यहेज्केल 14

मुर्तीपुजा कोअनाराहां देवोअ सेतावणी

1 ताहराआ इस्राएलोअ थोड़ाक डायहां माआ जागे आवीत कोइत माआ सामने बोहीत गोया. 2 ताहां यहोवा देवोअ वसन माआ जागे पोत्यो, 3 "ए मोनव्योअ पोऱ्या, यां माअहूं जिवज्योअ देवताआ मुर्ती तियांआं मोनोमेहें थोपाड़ीत मिक्यीही; आन तियांआं गुनावालू ठोकाइलोअ वस्तू तियांआं सामने मिक्युहू; ताहरेए तें माअहें माहूं काविंहीं फुसीत सेकतेहे के?

4 "तियाहा काजे तु तियांहां को, यहोवा एहें कोहे: इस्राएली घराणामेऱ्योअ जो कोडो तियाआ देवताआ मुर्ती तियाआ मोनोम थोपाड़े, आन एहेलिही धर्मीइ वाटे सालीइलोअ पेल तियाआ सामने पापोअ ओड़सन टाके, आन माआ इश्शा जाइंलोअ काजे भविश्यवक्ताआ जागे आवे, ताहां आंय तियाआ जाअखीलीही मुर्तीइ वाखरी तियांहां माआ गोमतोज उत्तर आपीहीं. 5 आंय इस्राएली घराणाआ मोन वापिस ताबाम कोइलोअ काजे एहलोहो कोअहीं; काहाके तें तियांआं मुर्तीइ वाखरी माहूं सोड़ी देत सेटे ओत गोयेहे.

6 "तियाहा काजे, तु इस्राएली घराणाहा एहें को: प्रभु यहोवा ओं कोहे, फासताआ आन तुमाआ मुर्तीइ वोल रोत सोब मुउड़ा; आन तुमाआ आखा सोगद्या कामोअहें रोत वोला.

7 "काहाके इस्राएलोअ घराणामेऱ्योअ आन तियाआ विसमेहें रोनारा पारका माअहूं मेऱ्योअ बी काहा नाहां रोतो, जों माआ फाटी आवीइलोअ सोड़ी देत तियांआं मुर्तीही तियाआ मोनोमेहें थापन कोए, आन तियाआ पापोवालू ठोकाइलोअ वस्तु तियाआ सामने मिके, आन तियाआ एखू गोठ फुसीइलाअ काजे भविश्यवक्ताआ जागे आवे, ताहां तियाहा आंय यहोवा सोताहा उत्तर आपीहीं. 8 तियाआ वोल रोत माआ सोब मुउड़ीत लेहीं; आन आंय तियाहा निशाणी ओवे एहलोहो कोई देहीं, आंय तियाहा माआ माअहूंम रोत काडी देहीं. ताहां तुमुहूं समजाय के आंय यहोवा देव होय.

9 "जर एखु भविश्यवक्ता ठोगात कोइत संदेश आपतू ओय, ताहां समजीत जाअहूं जोवे के, आंयुज तियाहा तेहेलाहा कोअयोहो, माआ आथ तियापोअ उमाअहीं, आन माआ माअहें इस्राएल यांम रोत आंय तियांहां माईं देहीं. 10 सावाल फुसनाराआ सुक होय, तेहलीज भविश्यवक्ताआ बी सुक होय; ते बेनू तियांआं सुकीइ फोल भोगे. 11 ताहां इस्राएलवाले मारोत सेटे ने जाय, आन तियांआं पोपोअ वाखरी सोताहा ने विट्ले पोन तें माआं माअहें बोणे आन आंय तियांआं देव ओवीहीं. एहें कोत यहोवा देव कोहे."

नोहू, दानियेल आन इयोब

12 ताहां यहोवा देवोअ वसन माआ जागे पोतो. 13 "मोनवीइ पोऱ्या, एखू देस ठोगीत कोइत माआ विरुद्दाम पाप कोए, ताहां आंय तियांपोअ माआ आथ सालाड़ीहीं, तियांआं खाअलाअ आदार काडीत देसोमेहें काल पाड़ीहीं, आन तिहींम रोत आंय जनवारेन माअहें माइत टाकीहीं. 14 तेहलाम तियामेहें नोहूं, दानियेल, इयोब, ए तिनुज रोया तेबी बास; ते तियांआं सतीपणो वाअहीं सोताआ जिव वासाड़े एहें कोत यहोवा देव कोहे."

15 "आंय या देसोम जोराखे जनवारे मोकलीत कोइत आखो दानाफान कोई देदे, आन तें जनवारे कोत कोडो आव-जाव ने कोअतोतो, एतुहू तियाहा उजाड़ पाड़ी देदू. 16 ताहां यहोवा देव कोहे, माआ जिवनोअ शप्पत, तियामेहें ते तिनू रोय तेबी, तियांहां सोताआ पोर्‍याहा, नेत पोर्‍यीही वासाड़ता ने आवे, ते सोताहा ताहराआ वासात जाय; पोन देस उजाड़ पोड़ीत जाय.

17 "आंय तारवाआ उमाइत कोइत कोंव, ए तारवाआ तु या देसो पोअ फिरीत वोल; ताहां तिया देसोअ माअहेंन जनवारे माइत टाक्ये; 18 ताहां यहोवा देव कोहे, माआ जिवनोअ शप्पत, तिहींम ते तिनू ओय तेबी सोताआ पोर्‍यान पोर्‍यीही वासाड़ता ने आवे, पोन ते एताज वासाय.

19 "आंय तिया देसोपोअ मोराय मोकल्यी आन तिहीं वाअहीं जनवारेन माअहें आरवीइलोअ काजे रक्ताआ होस आंय खोत कोअयी; 20 ताहां यहोवा देव कोहे, माआ जिवनोअ शप्पत, नोहू, दानियेल आन इयोब, तिहींम ओय, तेबी तियांहां सोताआ पोर्‍यान पोर्‍यीही वासाड़ता ने आवे; तियांआं सतीपणो वाअहीं सोताआ जिव एतुज वासाड़ीत सेकताहा."

21 "ताहां आंय तारवाआ, काल, जोराखे जनवारे आन मोराय एं शारु जातीइ कड़क शिक्शा येरुसालेमो मेर्‍याआ माअहूं आन जनवारोपोअ माइलोअ काजे मोकलो, ताहां तियाहा टिकाव कि कोइत लागे, एहें कोत यहोवा देव कोहे. 22 तेबी पाला, तिहींमेहें बाकी रोय, तियां पोऱ्यान पोऱ्यीही बारथे काडीत लेत आवे; तुमू तियांआं वाट आन तियांआं कामे पालहा; ताहां आंय येरुसालेमोपोअ मोकलीइल्यी आफत आन घटना पालीत तुमुहूं होक आवे. 23 तुमू तियांआं सोभाव आन तियांआं कामे पालहा, ताहां तुमुहूं होक आवे. आन आंय जों किबी तिहीं कोअयोहो तों आखो उदड़ीज नाहां कोअयो ओं तुमुहूं समजाय, एहें कोत यहोवा देव कोहे."