1 Ghala maghaso gha Efesu payayomolili kala Paulo awakemili pamonga wala wavulwa, akawataya moyu. Hinu akawataula, akayenda mbaka Makidonia. 2 Apitili kumimbwani gha mlima hula akiwataya moyu wandu kwa milandu mitangala. Kangi akahika Ugiliki, 3 na kutama kula kwa miehi itatu. Paawelili angujiyandala kuyenda Silia, amanyili yiwa Wayahudi wawelili na mghalu wa kumkoma mweni, nagha awonili ahuyi kwa kupitila Makidonia. 4 Sopatilo, mwana wa Piliho, kuhuma Belea, ayendili pamonga na mweni, Kangi alongosanili na Alistaliko na Sekundo kuhuma Tesalonike, Gayo kuhuma Delibe, Timoseo na Tukilo na Tilofimo wa mmbwani wa Asia wayendili pamonga na mweni. 5 Hagha wandu watulongulelili wakayenda kutulindila ku Tiloa. 6 Twenga, badili gha mhambu gha bumunda livile ng'ogha na ujejema, tukwelili whatu kuhuma Filipi na badili gha machuwa itatu tukahika kula Tiloa. Kula tutamili kwa lipindi lya machuwa isaba.

7 Lichuwa lya mtumbulo lya liwiki palumihi tukongine ili kulyegha bumunda lya Bambu. Kwa vila Paulo apalili kuhuka kilau ghaki, awatangasili wandu na kuyendelela kulonga na weni mbaka uhiku wa mandandu. 8 Kukyumba kya kunani, kuwelili na malimbamba ngenju yanguyaka. 9 Mhongolo mmonga akemilwi Eutiko avile atamili kulilanga lipindi Paulo paavile anguyendelela kutangasa. Eutiko atumbulili kuwonja mayaghani na mwihu ghaki akawonja luwono mtopeu, akaguwa pahi kuhuma kyumba kya itatu kunani. Wamwonili kahova kala. 10 Paulo akahuluka pahi, akamwonjela kifulifuli yula mhongolo kunani ghaki. Hinu akawalongela wandu wagholokili kumtindila, "Mkotoho kuwela na holu, hinaa mhongolo hayu ni mkomu." 11 Hinu akakwela kangi kunani kula ku kyumba kya itatu, akalyegha mulyo. Akayendelela kulonga kwa lipindi litali mbaka malawila, kumwihu akayenda. 12 Wala wandu wakayenda na yula mhongolo mbaka ukaya kwa mweni akiva ni ukomu, mioyu gha weni ikapumula.

13 Twenga tuliyingila mu whatu. Paulo kayingila ng'ogha kuyenda na twenga ku Aso, kwaikiva apalili kuyenda kwa uloposeli kwa maghulu kupitila ku njila mbaka kumbwani Aso. Twenga tuyingila mu whatu na kuyenda ku mlima Aso. 14 Patukongine na mweni Paulo kula Aso, akayingila mu whatu tukayenda pamonga na mweni mbaka Mitulene. 15 Kuhuma kula tukayendelela na mwanja tukahika ku Kio kilau ghaki. Lichuwa lya ivili, tulihika Samo na kilau ghaki kangi tukahika Mileto. 16 Paulo awachilili na kalamula kuyendelela na mwanja kwa whatu kapitila ng'ogha Efesu, kwaikiva awelili na uloposeli gha kuhika Yelusalemu pambila gha mhambu wa Pendekosite handa inguwesekana.

17 Kuhuma Mileto Paulo akalaghila ujumbi kwa wagogolo wa Efesu yiwa wakongini na mweni. 18 Wala wagogolo pawahikili kwa mweni akawalongela, "Mngumanya vila nilikalili na mwenga machuwa hyogha kuhuma lichuwa lila lya utumbulo panihikili ku Asia." 19 Mngumanya vila nimtumikila Bambu kwa utundamilu, kwa masosi na mayeso kuhuma kwa mawachilo mahakata gha Wayahudi. 20 Mngumanya yiwa nihyeta ng'ogha hata mayaghani kuwatangasila paluagha na mmighuta gha mwenga na kuwavula hyogha ghala yangaliwatanga mwenga. 21 Niwalongelili wogha Wayahudi, na vilavila wandu Wayahudi ng'ogha, wamhyukili Sapanga kwa kuleka mahakata na kumkwinila Bambu wa twenga Yesu. 22 Hinaa, mniyoghanili nenga, Mpumulo wa Sapanga angupala niyendi Yelusalemu na nenga nimanyile ng'ogha kyani kitenihumila kula Yelusalemu. 23 Kila nikimanyile ni yiwa Mpumulo wa Sapanga angunihighilisila yiwa kummbwani mmonga kwa mmbwani ghangi akilonga yiwa vihungo na lung'ai vingunilindila kula Yelusalemu. 24 Ila nivalanga ng'ogha ukomu wa nenga yiwa ni wa maha kwa nenga, ipita kuyomola lila lihengu lya Bambu Yesu anipegheli.

25 "Nityangili paghati mwa mwenga wogha nikitangasa Unkosi wa Sapanga. Ila hinaa, ningumanya yiwa kwahela hata mmonga wa mwenga atenilola kangi." 26 Kwa nagha ninguwalongela lelo hinaa lipalalipala, ikiva mundu kayaghamila yiwa nenga nahela uhakata gha mwahi gha mundu yeyosi. 27 Kwa ikiva nihyeta ng'ogha hata mayaghani kuwalongela vyogha Sapanga apalili kughola kwa mwenga. 28 Mlikali mihu mwa weni na mgholokeli lila likongamano lya wakwinila livile Mpumulo wa Sapanga kawavika mwenga mvile wagholokela. Mlihungi likonganiko lya wandu wamkwinila Kilisito lila kalihemela kwa mwahi gha mwana ghaki. 29 Ningumanya maheli nesu yiwa panihuka haku kuyetu, wandu wavula milandu gha uhwangi watehika kwa mwenga na watevile wakalipa na watewavamila handa ghalumwitu wa kumanyahi na watewela ng'ogha na luhungu na mwenga. 30 Kangi kulipinga lya mwenga lya wakwinila kutevile na wamonga watewapapusa wakwinila kwa kuwavula lilando lya ughwangi na wandu watewakwinila na watevile wavulwa wa weni. 31 Nagha mkali mihu wogha mkumbwike yiwa kwa lipindi lya machuva itatu uhiku na pamuhi nitoka ng'ogha kuwapegha malaghililo kila mmonga wa mwenga kwa masosi.

32 "Hinaa ninguwaleka mwenga pahi gha ugholokela wa Sapanga na kwa lilando lya ulungwana ghaki, na weni unauweso wa kuwachenga na kuwawesesa mpokeli zila highili awavikilili mwenga pamonga na wandu wogha. 33 Nenga mwenibaha, nivile ng'ogha na luhujulu lwa feza na zahabu na nguu zya maha zya mundu. 34 Mngumanya mwengabaha yiwa nigholili lihengu kwa mawoku ghangu ili mbati mapesa kwaikiva gha nenga na wayangu. 35 Ku kila kindu nigholili, nilangiha kwa mwenga yiwa kughola lihengu kwa lihuki lya twenga weni ili tuwesi kuwatanga wala wajiwesa ng'ogha, na lipindi tungughola nagha mngumbuki milandu gha Bambu Yesu mweni vila ailongile, ‘Ni highili nesu kupegha kupiti kupokela’"

36 Paulo paayomolili kulonga, akatundama manunguna pamonga na weni wogha akayupa. 37 Wogha wakalila masosi nesu, na kumkumbata na kumnonela. 38 Mghalu augholile kuwavika kuunyengemala ni vila ailongile mtenilola ng'ogha kangi. Ndiwa wakayenda pamonga na mweni mbaka ku whatu.