहा काजे आंय तुमाआ विरुद्दाम होय, यहोवा देवोअ ओज आवाज होय. 9 खाराब दर्शने पालनारा आन ठोगोअ भविश्य कोतापनारा पोअ माआ आथ सालाड़ीहीं; ए ठोग भविश्यवक्ता माआ माअहूंम ने पेलाय, आन ने इस्राएल घराणाम तियांआं नावे लेखाय; आन इस्राएल देसोम गुडू बी मिकीत ने सेकाय; ताहां तुमुहूं मुंदू जाय के आंयज यहोवा होंव.

10 "काहाके भविश्यवक्तां माआ माअहुंहूं भटकाड़्येहे. ते कोताहा के, ‘होक होय,’ आन पाले गोल्ये, किज होक कायनाहां. माअहें पितड़ो बांदतेहे, ताहां तुमू तियापोअ कासो सुनो हारनाराआ होस कोअताहा. 11 तियां कासो सुनो निपनाराहा को, के पितड़ो उठलीत पोड़े; काहाके वेगुज वोडू वोरहात पोड़े, वोडे वोडे गारे पोड़े आन जुदू वादुउ साले. 12 जाहां पितड़ो ओदरीत जाय ताहां माअहें तुमुहूं एहें कोत ने फुसे के, ‘तुमू पितड़ापोअ कासो सुनो हाऱ्योतो तों का गोयो?’"

13 तियाहा काजे प्रभु यहोवा एहें कोहे: "आंय खोते वाअहीं जुदू वादुउ सालाड़ीहीं; आन माआज खोते वाअहीं वोडू वोरहात पोड़े, आन माआ खोते वाअहीं वोडे वोडे गारे पाड़ीहीं, आन तियाहा आरवी देहीं. 14 एहें कोइत जिया पितड़ापोअ तुमू कासो सुनो हाऱ्योहो, आंय तियाहा ओदारी देहीं, एतोज नाहां पोन तियाहा एकसोट्योज आरवी देहीं, आन आंय तियाआ पायू बी उफड़ीत टाकीहीं; जेहेलाम तो ओदरे ताहां तुमू बी तियाम दाबाइत मोइत जाहा; ताहां तुमुहूं मुंदू पोड़ीत जाय के आंय यहोवा होय.

15 "एहें कोइत आंय पितड़ो आन तियापोअ कासो सुनो हारनारो यां बेनुपोअ पुरी खोत मुड़ीहीं; ताहां आंय फुसीहीं, का गोयो ताआ पितड़ो, आन का गोया ताआ कासो सुनो हारनारा? 16 इस्राएलोअ ते भविश्यवक्ता जे येरुसालेमोअ बाप्तिम भविश्यवाणी कोअताते आन तियांआं शांतीइ दर्शन कोत आपताते, पोन यहोवा देव एहें कोहे के शांती होयज नाहां."

17 "फाशोअ ओ मोनवीइ पोऱ्या, तू ताआ माअहुंउं बोईंइ सामने उबु रोत, जो सोताआज मोनोवाअहीं भविश्यवाणी कोअहे; तियांआं विरुद्दाम भविश्यवाणी कोइत को, 18 प्रभु यहोवा देव एहें कोहे: जे बोईं आथेज दोरा बांदीत माअहुंहूं ठोगीइलोअ काजे आन सोताआ मुन्को टापीइलोअ काजे साअको फांगत्यीही; पोन तुमू माअहोंअ जिव जालेम टाकीत सोताआ जिव वासाड़ीत सेकहा के? 19 तुमू ते मुठीन मुठी पोइत टोहाल गोंवें आन रोटाआ तुकड़ाआ बोदले माहूं माआ माअहुंउं नजरेम सोकू ने ठरव्यु, आन माआ माअहें तुमाप रोत उनाअतेहे, जे आरवाइलाअ लायक ने ओते, तुमाआ तियीं लबाड़ गोठीवाअहीं माइत टाक्ये; आन जे वासाइलाअ लायक ने ओते तियांआं जिवोहो वासाड़ीत मिक्या."

20 तियाहा कोत यहोवा देव कोहे, "पाला, आंय जिया आत्माआ तुमू हावजोअ होसे पारध कोअताहा, तियाहा आंय सोड़ावीहीं, वाड़ बांदीत कोइत तुमू पारध कोअताहा तियांहां आंय वाट लागाड़ीहीं. 21 ओं साअको बी फाड़ीत टाकीहीं आन तुमाआ आथोमेर्‍येए माआ माअहें आंय सोड़वीहीं, तुमुहूं ने खाअहूं देवें ताहां समजाय के आंय यहोवा देव होय.

22 "काहाके जिया धर्मीहीं आंय नाराज नाहां कोअयो तेबी तुमू तियाआ मोनोहो ठोगीत नाराज कोअताहा, आन पापी माहुंउं तियाआ खाराब वाटेम रोत ने वोलुहूं जोवे काजे आन तियाआ जिव ने वासाअहूं जोवे कोत तुमू तियाहा हिम्मत आपताहा; 23 तियाहा कोत तुमाआ खोटे होप्ने पालीइलोअ, आन ठोगोअ भविश्य कोअलाआ बोंद ओवे; माआ माअहें तुमाआ आथोम रोत सोड़वीहीं ताहां तुमुहूं समजाय के, आंय यहोवा देव होय."