1 Hinu, nkosi Agilipa akamlongela Paulo, "Hinaa unguwesa kulitetela" ndiwa Paulo akalangigha liwoko na kutumbula kulitetela, akilonga,

2 "Nkosi Agilipa, ningujilola mundu avile na manemu lelo kulitetela kuulongolo gha wenga kumighalu hyogha nisitakilwi na Wayahudi." 3 Kangi kwa vila wenga mwenibaha ungumanya maha nesu mighalu gha dahile gha Wayahudi na mabisano ghao, ningukuluwa uniyoghanili kwa kunivumilila.

4 "Wayahudi wangumanya habali zya kulama kwa nenga kuhuma uwana, vila nilikala kuhuma mtumbulo kumlima ghangu na haku Yelusalemu." 5 Wangunimanya kwa machuva ngenju, na wanguwesa kulongela, ikiva wangupala, kwaikiva kuhuma dahile nilikalili handa mmonga wa kipinga kya wandu wangujitola nesu kukovekela malaghililo gha Sapanga mudini gha twenga, hinu nitamili handa Mfalisayo. 6 Hinaa nivile baha nilamulwe kwaikiva ninguyitikila lila lilaghano Sapanga awalaghilili watati wa twenga. 7 Hali ndiwa lilaghano livile makabila gha twenga ikumi na ivili wanguwachila kulipokela kwa kumtumikila Sapanga kwa makakala uhiku na pamuhi Ee Nkosi na mghalu hau ndiwa ungunighola lelo nilamulwe na wayahudi. 8 Kwa kyani mwenga mnguyitikila ng'ogha yiwa Sapanga anguwesa kuwahindula wandu?

9 "Kwa chakaka nenga mwenibaha nikweghilwi kughola mighalu ngenju kulikingama lihina lya Yesu wa Nazaleti." 10 Mighalu hagha ndiwa niigholili kula Yelusalemu. Nenga mwenibaha, nipeghilwi uweso kuhuma kwa watambika wakulu, na nikawavika mulighuta lya wawopwa wandu watangala wa Sapanga. Na lipindi pawalamulwa wahovi nenga niyitikilili yiwa wangupalwa wahovi. 11 Miyanja itangala niwagholili watovwe kumalighuta gha kutundamila Wayahudi hyogha nikiwaghola kwa makakala waleki kukwinila. Lilaka ghangu kwa weni liwelili likulunga hata nikawahakula mbaka mimbwani gha kutali.

12 "Lichuwa limonga paniwelili kuimonga gha miyanja hila nikiva ninguyenda Damasiki, nikiva nipeghwa uweso na laghilo kuhuma kwa mtambika mkulu." 13 Mkulu Nkosi, lipindi paniwelili munjila, lisaa isita pamuhi, nilolili mhana mkulunga upitile wa lijuwa ukilangasa kuhuma kundumba, ukanitindila nenga na wala wayangu wawelili mumwanja na nenga. 14 Twenga wogha tukagua pahi, na nenga nikayoghanila lilowi likinilongela kwa Kiebulania, "Sauli, Sauli! Kwa kyani ungunihakila? Ni yuyughu ng'ogha kuutova mhomu." 15 Nenga nikakonya, "Ni ghani wenga Bambu?" Namweni Bambu akayanga, "Nenga ni Yesu avile wenga ungunihakila." 16 Hata nagha, hinaa uyinuki, gholoka kwa maghulu ghako. Kwaikiva nikuhumila lukani, nikuvike utumikile kulongela mighalu ivile uyalola na ghala nitekuwonesa. 17 Nitekulokola na wandu wa Izilaeli na wandu Wayahudi ng'ogha wala nenga ningukuyegha kwa weni, 18 "Utewamanyisa na kuwawesesa wahuki kulwiha na kuyingila kumhana, wahuki kuulongosi wa Lihyukana na wamhyukile Sapanga, ili kwa kuniyitikila, wawesi kulekeselwa mahakata na kupokela ulihi paghati gha wala Sapanga kawahaghula."

19 "Hinu, Nkosi Agilipa, niwesili ng'ogha kuleka kuyaghola yala mawonu Sapanga kanilolesa kuhuma kundumba. 20 Ndiwa nitumbulili kutangasa kwa kutumbula na wandu wa Damasiko, na kangi kwa wala wa Yelusalemu na mmbwani wogha wa Yudasia, na kangi kwa Wayahudi ng'ogha. Niwalongelili yiwa wangupalwa wamuhyukile Sapanga na kuwonesa kwa matendu yiwa waghalambula kala mioyu ghao. 21 Kwaikiva gha hagha, Wayahudi wakanikamula panivile mu Lighuta lya Sapanga na wakayesa kunikoma. 22 Ila Sapanga anitangili na nagha mbaka lelu nigholoka kwa makakala nikilongela vila nilolili kwa wogha, wakulu na wanung'una. Ningulongela ni yala yavile walota wa Sapanga na Musa walongili yatehumila, 23 yiwa impalili Kilisito ahakilwi na kuwela wa mtumbula kuhinduka kuhuma kukihu, ili atangasi yiwa hinaa mhana wa ukombola unguwalangasila wandu wogha, Wayahudi na Wayahudi ng'ogha."

24 Paulo paakiyendelela kuitetela, Fesitusi akalonga kwa lilowi likulunga, "Paulo, wenga uvile na lukwali! Kusoma kwa wenga kutangala kungukutaya ulukwali!"

25 Ila Paulo akalonga, "Mtundamilwa Fesitusi nivile ng'ogha na lukwali. Kila ningulongela ni chakaka na kyenikumanyika. 26 Wenga nkosi Agilipa ungumanya mighalu hagha, kwa nagha nahela holu hinu ninguwesa kulongela kuulongolo ghako. Kwaikiva hagha hyogha ni gha chakaka na yagholeka ng'ogha kwa kuhigha. 27 Nkosi Agilipa, ghuli, unguwamanya walota wa Sapanga wenga? Namanya yiwa unguwamanya."

28 Nkosi Agilipa akamyanga Paulo, "Unguliwachila kwa milandu hai mayangani utenighola nivile Mkilisito?"

29 Paulo akamyanga, "Namluwa Sapanga ivile kwa lipindi mayaghani au ngenju, ng'ogha wenga hela hata wogha wanguyoghanila lelu wawesi kumkwinila Yesu handa nenga, ila wakotoho kuwela na minyololu hai."

30 Hinu, Nkosi Agilipa pamonga na mkulu wa mmbwani Fesitusi, na Belinike na wala wogha wawelili pamonga na weni, wakagholoka. 31 Pawawelili wakihuka, wakalongelana "Mundu hayu agholili ng'ogha kindu kingumpala ahovi au kihungo." 32 Nkosi Agilipa, akamlongela Fesitusi, "Mundu hayu angewesa kulekwa ayendi, handa kaluwa ng'ogha masitaka ghaki yayoghanilwi na Kaisali Nkosi mkulu wa Loma."