1 तिये माहूं कोयो, "ए मोनव्योअ पोर्‍या, ताआ गुडापोअ उठीत उबू रो! आंय ताअरी गोठी कोअनारु होय." 2 तिये एहें कोयो तेताजमेहें देवोअ आत्मा मामेहें फोहीत माआ गुडापोअ माहूं उबू कोअयू, आन जो माअरी गोगतुतो, तियाआ गोठी आंय उनाअयू. 3 तिये माहूं कोयो, "ए मोनव्योअ पोर्‍या, आंय ताहूं माअरी सुलाअनारा देसोअ जागे मोकलोहो; तियांआं डाये आज जाआं माआ विरुद्दाम सालतेहे. 4 जियांआं जागे आंय ताहूं मोकलोहो तियी पिड़ीइ माअहें विणलाज्ये आन पिटारे होय; एहें कोत प्रभु यहोवा कोहे. 5 आन तू तियांहां कोजी, ‘यहोवा एहें कोहे;’ एहें कोही ताहां तें सुलाअनारे इस्राएलवाले उनाय नेत नेबी उनाय, पोन एतो तेंव जाइंत लेय के आमाआ विसमेहें एक भविश्यवक्ता होय. 6 ए मोनवीइ पोर्‍या, तु तियांहां मा बिही; ताहूं काटाम, वोणसाम आन खोंवसाम बी रोअहूं पोड़े आन तें भान्गड़्ये माअहें होय, तेबी तियांआं शब्दा वाअहीं मा बिही. तु तियांआं मुख पालीत मा काबराअही. 7 तें उनाय नेत नेबी उनाय, तेबी तू जों आंय कोहो, तों तियांहां कोजी, तें तोम जास् भान्गड़्ये माअहें होय. 8 पोन, ए मोनवीइ पोर्‍या, आंय जों कोहो, तों तू उनात ले, आन तियां भान्गड़्या माहुंउं होस तु मा कोअही; जों आंय ताहूं आपोहो तों तु खात ले." 9 तेहेलाम आंय माआ वोल एक आथ आवत्लू देख्यू; तिया आथोम एक लेखल्यो पुस्तक ओतो. 10 तों तिये माआ सामने उगाड़्यो, तों बेनु वोल लेखल्यो ओतो; तें शब्दे विखाआ गिते, विखाआ काईं आन दुखोअ वसने ओते.