1 Patuhika tukiva wakomu mmbali mwabahali, ndiwa tumanyili yiwa lihina lya kila kihughulu ni Malita. 2 Wenikaya wa pala wawelili walungwana nesu kwa twenga. Ndonya ivile ingutumbula kutonya na kuwelili na lupepu, nagha wakakosa lyoto, wakatukema tutami na weni. 3 Paulo awelili kalikungulila mhighu msokombi wa hanju akiva anguzivika kuliloto. Pala, kwaikiva gha lila lyoto, njoka kahuka ku hanju akalitindila kuliwoku lya Paulo. 4 Wala wenikaya wa hila kambi pawamwonili yula njoka akining'inila kumawoku gha Paulo, wakalongelana, "Hayu itewesekana kuvile ni mkoma wandu, pamonga alokokili kuhuma mubahali, hinu mlungu angumuhipa mahakata ghaki." 5 Ila Paulo akamputila yula njoka mghati gha lyoto na mweni kalumwa ng'ogha na yula njoka. 6 Wala wandu wawelili wakiwachila yiwa atetupa na kuulongolo kuhova bwitu. Na pawamlolili kwa lipindi litali na kulola yiwa kakolwa ng'ogha na lolosi wakahyuka na kuilongela "Mweni ni mlungu."

7 Hinu, pabehi na mbandu hila, pawelili na litawa likulunga lya mundu mmonga kilongosi wa kila kihughulu, akemilwi Pubulio, avile katupokela akatutumikila kwa ulungwana mkulunga kwa machuwa itatu. 8 Tati ghaki Pubulio awelili mvina kukindanda, akiva anguvina uvina na kupweka mwahi. Paulo akayingila mghati ili kumlola na akamyupila kwa Sapanga na kumvikila mawoko kumutu na mweni akalama. 9 Mghalu hau pauhumila, wandu wogha wa mahala pala wala wawelili wavina wakahika na weni wakalamiswa. 10 Wandu wakatupegha hupo weka weka, na lipindi tutumbula kangi mwanja wakavika mu meli vindu vyogha tuwelili tukivipala.

11 Miehi miitatu kuulongolo tukatumbula mwanja kwa meli iwopilwi ku kihughulu lipindi lya lupepo . Hai iwelili meli kuhuma Alekisandalia iwelili na kilangihi kya milungu mavila waivili wangukemwa "Kasito na Palukisi." 12 Tukahika kummbwani wa Silakusa, tukatama pala kwa machuwa itatu. 13 Kilau ghaki tukayendelela na mwanja na tukahika Regio, lichuwa lya ipili, liyegha likalipa lya kuhuma kusini likawumba, na lichuwa lya ipili tukahika Puteoli. 14 Kula tuwalolili walongu wamkwinila Kilisito ghangi wavile watuluwili tutami na weni kwa lipindi lya machuwa isaba. Na havi tukahika Loma. 15 Wakwinila wa kula Loma pawayoghanila habali zya twenga, wahikili mbaka Soku lya Apio na mahala pakemilwi Mighuta miitatu gha wahenja kutulola. Paulo paawawonili, akamshukwile Sapanga na akataywa moyu.

16 Patuhikili Ulumi, Paulo akalekwa alikali weka ghaki pamonga na mtovangondo mmonga wa kumgholokela.

17 Machuwa maitatu kuulongolo Paulo akawakema pamonga vilongosi wa kiyahudi wa mahala pala. Pawalikungulili, Paulo akawalongela, "Walongu ghangu, pamonga na yiwa nighola ng'ogha chochosi kihakata na hata kukingama mighalu gha dahile gha wagogolu wa twenga, nikamulilwi kula Yelusalemu na kuvikwa kumawoku gha Walumi. 18 Na weni pawanikonyili na kulola yiwa nivile ng'ogha na mahakata yoyosi, Walumi wakapala kunileka. 19 Ila Wayahudi watenu wakingamili nikotoho kuwoposolwa, nikapala kuluwa kulamulwa kwa nkosi mkulu wa Loma, ila niwela ng'ogha na lilando lya kuwasitaki wandu wa mlima ghangu. 20 Hinu kwaikiva gha mghalu hau, niwakema mhiki kunilola na kulongela na nenga, kwaikiva niwopwa minyololu hai kuhumila na lilaghano lya Izilaeli."

21 Weni wakamlongela, "Twenga tupatile ng'ogha lihamba yoyosi kuhuma mmbwani Yudasia na kwahela mundu yeyosi mlongu yoyosi ahikili baha na kulonga chochosi au kihakata ugholili. 22 Ila tungupala kuhyoghanila kuhuma kwa wenga mwenibaha mighalu yavile kumutu kwa wenga. Kwaikiva tumanyili twenga yiwa haki kipinga kingungingamwa kogha na kogha."

23 Hinu, wakalongelana lichuwa lya kukonganika na mweni, na wandu watangala wakahika kula awelili angulikala. Kuhuma malawila mbaka lumihi Paulo awalongelili na kuwaghalambulila habali gha unkosi wa Sapanga, akiyesa kuwaghola wakwinili habali gha Yesu kwa kutumila malaghililo na mayandiko gha walota wa Sapanga. 24 Wamonga ghao wakwinilili milandu ghaki, ila ghangi wakwinilili ng'ogha. 25 Hinu, kukavile na masindano gha mawachilo paghati ghao Pawawelili wanguyenda zyao, Paulo pala akalonga mighalu hai, "Hinaa ni chakaka yala Mpumulo wa Sapanga awalongelili wagogolo wa mwenga kwa kumtumila mlota wa Sapanga Isaya paailongile."

26 Ailongile,

"Uyendi kwa wandu hagha ukawalongeli,

ni chakaka kuhyoghanila mteyoghanila ila mtemanya ng'ogha,

mtevile na mihu gha kulola ila mtelola ng'ogha."

27 "Kwaikiva mioyu gha wandu hagha ivile ikekenala

na mapulukilo ghao ni matopehu kuhyoghanila na

weni wagubikilili mihu ghao.

Ili wakotoho kulola kwa mihu ghao na

kuhyoghanila kwa mapulukilo ghao,

na wakamanya kwa mioyu ghao na kunihyukila,

na nenga ningaliwalamisa angulonga Bambu."

28 Hinu Paulo akamalila kwa kulonga, "Imanyiki kwa mwenga yiwa habali gha ulokola hau wa Sapanga iyeghwili kutangaswa kwa wandu wavile Wayahudi ng'ogha, na weni wateyoghanila." 29 Na mweni Paulo paayomola kulonga milandu hagha, Wayahudi wakahuka kutali mayaghani wakiva wangukonyana mighalu ngenju weka weka weni kwa weni.

30 Kwa machuva ivili Paulo alikalili kulighuta awelili apangili na kuhipa mwenibaha mapesa. Akawakema wandu wogha wahiki kumjambusa. 31 Awelili akitangasa habali zya Unkosi wa Sapanga na kuvula mighalu gha Bambu Yesu Kilisito kwa makakala, na wamkanisa ng'ogha.