1 Na mweni Sauli awelili pala akilola yiwa sitefano angupalwa kuhova.

Machuwa ghalaghala lipinga lya wandu wamkwinila Kilisito liwelili ku Yelusalemu litumbulili kupokela mahakili makulunga. Wakwinila wogha wakapalaghanyika ku Yudasia na Samalia, wahighalile ni wandumindumi hela. 2 Wandu wamtundamila Sapanga wakamsika Sitefano na kumgholela malumbililo makulunga.

3 Ila Sauli ayendelelili kuyalamisa lipinga lya wandu wamkwinila Kilisito, ayingilili lighuta kwa lighuta, na kuwakamula wavulwa, walumi na wadala, na kuyenda kuwavika muuwopwa.

4 Kwa nagha wala wapalaghanyikili, wayendelili wakitangasa hula ujumbi kila mahala kula wayendili. 5 Na mweni Filipo ayingilili kummbwani wa Samalia na kutangasila wandu Habali Maha zya Kilisito kwa wenikaya wa kula. 6 Wandu pawayoghanila kwa umaha hula ujumbi wa Filipo na kulola hila mighalu gha kukangasa aigholili wandu wakamyoghanila nesu. 7 Mahoka wawelili mghati mwa wandu watangala wakawahuka wakitova lilowi likulunga, na kangi wandu watangala wawelili vikongonu vipola na wawelili walemafu walamisilwi. 8 Wandu wa mmbwani hula wakahekelela.

9 Na kuwelili na mundu mmonga akemilwi Simoni awelili akilikala mmbwani hula kuhuma dahile. Mweni awelili akighola mighalu gha uhawi na kuwakangasa wandu wa Samalia. Ajigholili yiwa ni mundu mkola mlima. 10 Wandu wogha, wasokombi kwa wakulungwa, wamyoghanilili kwa maha wakilonga, "Simoni ndiwa makakala gha kisapanga ikemilwi Ikakala ngulu." 11 Wandu wawelili wakimyoghanila nesu mweni kwa vila awelili kawakangasa kwa uhawi ghaki kwa lipindi litali. 12 Ila wandu pawakwinila Habali Maha gha unkosi wa Sapanga na Habali gha Yesu Kilisito awatangasili Filipo, wogha wabatisilwi, walumi kwa wadala. 13 Na mweni Simoni akwinilili, na badili gha kubatiswa awelili akikovekelana na Filipo, akakangaswa na mighalu gha kukangasa na vilangihi viwelili vingugholeka.

14 Wala wandumindumi wawelili Yelusalemu pawayoghanilili yiwa wenikaya wa Samalia wakwinilili lilando lya Sapanga, wakawayegha Petelo na Yohana. 15 Pawahikili wakawayupila wala wawelili wakwinila ili wapokeli Mpumulo wa Sapanga; 16 Kwaikiva Mpumulo wa Sapanga awelili ng'ogha kamghulukila hata mmonga ghao, wawelili wabatisililwi kwa lihina lya Bambu Yesu hela. 17 Hinu, Petelo na Yohanawakavika mawoko kunani ghao na kuwayupila wala wakwinila, na weni wakapokela Mpumulo wa Sapanga.

18 Kwa nagha Simoni paalolili yiwa wakwinila wapokelili Mpumulo wa Sapanga kwa kupitila kuvikilwa mawoko gha wandumindumi, Nagha akapala kuwapegha Petelo na Yohanamapesa akilonga, 19 "Mnipeghi na nenga uweso hau ili yoyose nitemvikila mawoku kunani ghaki, apokeli Mpumulo wa Sapanga."

20 Ila Petelo akamyanga, "Mapesa gha wenga yayaghamilile kutali pamonga na wenga mweni, kwaikiva unguwachila yiwa unguwesa kuhemela uweso wa Sapanga kwa kupitila mapesa. 21 Wenga uvile ng'ogha pamonga na twenga kulihengu hali kwa ikiva mpumulo ghako ni mhakata kumihu gha Sapanga. 22 Kwa nagha, uleki uhakata ghako na umkovekeli Sapanga na umyupi Bambu na mweni mani atewesa kukulekesela mawachilo yavile mu moyu ghako. 23 Nenga ningulola wenga yiwa umemeswa wifu mkalipa na mahakata ghako yangukukola!"

24 Hinu Simoni akawalongela Petelo na Yohana, "Mniyupile mwenga kwa Bambu, ili ghala muyalongelili yakotoho nihikila."

25 Pawayomola kuwalongela wandu vila wammanya Yesu na kutangasa lilando lya Bambu, Petelo na Yohanawakahuya Yelusalemu wakitangasa Habali Maha kuvimbwani vitangala vya Samalia.

26 Lichuwa limonga mtumikila wa kundumba wa Sapanga amlongelili Filipo, "Ujiyandali uyendi kusini kupitila njila ihumilili Yelusalemu kuyenda Gaza njila hila inguyendela mulivagha." 27 Hinu, Filipo akajiyandala, akatumbula mwanja. Lipindi lilalila kuwelili na mwesiopia mmonga, mundu avile mbendi, akiva anguyenda ukaya. Hayu mundu awelili mkola mlima mvika hindu wa Kandake kwa nkosi mdala wa Esiopia. Na mweni awelili kayenda Yelusalemu kuyupa na lipindi hali awelili anguhuya akiva kakwela mbutuka ikweghwa na likokolo. 28 Paawelili anguyenda, awelili angujisomela hitabu kya mlota wa Sapanga Isaya. 29 Hinu, Mpumulo wa Sapanga akamlongela Filipo, "Uyendi, usoheleli pabehi na mbutuka hila." 30 Filipo akabhutuka mbilo kusohelela hila mbutuka, akamhyoghanila hayu mundu angusoma kihitabu kya mlota wa Sapanga Isaya. Filipo akamkonya, "Ghuli, ungumanya hagha unguyasoma?"

31 Yula mundu mvika hindu akamyanga, "Ghuli niwesa kumanya ikiva kwahela mundu wa kunighalambulila?" Kangi akamlongela Filipo ahiki kunani gha mbutuka, atami pamonga na mweni. 32 Hinu, mahala gha mayandiko mambuletenesu awelili angusoma pawelili nagha,

"Awelili handa kondolu anguyeghwa kuhinjwa,

nuu handa mwanakondolu anguputulilwa mipuku,

kawesa ng'ogha kulonga.

33 Apughanisilwi na wampegha ng'ogha utundamilu.

Kwa hela mundu atewesa kulongela kukiwelekwa kyaki,

kwaikiva kulama kwa mweni kuhumiswa mumlimawogha."

34 Hayu mbendi akamlongela Filipo, "Nilongeli, hayu mlota wa Sapanga angulongela habali liki? Angulonga mighalu ghaki mweni au gha mundu ghangi?" 35 Hinu, Filipo akatumbula kutumila mahala pala pamayandiko Mambuletenesu, akamlongela Habali Maha gha Yesu. 36 Pawawelili wanguyendelela na mwanja, wahikili mahala pavile na masi, na hayu mkulu akalonga, "Mahala baha pavile na masi, ni hindu liki kinikanili nikotoho batiswa?" Mundu angubatiswa 37 Filipo akalonga, "Ikiva utemkwinila Yesu Kilisito kwa moyu ghako wogha utebatiswa." Na mweni akayanga, "Hina, ningukwinila yiwa Yesu Kilisito ni Mwana wa Sapanga."

38 Hinu, hayu mkulu akalaghila hila mbutuka ligholoki, na wogha waivili, Filipo na hayu mundu wakaghuluka mmasi, na mweni Filipo akambatisa. 39 Pawahuka kuhuma mmasi, bwitu Mpumulo wa Bambu akamtola Filipo. Na hayu mundu avile mbendi kamlola ng'ogha kangi, ila akayendelela na mwanja akiva na luheku. 40 Filipo kajilola kabwitukila ku mlima waukema Azoto, akaphita ku mimbwani hyogha akitangasa Habali Maha gha Yesu mbaka paahikili ku Kaisalia.