1 यहोवाआ ओं वसन माआ जागे पोतो: 2 "ए मोनवीइ पोर्‍या, तिया खुनी होयरोअ न्यायनिवाड़ू तु कोअहीं ना? तेहेलाम तियाहा आक्खे घाण कामे देखाड़. 3 आन को, यहोवा देव कोहे, ए होयर, ताआ वेल आवीत लागुहूं जोवे कोत तु ताआ विसमेहें खुने कोअहे, आन सोताहा बिगाड़ीलोअ कोअते मुर्ती बोणावहे. 4 जो खुन तुमे कोअयोहो, तियावाअहीं तु दोशी ठऱ्योहो, आन जे मुर्ती तुमे बोणावयीही, तियीं वाअहीं तु एठो ओत गोयोहो; तुमे ताआ आखरीइ दिहोहो आहने कोइत लेदा, आन ताआ वोरह्ये पोआयेहे. तिहीं वाअहीं आंय ताहूं राज्य राज्याआ माअहुंउं निंदाआ लायक, आन आखा देसोअ हारापोअ लायक कोइ देदोहो. 5 ए बदनाम, ए विण शांती वाअहीं पोआला होयर, जे आहने आन सेटे होय, ते आक्खे ताआ मोज्या लेय. 6 पाल, इस्राएलोअ पुडारी माअहें जिवज्योअ ताकतेए परमाणे तामेहें खुन कोअनारे होय. 7 तामेहें आयहीन आब्हाहा ‍ माअहें एठे मानतेहे; ताआ विसमेहें पारका माहुंहूं तारास देताहा आन ताआ जागेए विखावाला आन रोंडोअ बोईंइं फायदू लेतेहे.✝ 8 तुमे माआ सोकी वस्तुहू एठी मान्यी, आन माआ आरामोअ दिहोहो एठा कोअयाहा. 9 तामेहें लुसड़्ये माअहें खुन कोइलाअ काजे तियार ओवे, आन ताआ माअहुंउं डोगोपोअ रोटू खादू; ताआ विसमेहें महापाप कोअयुहू. 10 तामेहें आब्हाआ बोईंइरी हुवताहा आन मुन्सोलावाली बोईंइरी बी हुवताहा. 11 कोडे तेबी तामेहें जागेवालाआ बोईंइरी सोगदायीइ काम कोअयोहो; आन कोडे तेबी तियाआ वोवड़ीह्हीही बिगाड़ीत कोइत महापाप कोअयुहू; आन कोडे तेबी तियाआ बोअह्हींइरी मोन्ज्ये तियाआ आब्हाआ पोऱ्यीही बिगाड़्यीही.✝ 12 तामेहें खुन कोइलोअ काजे तें लास लेतेहे; तु वियाद लेहे आन जागेवालाहा तारास देय देय अन्याय वाअहीं फायदू लेदू; आन माहूं तुमे पुलवी देदू, एहें कोइत प्रभु यहोवा कोहे."

13 "तियाहा काजे पाल, जो फायदू तुमे अन्यायो वाअहीं लेदू आन ताआ विसमेहें खुने कोअयेहे, तिहींवाअहीं आंय बेनू आथो वाअहीं लागावीहीं. 14 जियां दिहोम आंय ताआ न्याय कोअहीं केहें तियां दिहोम ताआ मोन मजबुत आन ताआ आथ टिकीत रोय के? मी यहोवा ओं जो कोयोहो, तों आंय कोअहींज. 15 आंय ताआ माअहुंहूं राज्या राज्यामेहें वेरासेर कोअहीं, आन देसो देसोमेहें आरजा बुरजी कोइ देहीं, आन ताआ एठायीही तामेहें रोत आरवी देहीं. 16 तु राज्या राज्यामेहें माअहोंअ देखताइज सोताआ नजरेम एठो ठरीही; ताहां ताहूं मुंदू जाय के आंय यहोवा होय."

17 फाशोअ यहोवाआ ओं वसन माआ जागे पोतो: 18 "ए मोनवीइ पोर्‍या, इस्राएलोअ घराणो माआ नजरेम निस्तो गारो जेहें ओत गोयेहे; तें आक्खे बाठीमेएं इस्तल, आन लोड़ो सिक्याआ होस बोणीत गोयेहे; ते सांदीइ मोलोअ होस ओत गोयेहे. 19 तियाहा कोत प्रभु यहोवा तियांहां एहें कोहे: तुमू आखे किटात गोयेहे, तियाहा काजे पाला, आंय तुमुहूं येरुसालेमोम एकठे कोअहीं. 20 जेहेलेहे माअहें सांदी, इस्तल, लोड़ो, आन सिक्ये याआ काजे बाठीइ मायते आगी वाअहीं ओगलावे तेहें काजे हेंगालीत मिकतेहे, तेहेंज कोइत आंय तुमुहूं माआ खोत आन खिजेवाअहीं टोलू वालीत तिहींज मिकीत ओगलावी देहीं. 21 आंय तुमुहूं तिहीं हाटवीत कोइत माआ खोतेए आगी वाअहीं फुकीहीं, आन तुमू तियाआ विसमेहें ओगलीत जाहा. 22 जेहेलीही सांदी बाठीइ विसमेहें ओगलावतेहे, तेहेंज कोइत तुमू तियीइ विसमेहें ओगलावाअहा; ताहां तुमुहूं मुंदू जाय के जिये आपापोअ खोत पोड़कावयीही, तो यहोवा होय."

23 फाशोअ यहोवाआ ओं वसन माआ जागे पोतो: 24 "ए मोनवीइ पोर्‍या, तिया देसोहो को, तु एहेलोहो देस होय जो सोको नाहां ओवो, आन खोतेए दिहोम तापोअ वोरहात ने पोड़्यू. 25 ताआ भविश्यवक्ताहां तामेहें लोबाड़ीइ गोठी कोअयीही, तियां घांगरीइनारा सिहांआं होस हावोज तोअयो आन जनवारोहो खात टाक्येहे; ते मिकल्या मोगला मालधनोहों बुउसीत लेतेहे, आन तामेहें जाअखीलीही बोईंहीं रोंडोअ कोइ देदीही. 26 तियाआ पुंजारहां माआ कायदाआ अर्थ खेसीत ताइंत लागाड़्योहो, आन माआ सोकी वस्तुहू एठी कोअयीही; तियां सोका एठाआ किज फरक नाहां मिक्यी, आन नाहां बिहीराहा सोका-एठाआ बाप्तिम सिकाड़्यो, आन ते माआ आरामोअ दिहोअ बाप्तिम बेफिकऱ्ये रोतेहे, जियावाअहीं आंय तियांआं विसमेहें एठु ठरोहो.✝ 27 तियाआ आधिकारी कोल्वाआ होस हावोज तोअताहा, आन अन्यायो वाअहीं फायदू लेअलाआ काजे खुन कोअताहा आन जीव लेएलाआ काजे तियारीम रोताहा. 28 तियाआ भविश्यवक्ता तियांआं काजे कासो सुनो वापरीइताहा, ते खोटे दर्शन पालताहा; आन यहोवा ने कोत्लू तेबी ते प्रभु यहोवा एहें कोहे कोत खोटी भविश्यवाणी कोताहा. 29 देसोमेएं सादे माअहें बी तारास देतेहे आन पारको धन बुउसीत लेतेहे, तें गोरगरीबोहों दोमतेहे आन न्यायोअ फिकर सोड़ीत पारकाहां तारास देतेहे. 30 आंय तियांमेहें एहेलोहो माहुंउं होदीइलोअ कोअयो जों वाड़ हुदारे आन देसोअ वोतीइ गेटोपोअ माआ सामने एहेलोहो उबो रोय के माहूं तियाहा आरवुहूं ने पोड़े, पोन एहेलोहो माहूं कोडोज ने जोड़्यो. 31 तिहींइं काजे आंय तियांपोअ माहूं जास्ती खोत लागी आन माआ खोतेए आगीवाअहीं तियांहां आरवी देदेहे; आंय तियांआं हुशारी तियांआंज बोसी आलवी देदीही, एहें कोइत यहोवा देव कोहे."