1 Paulo na Balinaba pawahikili kummbwani Ikonia, wakayingila hilahila kulighuta lya kutundamila Wayahudi. Mula wakatangasa hata lipinga likulunga lya wayahudi na wandu Wayahudi ng'ogha wakakwinila. 2 Ila wayahudi ghangi wala wakwinila ng'ogha wakawapapusa wala Wayahudi ng'ogha na kuwavikila mawachilo mahakata kumioyu ghao ili wawangingami wala walongu. 3 Hinu Paulo na Balinaba watamili Ikonia kwa lipindi litali. Walongelili kwa makakala nesu habali gha Bambu. Na mweni awapeghili uweso wa kughola mkangaso na vilaghihi. Na kwa njila hai ahighilisili yiwa ujumbi wautangasili kwa ulungwana ghaki uwelili wa chakaka. 4 Wandu wammbwani hula wakapalaghanyika, Wamonga wakawela upandi wa Wayahudi na ghangi upandi wa wandumindumi.

5 Mwihu, wandu wamonga Wayahudi ng'ogha na Wayahudi, wakighola pamonga na wakulu ghao, wavikili lukani lya kuwaghola mahakata hagha wandumindumi na kuwatova maganga. 6 Wandumindumi pawamanyili mghalu hau, wakahukila ku Lisitila na Delibe, mimbwani gha Lukoania, na kumahala pabehi na pala, 7 wakiva wangutangasa Habali Maha kula.

8 Kuwelili na mundu mmonga kula Lisitila avile kawela mlemafu wa maghulu kuhuma kuuwelekwa, na kawesa ng'ogha kutyanga. 9 Mundu hayu awelili angumhyoghanila Paulo paawelili angutangasa. Paulo amlolili kwa maheli, na paalolili yiwa kana ukwinila wa kuwesa kulamiswa, 10 Paulo akalonga kwa lilowi likulunga, "Gholoka kwa maghulu ghako." Hayu mundu awelili mlemafu wa maghulu akayinuka na kujumba akatumbula kutyanga. 11 Lipinga lya wandu pawalolili vila agholili Paulo, watumbulili kutova lilowi kwa luga gha Kilukanio, "Milungu ituhikilila ikiva kumihigha gha wandu." 12 Balinaba wakamkema Zeu, na Paulo, kwa vila mweni ndiwa awelili angulonga, wakamkema Helimesi. 13 Na mweni mtambika wa lighuta lya Mlungu Zeu liwelili panji gha mmbwani akayegha ng'ombi makambaku na mapambu gha uluwa kuulongolo gha mlyango mkulu wammbwani, na mweni pamonga na lila lipinga lya wandu akapala kuwatolela litambiku wandumindumi.

14 Ila Balinaba na Paulo pawayoghanilili habali hila, wakalakatula nguu zyao na kubhutuka mbilo ku lila lipinga lya wandu wakilonga kwa lilowi likulunga, 15 "Walongu, kwa liki mngughola mighalu handa hagha? Twenga hilahila ni wandu handa mwenga, Na twa baha kuwatangasila Habali Maha, muwesi kuleka havi vindu vya kuhongola mkamhyukile Sapanga avile mkomu, yula agholili kundumba na mlima wogha, na bahali na vyogha vya mghati. 16 Kula dahile Sapanga awalekili wandu wavile Wayahudi ng'ogha wakovekeli yala wanguyapala. 17 Hata nagha, Sapanga alekili ng'ogha kujihighilisa kwa mighalu maha ghala anguwagholela. Huwahulusila ndonya kuhuma kunani, ili waweli na mabeno kwa lipindi lyake na kuyukwite na kuimemesa mioyu gha mwenga luheku." 18 Paulo na Balinaba wakawesa kulilemesa lila lipinga likotoho kuyegha litambiku kwa weni ila iwelili ng'ogha yuyughu kuwalemesa wakotoho kuwapegha litambiku.

19 Ila Wayahudi wamonga wahikili kuhuma Anitiokia na Ikonia, wakawaghola wandu wakongine na weni, wakamtova maganga Paulo na kumghalahusa na kumkulughula mbaka panji gha mmbwani wakiwachila avile kahova kala. 20 Ila wakwinila pawawelili wakimtindila, akagholoka na kuhuya mghati gha mmbwani. Kilau ghaki mweni pamonga na Balinaba wakayenda mmbwani Delibe.

21 Badili gha Paulo na Balinaba kutangasa Habali Maha kula Delibe na kupokela wakwinila watangala, Hinu wakahuya kummbwani wa Listra, wa Ikonia na wa Anitiokia gha mlima wa Pisidia. 22 Wawapeghili makakala wakwinila wa mimbwani hila na kuwapegha moyu wayendeleli kulikala kuuyitikila. Wakawalongela, "Tungupalwa twenga wogha kupitila kumahakili yatangala ili tuyingili kuunkosi wa Sapanga." 23 Wakawahaghula wandu wakomi kulila lipinga lya wandu wamkwinila Kilisito. Badili gha kuyupa na kuleka kulyegha mulyo, wakawavika pahi gha ugholokela wa Bambu wamyitikilili.

24 Badili gha kupitila kumlima gha Pisidia, wahikili kumlima Pamfilia. 25 Pawayomola kutangasa hula ujumbi kula Peliga, watyangili ku Atalia. 26 Kuhuma kula wakakwela whatu wakahuya Anitiokia ni kula mtumbulo pala dahile wawelili wawatakila highili kwaikiva gha lihengu lya Sapanga livile hinaa waliyomola kala.

27 Pawahikili kula Anitiokia wagholili mkongano wa lipinga lya wandu wamkwinila Kilisito lya mahala pala, wakawapegha habali gha mighalu Sapanga awawesesili kughola, na vila paawawoposolili wandu Wayahudi ng'ogha mlyango wa kuyingila kuukwinila. 28 Wakalikala pamonga na wala wamkwinila Kilisito kwa machuwa yatangala.