1 Lipindi Apolo paawelili Kolintu, Paulo akayenda mwanja kumlima wa Efesu. Kula akawalola amonga wa wavulwa. 2 Paulo akakonya, "Ghuli, pamumkwinila Kilisito mpokelile Mpumulo wa Sapanga?"

Na weni wakamyanga, "Ng'ogha. Hata tuyoghanili ng'ogha yiwa kuvile na Mpumulo wa Sapanga."

3 Na mweni akalonga, "Hinaa mpokela ubatiso wa ghuli"

Wakamyanga, "Ubatiso wa Yohana"

4 Na mweni Paulo akalonga, "Ubatiso wa Yohanauwelili wa kulangiha yiwa wandu waleka mahakata na kumhyukila Sapanga. Yohanaawalongelili wandu wamyitikili yula avile awelili anguhika badili ghaki, akimkema ni Yesu."

5 Pawayoghanila hagha, wabatisilwi kwa lihina lya Bambu Yesu. 6 Hinu, Paulo akawavikila mawoku kunani gha mutu ghao na Mpumulo wa Sapanga akawahulukila, wakatumbula kulonga luga hyonu na kulonga ghala Sapanga ateghola. 7 Wandu wogha wawelili pala wawelili walumi ikumi na waivili.

8 Kwa lipindi lya miehi itatu Paulo awelili akityanga ku Lighuta lya kutundamila Wayahudi, akalongela na wandu kwa makakala na kughola malongelano na kuyesa kuwakwegha wandu ili wakwinili habali gha Unkosi wa Sapanga. 9 Ila wamonga wa wandu wawelili na mioyu mitatala hata wakalema kukwinila, wakatumbula kulighu ujumbi wa Paulo kuulongolo gha wandu wakonganikili. Kwa nagha Paulo akawaleka, akayenda na wavulwa weka ghao. Na kila lichuwa akasindana na wandu kukyumba kya mavulo kya mundu mmonga akemilwi Tilano. 10 Ayendelili kughola nagha kwa lipindi lya machuva ivili hata wenikaya wogha wa Asia, na Wayahudi na wandu wa Wayahudi ng'ogha, wakawesa kuhyoghanila lilando lya Bambu.

11 Sapanga agholili makangaso gha kukangasa kwa kupitila Paulo. 12 Wandu wawelili wakitola hata nguu zya kupukutila lihuki na nguu zya lihengu avile Paulo katumila, wakaziyegha kwa wavina, na weni wakalamiswa uvina ghao na wala wawelili na mahoka, mahoka yakawahuka. 13 Wayahudi wamonga weni kuwesa kuhumisa mahoka wayendili kogha na kogha wakilitumila lihina lya Yesu kuwalongela mahoka. Wawelili wakilonga, "Ninguwalaghila kwa lihina lya Yesu yula Paulo angumtangasa ninguwalongela yiwa mumuhuki mundu hayu." 14 Kuwelili na wana walumi Isaba wa Sikewa, mtambika mkulu wa Kiyahudi, hagha wana wawelili wangughola handa wala Wayahudi weni kuwesa kuhumisa mahoka.

15 Ila lichuwa limonga Lihoka likawayanga wala wana wa Sikewa kwa kukalipa, "Ningummanya Yesu yiwa ndiwa ampeghili Paulo makakala gha kuhumisa mahoka na Paulo mweni ningummanya, ila mwenga ni mkinaghani?"

16 Hinu yula mundu avile na mahoka akawajumbila wogha, akawasinda kwa makakala. Na wala wana wa Sikewa wakabhutuka mbilo kuhuma lila lighuta wakiva na nguu ng'ogha na weni vilonda. 17 Kila mundu kula Efesu, Myahudi na avile ng'ogha Myahudi, wayoghanili mghalu hula, wogha wakayingilwa na holu, wakalikwilikila lihina lya Yesu. 18 Wandu watangala wamkwinilili Yesu wahikili paluagha wakalongela mighalu mihakata waigholile na kumhyukila Sapanga. 19 Wandu watangala wawelili wakiva wakighola uhawi kuhuma dahile, wakungulili vihitabu ghao, wakavinyanya vyogha lyoto kuulongolo gha wogha. kipimilo kya mapesa gha vihitabu vinyanywili vyogha kiwelili kitangala nesu handa vipandi viihamsini ielufu vya lidini gha feza. 20 Kwa njila hai, lilando lya Bambu lilandalili nesu na kuvile na uweso nesu.

21 Mighalu hila paiyomwiki kugholeka, Paulo akalamula kuyenda Yelusalemu kwa kupitila mimbwani gha Makidonia na Akaya kujambusa wavulwa. Akajilongela mweni mumoyu, "Panihika Yelusalemu niteyenda Ulumi." 22 Na mweni, akawalaghila watumikila ghaki waivili wa kumtanga, Timoseo na Elasito ku Makidonia, na mweni akatama kwa machuwa mayaghani kula Asia.

23 Lipindi lila ndiwa payahumili maghaso makulunga kula Efesu kwaikiva gha njila hila gha Bambu. 24 Kuwelili na mghola feza mmonga akemilwi Demetilio, awelili na lihengu lya kuhongola vilighuta vya kuhongola vinung'una nung'una vya mlungu mdala akemilwi Alitemi. Lihengu hali liwapeghili wahongola ghaki mapesa ngenju. 25 Demetilio akawakungula wala waghola lihengu pamonga na wamonga wawelili na lihengu handa hali, akawalongela, "Walongu, mngumanya yiwa tungupokela mapesa ngenju kwa lihengu hali. 26 Hinaa, mnguwesa kuhyoghanila na kulola weni mighalu Paulo anguyaghola baha ng'ogha Efesu hela na kangi ku Asia hyogha. Mweni awalongelili wandu milungu igholwa na wandu ni milungu ng'ogha. 27 Nagha itevile maha ng'ogha, kutevile na udadambala ku lihengu lya twenga itevile na lihina lihakata. Ng'ogha nagha hela, kangi mghalu hau unguwesa kughola lighuta lya Mlungu Alitemi litevile kindu kya kupughanywa. Kumwihu ukwilikihi wa hayu Atemi angutundamilwa na wandu wogha wa Asia pamonga na mlima wogha kuteyomwike."

28 Pawayoghanili hagha, wahyomili nesu, wakatumbula kutova lilowi, "Mkulu ni Atemi wa Efesu." 29 Kummbwani wogha kukavile na maghaso. Wakawakamula Gayo na Alisitako, wenikaya wa Makidonia, wakiva wayaki na paulo, wakayenda na weni, wakabhutuka mbilu na weni mbaka kuluagha gha kuhinila. 30 Paulo apalili kuyingila kuulongolo gha lila lipinga lya wandu, ila wavulwa wakamkanisa. 31 Wakulu wamonga wa kula Asia, wala wawelili waghanja ghaki Paulo, wakamyegha mundu kumkanila akotoho kuyingila kumahakata kwa kuyenda kuyingila mghati gha hula luagha gha kuhinila. 32 Lipindi lila, kila mundu awelili angulalama angulongela kwa kukalipa, ghangi hali na ghangi lila, mbaka hula mkongano ukakologhanyika. Wandu watangala wamanyili ng'ogha hata ni kwaikiva gha niki wakongini pala. 33 Kwa vila Wayahudi wamkukulili Alekisanda kuulongolo gha wandu, Wamonga ghao kukonganiko wakampegha njila gha kulonga hinu Alekisanda akawayinulila liwoko kuwalangihi wandu watami nuu. Kwaikiva apalili kujitetela mweni kuulongolo gha weni. 34 Ila pawamanyili yiwa mweni ni Myahudi, wandu wogha wakatova lilowi kwa pamonga, "Mkulu ni Alitemi wa Efesu." Wakayendelela kulonga nagha kwa saa ivili.

35 Hinu, Myandika wa mmbwani awesili kuwaghola watami nuu, akawalongela, "Wandu wa Efesu! Kila mundu angumanya yiwa mmbwani hau wa Efesu ni mgholokela wa lighuta lya Mlungu Alitemi na mgholokela wa hila hindu gha kuhongwa iguwili kuhuma kundumba. 36 Kwa hela mundu anguwesa kulema mighalu hagha. Nagha, mtami nuu, mkotoho kughola chochosi kwa kuloposela. 37 Muwayegha wandu hagha baha pamonga na wahija ng'ogha hindu gha mlighuta wala kumlighu mlungu wa twenga mdala. 38 Hinu ikiva Demetilio na waghola lihengu ghaki wavile na masitaka kwa wandu hagha, njengakaya zya lipala na vilongosi watama pala hinu wanguwesa kusitakilana haku. 39 Ila ikiva mvile na mghalu ghangi, muuyeghi ku njengakaya ghangi. 40 Kwaikiva gha hagha yahumila lelo tunguwesa kusitakiwa kwaikiva gha mkologhanyo kwahela lilando tunguwesa kujitetela kwa hagha." 41 Paayomola kulonga ghala akawalongela wandu wahuki.