1 Kuulongolo gha machuwa mhano, Mtambika Mkulu Anania akahika kumbwani Kaisalia pamonga na wagogolo ghangi na mvula avile mghalambula wa malaghililo mmonga akemilwi Telitulo, wakayenda kwa yula kilongosi wa kubwani Felikisi wakamlongela masitaka ghao ghala wangumsitaki Paulo. 2 Paulo paakemilwi ayingili mghati, Telitulo akatumbula kugubutula masitaka akilonga,

"Mtundamilwa Felikisi, ulongosi ghako wa maheli uyeghili luheku likulunga na kughola wandu wakovekeli yala yavile maha. 3 Tungupegha ushukwile utangala kwa wenga mahala kokosi na kwa njila yeyosi hila. 4 Ila, nipala ng'ogha kukughola utoki, tungukuluwa kwa ulungwana ghako uyoghanile habali zyetu kwa uhupi. 5 Tumanyili yiwa mundu hayu ni mkalakala. Mweni hutumbulisa maghaso paghati gha Wayahudi kila mahala mlima wogha na kangi ni kilongosi wa kila kipinga kya Wanazaleti. 6 Kangi apalili kulighola Lighuta lya Sapanga livile ng'ogha handa Sapanga wa twenga angupala liweli, na twenga tukamkamula. Tupalili kumlamula kwa laghililo lya twenga. 7 Ila Lusia, mkulu wa watovangondo, akahika na watovangondo ghaki, akamtola kwa makakala kuhuma kwa twenga. 8 Ikiva wenga mweni utemkonya konya mundu hayu utewesa kuipatila habali gha mighalu hila hyogha tungumsitaki." 9 Na weni Wayahudi wakajumila wakihighilisa yiwa masitaka hyogha wangumsitaki ni chakaka.

10 Hinu, kilongosi wa kumbwani Felikisi akamlangiha Paulo kwa kilangihi kya kyala ili atumbuli kujitetela na mweni akayanga,

"Nenga ninguhekelela kulitetela kuulongolo ghako bambu nikimanya yiwa uwelili mlamula wa mlima hau kwa machuva matangala." 11 Unguwesa kuhighilisa kwa uyuyuhu yiwa yapitile ng'ogha machuwa ikumi na ivili kuhuma paniyendili kuyupa kumbwani Yelusalemu. 12 Wayahudi waniwonili ng'ogha nikilongelana na mundu yoyosi. Waniwonili ng'ogha nikipapusa wandu mulighuta lya Sapanga, na ng'ogha ku lighuta lya kutundamilila Wayahudi, ng'ogha mahala ghangi kokosi kummbwani hau. 13 Na kangi watewesa ng'ogha kuhighilisa masitaka hagha wangunisitakila yiwa ni chakaka. 14 Ila ningujumila kuulongolo gha wenga yiwa ningumtumikila Sapanga wa mambuyi wa twenga nikikovekela njila hila weni wanguikema ni gha ughwangi. Ila kangi ninguyitikilana na mighalu hyogha yayandikilwi kuvihitabu vya laghililo na Walota. 15 Na nenga ninguikwinilila Sapanga, na weni wavile na ukwinila hau hau, yiwa wandu wa maha na wahakata watehinduka. 16 Kwa nagha ningughola vila ingupalwa kulikala kogha nilikala kwa umaha kuulongolo gha Sapanga na kuulongolo gha wandu.

17 "Hinu kwa vila niwela ng'ogha baha kwa machuva yatangala nihikili ku Yelusalemu ili kuwayeghela wayangu wa mlima ghangu mtanga na litambiku. 18 Lipindi paniwela nikighola hagha ndiwa wakanilola mulighuta lya Sapanga, niwelili nijighulula kala na niwelili ng'ogha na lipinga lya wandu hata maghaso. 19 Ila kuwelili na Wayahudi ghangi kuhuma kumlima Asia, weni ndiwa wapalilwi kuhika baha kuulongolo ghako na kutola masitaka ghao handa nivile na chochosi kya kunisitaki. 20 Au, waleki hagha wandu wavile baha walonge uhakata waulolili kwa nenga panigholoka kuulongolo gha njengakaya lyao ngulu. 21 Ila milandu hai weka niilongile paniwela kunjengakaya ghao ngulu, ‘Mngunilamula lelo kwaikiva ningukwinila yiwa wahovili watehinduka.’"

22 Felikisi mweni baha alekili kughola chochosi kwaikiva amanyili habali zya Njila hila kwa umaha nesu, akalonga, "Lisia Mkulu wa watovangondo paahika haku nitelamula masitaka gha mwenga." 23 Hinu Felikisi akamlaghila yula mtovangondo amviki pahi gha ugholokela Paulo ila akotoho kumwopa na minyololu, na uwaleki waghanja ghaki Paulo wawesi kumlola na kumtanga chochosi angukipala.

24 Machuwa mayaghani kuulongolo, Felikisi akahika pamonga na mdala ghaki wamkema Dulusila, mweni awelili Myahudi, akalaghila Paulo ayeghwi, na Felikisi akahyoghanila Paulo akilonga habali zya kumkwinila Kilisito Yesu. 25 Ila Paulo paatumbulili kulongela mighalu gha Kughola kwa ubaghula ng'ogha na kangi kuwela na uweso wa kujikanila mweni kupala hindu na vilavila lichuwa lya Sapanga kulamula wandu wogha palihika, Felisi akatila, akalonga uleki huti, "Nitekukema kangi kwa hinaa unguwesa kuyenda." 26 Lipindi lilalila Felikisi awelili anguwachila yiwa Paulo angempegha swinda. Hinu akawela akimkema mkema lipindi lyogha akilongela na mweni.

27 Payapitile machuva maivili, Polikio Fesito akampokela Felikisi alongose mweni. Felikisi akipala kuwahekelesa Wayahudi akamleka Paulo kuuwopwa.