1 Lipindi lila Sauli ayendilelili kuwaghola wandu wamtili wala wandu wakwinila wa Bambu kwa kuwalongela yiwa atewakoma. Ayendili kwa mtambika Mkulu, 2 akaluwa wampeghi lihamba gha kumtambula kumaghuta gha kuyupila Wayahudi kula Damesiki, ili pakawalola kula walumi au wadala wamkwinilia Yesu, awakamuli na kuwayegha ku Yelusalemu.

3 Ila paawelili munjila pabehi kuhika Damesiki, bwitu mhana kuhuma kunani umlangasilili kogha na kogha. 4 Akaguwa pahi na kuhyoghanila lilowi likilonga, "Sauli, Sauli! Kwa kyani ungunihakili?"

5 Na mweni Sauli akamkonya, "Ni ghani wenga Bambu?" Na mweni akayanga,

"Nenga ni Yesu yula ungunihakili." 6 "Hinaa uleki kila ukighola ugholoki uyendi, uyingili mummbwani na haku utelongelwa mghalu ungupalwa kughola."

7 Wala wandu wawelili na Sauli pamonga kumwanja wagholokili pala, wakiva wavile ng'ogha na lya kulonga, wakayoghanila lila lilowi ila wamwonili ng'ogha mundu. 8 Sauli akayinuka, na paahumbulili mihu ghaki kawesa ng'ogha kulola hindu chochosi, hinu wala wandu wakamlongosa kwa kumkola liwoku mbaka mumbwani Damesiki. 9 Sauli alikalili machuwa itatu ng'ogha kulola, na lipindi lila kalyegha ng'ogha hata kunywegha ng'ogha chochosi.

10 Hinu, kula Damesiki kuwelili na mvulwa mmonga akemilwi Anania. Bambu amlongelili kumawonu, "Anania!" Anania akayitikila,

"Hina Bambu."

11 Na mweni Bambu akamlongela, "Jiyandali uyendi kunjila waikema njila ihyeta ng'ogha, kulighuta lya Yudasi ukamkonye mundu wa mbwani Taso wamkema Sauli. Hinaa anguyupa, 12 na kumawonu Sauli alolili mundu wamkema Anania akiyingila mughati na kumvikila mawoku ili awesi kulola kangi."

13 Ila Anania akayanga, "Bambu, ninguhyoghanila habali zya mundu hayu kuhuma kwa wandu watangala, wakilonga mahakata awagholili wandu ghako kula Yelusalemu, 14 na kahika baha akiva na laghililo kuhuma kwa watambika wakulu ili apati kuwawopa wogha wala wayupa kwa lihina lya wenga."

15 Ila Bambu akamlongela, "Uyendi hela, kwaikiva nimhaghulili mundu hayu aweli mtumikila ghangu, ili atangasi lihina lya nenga kwa wandu Wayahudi ng'ogha na kwa wankosi na kwa Waizilaeli. 16 Nenga mweni baha nitemlangiha vila angupalwa kuhakilwa kwaikiva gha lihina lya nenga."

17 Hinu, Anania akayenda, akayingila kulighuta lila. akavika mawoku ghaki kunani gha Sauli, akalonga, "Mlongu Sauli, Bambu yesu akuhumilili ukiva munjila kuhika baha, aniyeghili ili upati kulola kangi na kulongoswa na Mpumulo wa Sapanga." 18 Na palapala vindu handa mipatu gha homba viguwili kuhuma mumihu gha Sauli, akawesa kulola kangi. Akagholoka na akabatiswa. 19 Na pakayomola kulyegha mulyo, makakala ghaki yakamhuyila.

Sauli alikalili machuwa mayaghani pamonga na wavulwa kula Damesiki. 20 Bahala atumbulili kulongela milandu gha Sapanga kumalighuta gha kutundamilila Wayahudi yiwa Yesu Kilisito ni Mwana wa Sapanga.

21 Wandu wogha wamyoghanilili walikangasili, wakalonga, "Ghuli, mundu hayu ng'ogha yulayula awakomili wala wawelili wamkwinila Yesu kula Yelusalemu? Ghuli kahika ng'ogha baha akiva na lukani lwa kuwakamula wandu wala na kuwayegha kwa watambika wakulu?"

22 Ila Sauli akayendelela kutangasa Habali Maha kwa uweso, na akahighilisa yiwa Yesu ndiwa Kilisito kwa Wayahudi watamili Damesiki.

23 Badili gha machuwa yatangala kuyenda, Wayahudi wakonganilili na kuhakula njila gha kumkoma Sauli. 24 Ila Sauli akapokela habali gha mghalu hau. Uhiku na Pamuhi wagholokili kumilyango gha kuyingila mmbwani ili wawese kumkoma. 25 Ila lipindi lya uhiku wavulwa ghaki wakamtola, wakamhulusa pahi mghati gha libeja likulungwa kwa kupitila kulililanga liwelili kulikuta lya mmbwani.

26 Sauli paahikili ku Yelusalemu ayesili kukongine na weni. Ila wogha wamtilili na wawesa ng'ogha kumyitikila yiwa mweni awelili mkwinila wa Yesu. 27 Pala, Balinaba akahika akamtola Sauli, akamyegha kwa wandumindumi na kuwalongela vila Sauli amlolili Bambu munjila na vila Bambu alongelili na mweni. Hilahila akawalongela vila Sauli awelili angutangasa Habali Maha akiva na holu ng'ogha kula Damesiki. 28 Hinu, Sauli atamili pamonga na weni, akatyanga Yelusalemu hyogha akitangasa lilando lya Bambu kwa kugangamala. 29 Kangi akasindana na Wayahudi wala walongela Kigiliki, ila weni wakapala kumkoma. 30 Wala walongu wakwinila Yesu pawamanyili mghalu hula, wakamtola Sauli, wakamyegha Kaisalia, wakamleka ayendi kummbwani Taliso.

31 Lipindi lila lipinga lya wamkwinila Kilisito watamili ng'ogha na holu kogha ku Yudasia, na Galilaya na Samalia. Wayendelelili kukula kiupumulo na kumtundamila Bambu na lipinga lya likayongeseka kwa mtanga wa Mpumulo wa Sapanga.

32 Lichuwa limonga Petelo awatyangililili wandu wa Sapanga walikalili kula mmbwani Lida. 33 Kula amlolili mundu mmonga akemilwi Ainea yula avile kwa machuva inane awelili awonjili mukindanda kwaikiva awelili vikongonu ghaki vipola. 34 Hinu, Petelo akamlongela, "Ainea, Yesu Kilisito kakulamisa. Uyimuki utoli lihinda lyako." bwitu Ainea akayimuka. 35 Wenikaya wogha wa mmbwani Lida na ku bondi lya Shaloni pawamlolili Ainea akityanga, wogha wakamkwinila Bambu Yesu.

36 Kuwelili na mkwinila mmonga mdala mumbwani Yopa wamkema Tabita kwa kigiliki ni Dolikasi ingumaanisa sheshe. Hayu mdala awelili akighola mighalu maha yatangala na kuwatanga wavile na hindu ng'ogha machuwa hyogha. 37 Ku machuwa ghala awelili angulwala na akahova. Pawayomolili kughulula higha ghaki, wakamuwonjesa mghati gha kyumba kya kunani. 38 Yopa kutali ng'ogha na Luda kwa nagha wavulwa pawayoghanilili yiwa Petelo awelili Luda, wakawayegha wandu waivili kwa mweni na wakamluwa, "Uhiki kwa twenga hinaa." 39 Hinu, Petelo akayenda pamonga na weni. Na mweni paahikili wakamyegha mghati gha kyumba kya kunani. Haku kuwelili na wadala wahovitiliwi na walumi ghao wamtindililili Petelo, wakilila na kumlangiha lihabiti na nguu zyogha Dolikasi awasonelili paawelili mkomu. 40 Petelo akawalaghila wandu wogha wayendi panji, akatundamila manung'una, akayupa, hinu akaulola hula higha, akalonga, "Tabita, uyinuki." Na mweni Tabita akafumbula mihu ghaki, paamlolili Petelo akatama. 41 Petelo akamkamula liwoko akamyinula, hinu akawakema wala wamkwinila Yesu na wala wahoviliwi na walumi ghao, akawapegha kumawoku ghao akiva mkomu. 42 Habali hazi zilandalili kogha mbandi zya Yopa na wandu watangala wakamkwinila Bambu Yesu. 43 Petelo akalikala Yopa kwa machuwa ngenju akiva kwa Simoni mghola hindu gha ngosi.