1 Payayomola hagha, Paulo akahuka ku Asene, akayenda kolintu 2 Kula Kolintu, amwonili Myahudi mmonga akemilwi Akula, muwelekwa wa Ponto. Akiva kahika lipindi litali ng'ogha kuhuma Italia pamonga na mdala ghaki wamkema Pilisila, kwa ikiva Kaisali Klaudio alaghilili Wayahudi wogha wahuki Loma. Paulo ayendili kuwatyangila, 3 na kwa vila weni wawelili wandu wa kusona mahema handa mweni, Paulo alikalili na weni akaghola lihengu lya kusona mahema. 4 Kila lichuwa lya kupumulila Paulo awelili akilongelana na weni kulighuta lya kukonganika Wayahudi akiyesa kuwakwegha Wayahudi na Wagiliki.

5 Sila na Timoseo pawahika kuhuma kumlima wa Mekidonia, Paulo atumbulili kutumila lipindi lyaki lyogha kwa kutangasa lilando lya Sapanga, akawahighilisila Wayahudi yiwa Yesu ndiwa Kilisito. 6 Wayahudi pawamngingama na kumligha, akapundanga nguu zyaki kuulongolo ghao akilonga, "Pamyaghamila ni lihengu lya mweni, nenga nivile ng'ogha na masitaka, Na kuhuma hinaa nitewayendela wandu Wayahudi ng'ogha." 7 Hinu, akahuka pala akayenda kulikala ukaya kwa mundu mmonga kawela ng'ogha Myahudi mkwinila Sapanga akemilwi Titusi Yusito, avile lighuta lyaki liwelili pabehi na lila lighuta lya kutundamilila Wayahudi. 8 Kilisipo, mkulu wa lila lighuta lya kukonganika Wayahudi, akamyitikila Bambu mweni pamonga na walongu ghaki wogha. Wakolintu watangala wauyoghanilili ujumbi hula, wakaukwinila na kubatiswa.

9 Lichuwa limonga uhiku, Bambu amlongilili Paulo kumawonu, "Ukotoho kutila, uyendi kutangasa habali zya Sapanga na ukotoho kunyamala, 10 ikiva nenga niweli pamonga na wenga. Kwahela mundu ateyesa kukuvamila na kukuhakila kwaikiva wandu watangala kummbwani hau ni wandu wa nenga." 11 Hinu, Paulo akatama kula akivula lilando lya Sapanga paghati ghao kwa lipindi lya lichuva limonga na miehi isita.

12 Ila lipindi Galio paawelili mkulu wammbwani wa Akaya, Wayahudi wampundangili Paulo kwa pamonga na kumyegha kulighuta lya kulamula. 13 Na kumsitaki wakilonga, "Mundu hayu anguwavula wandu kumyupa Sapanga kwa njila ipalilwi ng'ogha na laghililo lya twenga."

14 Paulo paapalili kulonga, Galio akawalongela Wayahudi, "Ikiva mngumlalamikila mundu hayu kwa lilando lya uhakata au uhakata mkulunga augholili, ningawayoghanila mwenga Wayahudi maheli. 15 Ila kwaikiva ni lilando lya utatala wa milandu na mahina na laghililo lya mwenga, mlamule mwenga weni. Nenga niwesa ng'ogha kuwela mlamula wa mighalu hagha!" 16 Hinu, akawawinga kuhuma mulighuta lya kulamula. 17 Na wala wogha wakamkamula Sositenesi yula awelili kilongosi wa lighuta lya kutundamilila Wayahudi, wakamtova palapala kuulongolo gha lighuta lya kulamula. Ila mghalu hula umghasa ng'ogha Galio.

18 Paulo ayendelellili kutama na wala walongu kula Kolintu kwa machuwa yatangala. Hinu akawataula, akakwela whatu kuyenda Silia pamonga na Pilisila na Akula. Kula Kenikilea, Paulo akamoa hwila ghaki kwaikiva gha kutimilila kilapo kyaki avikili. 19 Wahikili Efesu na pala Paulo awalekili Pilisila na Akula, akayenda kulighuta lya kutundamilila Wayahudi, akalongelana na wayahudi. 20 Wamluwili atami na wala lipindi litali nesu, ila apalili ng'ogha. 21 Paawelili anguhuka, alongili, "Sapanga akipala nitehika kwa mwenga kangi." Akahuka Efesu kwa whatu.

22 Na mweni paahikili kummbwani Kaisalia, Paulo akayenda Yelusalemu kujambusa konganiko lya wakilisito kula. Hinu akayenda Anitiokia. 23 Atamili kula lipindi liyaghani, hinu akayendelela na mwanja kwa kupitila mmbwani wa Galatia na Fulugia akiwataya moyu wavulwa wogha.

24 Ku machuwa ghala, Myahudi mmonga, lihina lyaki Apolo, muwelekwa wa mmbwani wa Alekisandilia, ahikili kummbwani Efesu. Awelili mundu mweni uweso wa kulongela na mweni kumanya nesu mayandiko. 25 Mundu hayu awelili kavulwa njila gha Bambu, na mweni atangasili kwa makakala nesu na kuvula kwa uchakaka Habali zya Yesu. Ila awelili akimanya hela ubatiso wa Yohana. 26 Pilisila na Akula pawamyoghanilili akilonga akiva na holu ng'ogha mghati gha lighuta lya kukonganika wayahudi, wakayenda na mweni ukaya kwa weni na kumvula njila gha Sapanga kwa uchakaka nesu. 27 Hinu Apolo akalamula kuyenda kumahala wapakema Akaya, wala walongu wa Efesu wamtayili moyu kwa kuwayandikila wavulwa kula mahala wapakema Akaya wampokeli. Paahikili kula, awelili mtanga nesu kwa wala wawelili wamkwinila Sapanga kwa ulungwana wa Sapanga, 28 Kwaikiva kwa uweso mkulunga awangingamili Wayahudi kuluagha akihighilisa kwa Mayandiko gha Sapanga yiwa Yesu ndiwa Kilisito mkombola.