1 Hinu, amonga gha wandu wahikili Anitiokia kuhuma Yudasia wakatumbula kuwavula wala wamkwinila Kilisito wakilonga, "Ikiva myingila jandu ng'ogha kuyendana na mavulo handa alaghilili Musa, mtewesa ng'ogha kulokolwa." 2 Hinu Paulo na Balinaba wakakingama na kusindana nesu na wala kwa mighalu hila. Na kwa nagha wavulwa wakalaghila Paulo na Balinaba pamonga na wandu ghangi paghati ghao wayendi Yelusalemu kulongela na wandumindumi na wagogolo wa lipinga lya wandu wamkwinila Kilisito kwa milandu hila.

3 Hinu Lipinga lya wandu wamkwinila Kilisito lya ku Anitiokia wakawalaghila, Paulo na wayaki na weni wakapitila kumlima Foinike na ku Samalia. Na kula wakawalongela vila wandu Wayahudi ng'ogha wamkwinila Yesu. Habali hai ikahekelesa nesu walongu wogha wamkwinila Yesu. 4 Pawahika ku Yelusalemu wapokelilwi na lipinga lya wandu wamkwinila Kilisito, wandumindumi na wagogolo na weni wakawapegha habali hyogha Sapanga ayagholili pamonga na weni. 5 Ila wavulwa ghangi wawelili wa lipinga lya Mafalisayo wagholokili, wakalonga, "Ingupalwa wandu Wayahudi ng'ogha wayingili jandu na kuvulwa kulikovekela laghililo lya Musa."

6 Hinu wandumindumi na wagogolo wa lipinga lya wandu wamkwinila Yesu wakakonganika ili walolesi mghalu hula. 7 Badili gha malongelano yatangala, Petelo akagholoka na kulongela, "Walongu wa nenga, mngumanya yiwa Sapanga anihaghulili machuwa gha mtumbulo paghati gha mwenga lukani nitangasi Habali Maha kwa Wayahudi ng'ogha wawesi kuhyoghanila na kumkwinila Bambu Yesu Kilisito. 8 Na mweni Sapanga angumanya mioyu gha wandu, ahighilisili yiwa kawapokela kwa kuwapegha Mpumulo wa Sapanga handa atupeghili twenga. 9 Sapanga kaghola ng'ogha uhaghulo wowosi paghati gha twenga na weni, alekeselili mahakata ghao kwaikiva wamkwinila. 10 Hinu hinaa, kwa kyani kumyesa Sapanga kwa kuwapapisa mihigu wala wamkwinila Kilisito hata wambuyi wa twenga na twenga tuwesa ng'ogha kupapa? 11 Ingupalwa ng'ogha kuvile nagha, ila tungukwinila yiwa, twenga handa weni, tutelokolwa kwa kupitila ulungwana wa Bambu Yesu Kilisito."

12 Hinu mkongano wogha ukatama nuu ukiyoghanila milandu gha Balinaba na Paulo pawawelili wakilongela vila Sapanga agholili kwa kupitila gha weni paghati gha wandu Wayahudi ng'ogha. 13 Na wala pa wayomolili kulongela, Yakobu akayanga, akilonga, "Walongo wanenga mniyoghanile. 14 Simoni katulongela vila Sapanga pala mtumbulo kawagholela mighalu gha maha wandu Wayahudi ng'ogha, akahaghula wamonga ghao wavile wandu ghaki. 15 Na mghalu hau ungulandana nesu na milandu gha walota wa Sapanga handa iyandikwa.

16 Bambu angulonga nagha, ‘Badili gha kupiti mighalu hagha nitehuya,

na kuchenga kangi lila liboma lya Daudi liguwili,

nitechenga maboma gha dahile yaguwili na niteghola yavile maha. 17 Pala wandu ghangi wogha watehika kwa nenga,

wandu Wayahudi ng'ogha niwakema wavile wa nenga watenikovekela nenga Bambu. 18 Angulonga Bambu yula agholayi mighalu hyogha kuhuma dahile.’ "

19 Yakobu akayendelela kulonga, "Hau ndiwa ulamula ghangu, tukotoho kuwaghasa wandu Wayahudi ng'ogha wala wangumhyukila Sapanga kwa kuwalongela wakovekeli mighalu gha twenga tuighola kila lelo." 20 Ila ingupalwa tuwayandikile lihamba kwa kuwalongela yiwa wakotoho kulyegha mulyo ukaniswa na Sapanga kwa kuyeghwa handa litambiku na milungu gha kuhongolwa, walikali kutali na ngongola na wakotoho kulyegha likokolu lolosi lihinjwa ng'ogha kangi wakotoho kunywegha mwahi. 21 "Kwaikiva kwa lipindi litali milandu gha Musa iwelili ikitangaswa mahala wekaweka mmbwani na kusomwa ku maghuta gha kutundamila Wayahudi kila lichuwa lya kupumulila."

22 Wandumindumi na wagogolo na lighuta lyogha wapalili kuwahaghula wandu wamonga paghati gha weni na kuwayegha Anitiokia pamonga na Paulo na Balinaba. Hinu, wakamhaghula Yudasi akemilwi Balisaba, na Sila wavile wogha wawelili wangumanyikana nesu paghati gha walongu. 23 Wakawalaghila na lihamba ingulonga,

"Twenga wandumindumi na wagogolo, na walongu wa mwenga, tunguwajambusa mwenga walongu Wayahudi ng'ogha mvile haku ku Anitiokia, na Silia na Kilikia. 24 Tuyoghanilili yiwa wandu wamonga kuhuma haku kwa twenga wawakologhanyilili kwa milandu ghao, wakaivika mioyu gha mwenga ku holu. Ila wagholili hali laghililo kwa kuyeghwa ng'ogha na twenga. 25 Nagha, tulamulili kwa pamonga kuwahaghula wandu ghangi na kuwayegha kwa mwenga pamonga na wapalwa wa twenga Balinaba na Paulo, 26 wandu wayitikilili kwa kuvika ukomu ghao hata kukuhova kwaikiva gha kumtumikila Bambu wa twenga Yesu Kilisito. 27 Kwa nagha, tunguwayegha Yudasi na Sila kwa mwenga, na weni watewalongela yala tuyaandikili. 28 Hinu, Mpumulo wa Sapanga na twenga tuyitikila tukotoho kuwapapisa mihigu mitopehu ipiti hagha wangupalwa kuyaghola. 29 Mkotoho kulyegha mulyo utambikilwa kwa kuyeghwa handa litambiku na milungu gha kuhongolwa, mkotoho kunywegha mwahi, mkotoho kulyegha likokolo lipopotolwa na waleki ungongola. Mteghola maha nesu ikiva mtehyeta kughola mighalu hagha. Wasalaam."

30 Badili gha kuwataula, wala wajumbi wakahuka na kuyenda kumbwani Anitiokia. Kula wakawakema lipinga lyogha lya wakwinila, na wakawapegha lihamba hila. 31 Pawaisomili hila lihamba, milandu ghaki ikawapegha moyu, wakahekelela nesu. 32 Yudasi na Sila, na weni wawelili walota wa Sapanga, hinu wakalongela na wala walongu kwa lipindi litali wakiwapegha moyu na kuwachenga kuukwinila. 33 Na badili gha kulikala kula kwa lipindi litenu, walongu wa Anitiokia wakawataula kwa upalo, hinu wakahuya kwa wala wawelili wawalaghila. 34 Ila Sila akalola ni maha kuyendelela kulikala kula.

35 Paulo na Balinaba waghihalili kula Anitiokia kwa lipindi, wakavula na kutangasa lilando lya Bambu, pamonga na wandu ghangi watangala.

36 Badili gha machuwa mayaghani, Paulo akamlongela Balinaba, "Tuhuyi hinaa tukawatyangili walongu kumimbwani mula tutangasilili lilando lya Bambu, tukawalole vila wanguyendelela." 37 Balinaba apalili wayendi pamonga na Yohana, amanyika hilahila kwa lihina lya Maliku. 38 Ila Paulo apalili ng'ogha kuyenda na Maliku, kwaikiva awelili kalekana na weni kula Pamfilia alemili kuyendelela kughola lihengu na weni. 39 Kwa nagha Paulo na Balinaba wakasindana nesu hata wakalekana. Balinaba akahuka pamonga na Maliku, wakayingila mghati gha whatu na kuyenda ku Kupulo. 40 Na mweni Paulo akamhaghula Sila, na akahuka badili gha walongu kuwayupila highili gha Bambu iyendi pamonga na weni. 41 Ku mwanja hau Paulo akapitila ku mimbwani gha Silia na Kilikia, akiyataya makakala mapinga gha wandu wamkwinila Yesu.