1 Wandumindumi na wakwinila Yesu kula Yudasia wayoghanilili yiwa wandu Wayahudi ng'ogha na weni wawelili wapokela lilando lya Sapanga. 2 Hinu, Petelo paahuya Yelusalemu, wandu wamkwinila Yesu wala wawelili wayingila jandu, wakampingika Petelo wakilonga, 3 "Wenga uyendili kutama na wandu wayingila jandu ng'ogha na hata ulyeghili pamonga na weni!" 4 Baha Petelo akawalongela kwa umaha yala yagholekili kuhuma mtumbulo.

5 Akalonga, "Nenga niwelili kummbwani Yopa nikiyupa. Hinu nikakolwa na lughono, na nenga nikapokela mawonu. Nikalola lighololi likihuluka kuhuma kundumba, likolwili kweni pandi zyaki njechi. Likavikwa pabehi na nenga." 6 Panishughulila mghati ghaki kwa upabehi nikalola wakokolo wavile na maghulu njechi, wakokolo wa kumwitu, na wakokolo wa kukulughuka na wambongo wa kunani. 7 Hinu nikayoghanila lilowi likinilongela, "Petelo uyinuki, uhinji, ulyeghi." 8 Ila nenga nikayanga, "Ng'ogha, hata mayaghani, ee Bambu! Mghati gha mlomo wa nenga kuyingila chochosi kikaniswa na Sapanga na kipalwa ng'ogha kulyeghwa." 9 Lila lilowi likahyoghanika kangi kuhuma kundumba, "Ukotoho kukikema kindu chochosi kivile kipalwa ng'ogha kulyeghwa kindu kila Sapanga kalonga kya maha kulyeghwa wenga ukakikema yiwa kya maha ng'ogha kulyeghwa." 10 Na hagha milandu ikahyoghanika kangi mihanja itatu, hinu vindu vyogha vikahuyiswa kundumba. 11 Bwitu, wandu waitatu wawelili walaghilwa kwa nenga kuhuma Kaisalia wakahika na kugholoka kulighuta niwelili nikilikala. 12 Mpumulo wa Sapanga akanilongela niyendi pamonga na wala na nikotoho kuwela na holu. Hagha walongu isita wakonganili na nenga kangi kuyenda Kaisalia na kula tuyingilili ukaya kwa Kolinelio. 13 Kolinelio atulongelili vila kamlola Mtumikila wa kundumba wa Sapanga kagholoka ukaya ghaki na kumlongela, "Myeghi mundu Yopa akamkemi mundu mmonga akemilwi Simoni, kwa lihina ghangi Petelo." 14 "Mweni atekulongela milandu hyogha itekupala wenga na walongu ghako wa mlighuta ghako ili muwesi kulokoka." 15 Na nenga panitumbula kulongela, Mpumulo wa Sapanga awahulukilili handa atuhulukilili twenga pala mtumbulo. 16 Ndiwa nikumbwikili milandu hila Bambu alongelili, "Yohana abatisili kwa masi, ila mwenga mtebatiswa kwa Mpumulo wa Sapanga." 17 "Hinu ikiva Sapanga awapeghili wala wandu Wayahudi ng'ogha hupo na ndiwa handa haihai atupeghili na twenga patumkwinila Bambu Yesu Kilisito, nenga ni ghani hata niwesi kumkingama Sapanga?"

18 Wala walongo wakwinila pawayoghanila milandu hagha, wakaleka kungingama na kumkwilikiha Sapanga, wakilonga, "Chakaka Sapanga awapeghili hata wandu Wayahudi ng'ogha hilahila lukani wawesi kuleka sambi na kupokela ukomu wa machuwa hyogha."

19 Hinu wakwinila wapaghanyikile kwaikiva gha mahakilo yahumilili na kihu kya Sitefano, wayendili kutali mbaka ku Foinike na ku Kipulo na ku Anitiokia na weni wawelili wakitangasa lila lilando kwa Wayahudi hela. 20 Ila amonga gha wakwinila wahumili ku Kipulo na Kilene, wayendili ku Anitiokia wakautangasa hula ujumbi kwa wandu Wayahudi ng'ogha wakilongela Habali Maha gha Bambu Yesu. 21 Makakala gha Bambu yawatangili na lipinga likulunga lya wandu wakwinilili na kumhyukila Bambu.

22 Habali gha mghalu hau uyoghanililwi kulila lipinga limkwinila Kilisito wa Yelusalemu. Nagha wakamlaghila Balinaba ayendi Anitiokia. 23 Paahikili kula na kulola vila Sapanga awahighilili wala wandu, ahekilelili na kuwalongela wogha wayendeleli kumkwinila Bambu kwa mioyu ghao hyogha. 24 Balinaba awelili mundu wa maha na alongoswili na Mpumulo wa Sapanga na mweni kukwinila nesu. Lipinga likulunga lya wandu likweghilwi kwa Bambu.

25 Hinu, Balinaba ayendili Taso kumhakula Sauli. 26 Paamlolili Sauli, akamyegha Anitiokia. Na wogha waivili wakalikala na lila lipinga lya wakwinila Kilisito kwa lichuva lyogha wakilivula lipinga likulunga lya wandu. Ni kula Anitiokia ndiwa pavile wavulwa kwa lihanja lya mtumbulo kukemwa kwa lihina lya Wakilisito.

27 Lipindi halihali, walota wa Sapanga wamonga wahikili Anitiokia kuhuma Yelusalemu. 28 Hinu, mmonga ghao angukemwa Agabo agholokili, na kwa uweso wa Mpumulo wa Sapanga akalongela ghala yategholwa na Sapanga kuulongolo yiwa kutewela na njala ngulu kumlima wogha. Njala handa hai ihumilili lipindi lya ulongosi wa Kilaudio. 29 Wala wavulwa wakalamula yiwa kila mmonga kwa uweso ghaki ayeghi chochosi ili kuwatanga wala wakwinila wawelili wangutama ku Yudasia. 30 Hinu, wakaghola havi kwa kuwapegha Balinaba na Sauli hila hupo wayeghi kwa wagogolo wa lipinga lya wandu wamkwinila Kilisito.