1 Haku kaisalia, kuwelili na mundu mmonga lihina lyaki Kolinelio. Mweni awelili mkulu wa lipinga lya watovangondo wa kilumi walikema "Lipinga lya Italia." 2 Awelili mundu wa maha, na mweni pamonga na walongo ghaki wogha wamtundamila Sapanga, awelili angughola vindu vitangala kuwatanga wandu wavile na hindu ng'ogha na awelili angumtundamila Sapanga machuwa yayendelela. 3 lichuwa limonga saa itisa pamuhi, alolili mawonu lipala lipala mtumikila wa kundumba wa Sapanga akiyingila mghati na kumlongela, "Kolinelio!"

4 Kolinelio akamtumbulilila mihu hayu mtumikila wa kundumba wa Sapanga kwa holu, akamkonya, "Bambu, kuvile na kyani?"

Yula Mtumikila wa kundumba wa Sapanga akamyanga, "Sapanga kayoghanila mayupo ghako na mapegho ghako kwa wandu wavile na hindu ng'ogha hinu kakukumbwike. 5 Hinu, uwayeghi wandu Yopa wayendi kumkema mundu mmonga lihina lyaki Simoni hilahila wangumkema Petelo. 6 Mweni angulikala ukaya kwa Simoni mghola hindu gha ngosi yula lighuta lyaki lipabehi na bahali." 7 Yula mtumikila wa kundumba wa Sapanga awelili akilongela na mweni paahuka Kolinelio akawakema watumikila ghaki waivili wa ukaya, na mtovangondo mmonga awelili akimtundamila Sapanga na avile amonga gha wala wamtumikilili. 8 Akawalongela hyogha yahumilili, hinu akawalaghila wayendi kummbwani Yopa.

9 Kilau ghaki iwelili handa saa sita pamuhi, wala wandu waitatu wakiva wambila na mwanja, ila wakiva pabehi na kuhika kumbwani Yopa, Petelo akakwela kunani gha lighuta kuyupa. 10 Njala ikamkola, akapala kulyegha mulyo. Ila lipindi wakiteleka mulyo akawonja lughono litopehu akahikilwa na mawonu. 11 Akalola kundumba kugubutuka na hindu handa nguu ngulu inguhuluswa pahi ikiva ikamulilwi pandi zyogha njechi. 12 Mghati gha nguu hila kuwelili na kila mikokolo: mikokolo wavile na maghulu njechi na mikokolo wakukuluhuka na wambongu wa kunani. 13 Hinu akahyoghanila lilowi likimlongela, "Petelo, uyinuki uhinji, ulyeghi."

14 Ila Petelo akayanga, "Ng'ogha Bambu, nenga kuhuma dahile nilyegha ng'ogha hata chochosi wakivalangila yiwa kya maha ng'ogha kulyeghwa."

15 Lila lilowi likahyoghanika kangi likimlongela, "Ukotoho kuvikema vya maha ng'ogha kulyeghwa vindu vila Sapanga kalonga yiwa vya maha kulyeghwa." 16 Mghalu hau uhumilili miyanja itatu, kuulongolo hila nguu ikahuyiswa kunani kundumba.

17 Petelo paawelili akiyendelela kulikangasa na kuikonya haki liki kwa ghala mawonu, wala wandu wayeghilwi na Kolinelio wakalilola lighuta lya Simoni mghola hindu gha ngosi hinu wakagholoka kumlyangu. 18 Wakakema wakakonya wakalonga, "Ghuli baha, kuvile na mhenja mghati hamu yula wangumkema Simoni au lihina ghangi Petelo?"

19 Petelo paawelili akiyendelela kuliwachila amanyi kyani haki kwa yala mawonu, bahala Mpumulo wa Sapanga akamlongela, "Uyoghanili pavile na wandu waitatu baha, wangukuhakula. 20 Hinu, ugholoki na uhuluki kuhuma kunani gha mlighuta uyendi pamonga na wala ukotoho kuvile na holu kwaikiva nenga niwalaghila." 21 Hinu Petelo akahuluka pahi na kuwalongela wala wandu, "Nenga ndiwa mngunihakula. Kwa kyani mhika?"

22 Weni wakamyanga, "Mkulu wa lipinga lya watovangondo imia wamkema Kolinelio katuyegha na mweni ni mundu wamaha, myupa Sapanga na kutundamilwa kuulongolo gha Wayahudi wogha, Alongililwi na mtumikila wa kundumba wa Sapanga uyendi ukaya kwa mweni ili kuhyoghanila milandu ghako." 23 Petelo akawapokela mghati, akawapegha mahala pakuwonja uhiku hula.

Kilau ghaki, Petelo akatumbula mwanja pamonga naweni, na amonga gha wakwinila ghangi wa kula Yopa wakonganili namweni. 24 Lichuwa lya ivili wahikili ku Kaisalia na kula Kolinelio awelili anguwalindila pamonga na walongo na waghanja awelili kawakema wahiki. 25 Petelo paawelili anguyingila, Kolinelio akahuma panji kumlola, akaguwa kifulifuli. 26 Ila Petelo akamyinula, akamlongela, "Gholoka, kwaikiva hata nenga ni mundu hela." 27 Petelo ayendelelili kulongela na Kolinelio akiva anguyingila mulighuta akalola wandu watangala walikungula. 28 Akawalongela, "Mwenga mngumanya lipala yiwa Myahudi yeyose kakaniswa na laghililo ghaki gha dini kukongana na wandu Wayahudi ng'ogha ila Sapanga kanilongela yiwa nikotoho kumuwachila mundu yeyosi yiwa kalemwa na Sapanga au wamaha ng'ogha. 29 Kwaikiva gha nagha, pamnikema nikahika kwa kulema ng'ogha. Hinu ninguwakonya kwa kyani mnikema."

30 Kolinelio akalonga, "Ni handa machuwa njechi yapiti lisaa handa hali, lisaa itisa pamuhi, niwelili nikiyupa kukyumba. Bwitu, mundu awelili amevala nguu mbulete pee akagholoka kuulongolo gha nenga, 31 namweni akanilongela, ‘Kolinelio! Sapanga kayoghanila mayupo ghako na kakukumbwike kwa kutanga wandu wavile na hindu ng'ogha. 32 Hinu umlaghili mundu ayendi kumbwani Yopa akamkemi mundu mmonga wamkema Simoni, kwa lihina ghangi Petelo, kalikala mulighuta gha Simoni mundu wa kughola hindu gha ngosi angulikala pabehi na bahali.’ 33 Na palapala nikayegha wandu kwa wenga, na wenga ughola maheli kuhika. Hinaa twenga wogha twakuulongolo gha Sapanga kwa kuhyoghanila mighalu hyogha Bambu akulaghilili utulongeli."

34 Baha Petelo akatumbula kulonga, "Hinaa nimanya yiwa chakaka Sapanga kahela ubaghulo. 35 Ila Sapanga angumpokela mundu yoyosi yula angughola yala ghamaha. 36 Mwenga mngumanya yiwa Sapanga alaghilili wandu ghaki kuwatangasila Waizilaeli Habali Maha, yiwa wapati kuponga kuhuma kwa mweni kwa kupitila Yesu Kilisito yula avile ni Bambu wa wogha. 37 Mwenga mngumanya mghalu uhumilili ku Yudasia hyogha kutumbula ku Galilaya Yohanapakayomola kuwatangasila wandu ujumbi ghaki wa ubatiso. 38 Mngumanya Yesu wa Nazaleti na vila Sapanga kamhaghula kwa kumpegha Mpumulo ghaki na uweso. Sapanga awelili pamonga namweni, mweni atyangili kula na kula akighola ghamaha na kuwalamisa wogha wawelili wahakilwa na makakala gha Lihyukana. 39 Twenga twa wandu tulola kwa mihu gha twenga weni mighalu hyogha agholili kumlima wa Wayahudi na ku Yelusalemu. Wamkomili kwa kumvamba kumsalaba. 40 Ila Sapanga amhindulili machuwa gha itatu, akamghola awoneki, 41 kawoneka ng'ogha kwa wandu wogha, ila kwa twenga tulola kwa mihu gha twenga weni tuhaghulilwi na Sapanga. Ni twenga tulyeghili na kunywegha pamonga na mweni badili gha kuhinduka kwa mweni. 42 Atulaghilili kuitangasa Habali Maha kwa wandu wogha na kulongela yiwa mweni ndiwa ahaghulilwi na Sapanga aweli mlamula wa wavile wakomu na wahovili. 43 Walota wa Sapanga wogha wangumtangasa Yesu yiwa kila mundu atemkwinila atelekeselwa mahakata ghaki hyogha kwa lihina lyaki."

44 Lipindi Petelo paawelili anguyendelela kulonga milandu hila, Mpumulo wa Sapanga akawahulukila wogha wawelili wanguyoghanila ujumbi hula. 45 Wala Wayahudi wakwinilili wahikili pamonga na Petelo kuhuma Yopa wakangasili kulola yiwa Sapanga kawaghulusilila hupo gha Mpumulo ghaki wandu Wayahudi ng'ogha kangi. 46 Kwaikiva wawayoghanilili wakilonga kwa luga wekaweka wakimyupa Sapanga. Baha Petelo akalonga, 47 "Wandu hagha wampokela Mpumulo wa Sapanga handa twenga baha tumpokelili. Ghuli, kuvile na mundu yoyosi atewesa kuwakanisa wakotoho kubatiswa kwa masi?" 48 Hinu akalaghila wabatiswi kwa lihina lya Yesu Kilisito. Hinu wakamluwa Petelo alikali na wala kwa machuwa mayaghani.