2 Ukaya kwa Tati wa nenga kuwela na fyumba fitangala. Handa ingawelili ng’ogha nagha, ningaliwalongela kala, hinaa ninguyenda kuwayandalila mahala. 3 Na paniteyenda na kuyandala mahala kwaikiva gha mwenga, nitehuya na kuwatola, ili na mwenga muwesi kuwela pala niwela nenga.

9 Paayomola kulonga ghala, wogha wakiva wangulola, akatolwa kuyenda kundumba, lihindu likamhigha wakotoho kumlola kangi.

10 Pawawelili wangukwenjula mihu kulola kunani, mweni akiyenda zyaki, bwitu wandu waivili wawelili wavala nguu mbulete pee wakagholoka pabehi na weni, 11 wakalonga, "Mwenga wandu wa Galilaya. Kwa kyani mngugholoka baha mkilola kunani? Yesu hayu avile atolilwi kuhuma kwa mwenga kuyenda kundumba atehika kangi handa nagha mumlola akiyenda kundumba."

20 Hayu mweni kulongela mighalu hai angulonga, "Hina ninguhika njenji."

Na iweli nagha uhiki Bambu Yesu.

12 Yesu angulonga, "Uyughanili ninguhika njenji pamonga na hupo nitempegha kila mmonga kukovekelana na matendu ghaki."

36 "Ila kumanya lichuwa au lipindi hali, kwahela mundu mweni kuwesa kumanya litehika ligha, wala watumikila wa kundumba wa Sapanga wala Mwana, ila Tati weka ghaki ndiwa mweni kumanya lichuwa hali." 37 Kwaikiva handa iwelili lipindi lya Nuhu, ndiwa itewela kuhika kwa mweni Mwana wa Mundu. 38 Kwaikiva lipindi lila yambila gha kufula kwa masi, wandu wawelili wakilyegha na kunywegha, wakiposa na kuposwa mbaka lichuwa lila Nuhu paayingilili kulisafina. 39 Wamanyili ng’ogha chochosi mbaka pala kufula kwa masi papakungula vyogha. Havi ndiwa itewela lipindi Mwana wa Adamu paatehika.

32 Ila kwahela mundu angumanya lichuwa au lisaa, hata watumikila wa Sapanga wa kundumba, pamonga na mwana amanya ng’ogha, ila Tati weka hela ndiwa angumanya.

1 Walongu, lasima ng’ogha niwayandikili mghalu wowosi kuilongelelela lipindi au lisaa mighalu hai itehumila. 2 Kwaikiva mwenga maweni mngumanya chakaka lichuwa lya Bambu litehika handa mwihi vila anguhika uhiku. 3 Pala wandu wailongile, "Kila kindu ni luheku na kwahela makakala", ndiwa mayalamiso yatepowaguwila bwitu, hagha yatehumila bwitu handa utungu wa mlela pala umuhikila lipindi lya kujiwopola, kwahela mundu atewesa kuhyeta hali.

42 "Hinu, mlihungi, kwaikiva mmanyang’ogha lichuwa atehika Bambu wa mwenga." 43 Ila mmanyi mghalu hau, ikiva mweni lighuta angalimanya lipindi ligha mwihi atehika, angalilindila, angalileka kuwonja akaleka lighuta lyaki libomolwi. 44 Kwaikiva gha nagha, na mwenga mliyandali, kwaikiva Mwana wa Adamu atehika lipindi mmanya ng’ogha.

1 Paahuya Yesu Bambu wa twenga, tutelikungula pamonga kuwela na mweni, hinu ninguwaluwa nesu nesu walongu wa nenga, 2 mkotoho kuyumbila kwa uyuyughu na vilavila mkotoho kutaywa holu na mpumulo yoyosi hata kwa lilando au lihamba yoyosi iwachilwa yiwa ihuma kwa twenga ingulongela yiwa lichuwa lya Bambu lihika kala. 3 Mkotoho kulongelwa uhwangi na mundu yoyosi kwa njila yoyosi hila. Kwaikiva lichuwa lila litehika ng’ogha mbaka kuhumili huti uhakata na yula mhyuka awoneki huti, hayu mwihu ghaki ni kuyalamiswa tukutuku. 4 Mweni atengingama na kujiyinula kunani gha kila kindu kila wangukikema yiwa ni mulungu au kingutundamilwa, ili kujivika kunani gha kulighuta lya Sapanga, akilitangasila mweni yiwa ni Sapanga.

16 Kwaikiva Bambu mweni atehuluka kuhuma kundumba pamonga na lilowi lya lilaghilo, na lilowi lya mtumikila wa kundumba wa Sapanga mkulu na lilowi lya lipembi lya Sapanga. Na ndiwa wala wahovili wakiva wangumkwinila Kilisito watehindulilwa mtumbulo. 17 Badili gha hali kuphita twenga tuvile wakomu lipindi hali tutekungulwa pamonga na weni kumahindu kukongine na Bambu kunani. Hinu tutewela pamonga na Bambu machuwa yayendelela.

24 "Hinu, machuwa ghala, lung’ahi hula pa uphita, lijuwa litetaywa lwisa na mwehi utelangasa ng’ogha. 25 Ndondwa ziteguwa kuhuma kunani, na makakala gha kunani ku mahindu yatetikwa. 26 Baha watemlola Mwana wa Mundu akihika mu mahindu kwa makakala yatangala na ukwilikihi. 27 Hinu atewalaghila watumikila wa Sapanga kundumba ghaki wahaghulilwi wandu ghaki kuhuma pandi zyogha inne zya mlima wogha, kuhuma mwihu wa mlima wogha mbaka mwihu wa kundumba.

31 "Mwana wa Mundu paatehika kuukwilikihi ghaki na watumikila wa kundumba wa Sapanga wogha pamonga na mweni, baha atetama kunani gha kitamilo kyaki kya ukulu ghaki." 32 Wandu wa milima hyogha watelikungula kuulongolo ghaki, na mweni atewabagulisa wandu handa mhungaji angubagulisa kondolu na mbuhi. 33 Atewavika kondolu mbandi ghaki wa kuliyila na mbuhi mbandi ghaki wa shotu.

11 Hinu nikalola kundumba kuwopoka, na haku awelili falasi mmonga mbulete, na yula amkwelili falasi akemilwi "Mundu wa kutegemea na chakaka." Hayu paatosa angughola vila ingupalwa na paangutovana ngondo angughola kwa chakaka. 12 Mihu ghaki ni handa myali gha lyoto na kunani gha mutu ghaki kuwelili na mikokoma mitangala. Awelili kayandikwa lihina lyeni kwahela mundu yoyosi kangulimanya ila kalimanya mweni hela. 13 Awelili kavala lihabiti lijwikilwi kumwahi, na lihina lyaki hayu ni "Lilando lya Sapanga." 14 Mapinga gha weni kulikala kundumba wakamkovekela mkwela falasi mbulete, na weni wakiwela wakwela falasi wambulete hilahila, weni wavala nguu nyanyi na mbulete nesu na maheli. 15 Kumlomo ghaki kunguhuma lipanga likalipa, atelitumila kusinda wandu wa milima hyogha, atelongosa kwa hyatu gha lyuma. Na mweni atekamula sabibu kweni kyombu kya kukamulila, kyeni kulangiha lilaka lya Sapanga mweni uweso wogha. 16 Kunani gha lihabiti lyaki, na kunani gha lipaja lyaki, awelili kayandikwa lihina, "Nkosi wa wankosi na Bambu wa mabambu."

26 Ikiva mundu anguniwonela honi nenga na mavulo ghangu, Mwana wa Mundu atemuwonela honi mundu hayu lipindi atehika kwa ukulu ghaki na wa Tati na watumikila wa kundumba wa Sapanga ghaki.

8 Ila waghanja ghangu, mkotoho kuisemwa lilando hali, yiwa kwa Bambu, lichuwa limonga lilinganila na machuva ielufu na machuva ielufu yangulinganila na lichuwa limonga. 9 Bambu angutimila lilaghano lyaki kwa lipindi lya chakaka, ng’ogha handa wandu waghangi wanguliwachila yiwa angukawila. Mweni anguwafumilila mwenga kwaikiva kapala ng’ogha hata mmonga wa mwenga ayalamiki ila angupala kila mmonga wa mwenga aleki sambi.

10 Ila lichuwa lya Bambu litehika handa mwihi. Ndiwa kundumba zyogha zitehuka kwa visindu vikulu na viumbi vyaki vyogha viteyalamiswa kwa lyoto na mlima wogha pamonga na vindu vyaki vyogha viteyalamiswa kwa lyoto.

11 Hinu kwaikiva vindu vyogha vitekolonganyika handa hagha, ghuli mwenga, mngupalwa kuvile wandu wa ngalilu niki? Mngupalwa kulikala kwaikiva gha Sapanga na kulikala kwa kumtundamila Sapanga, 12 mukilindila lichuwa lila lya Sapanga na kupala ihiki kwa kuloposela. Lichuwa hali ndumba zyogha zitelunguswa kwa lyoto na kuyalamiswa, na viumbi vyaki vyogha vya dahile viteyeyuswa kwa lyotu. 13 Handa alaghilili, tunguilindila ndumba hyonu na mlima wogha hyonu uvile wandu wamhekelesa Sapanga hela wangulikala.

27 Handa mundu vila kavikilwa kuhova lihanja limonga hela na badili gha kuhova kulamulwa. 28 Hilahila Kilisito ajitolili lihanja limonga hela kuwela litambiko ili azitoli sambi sya wandu watangala, na mweni atehika lihanja lya ipili, ng’ogha kutola sambi, ila kuwayeghela ulokola wala wandu wangumlindila kwa luhujulu nesu.