1 Paulo ahikili Delibe na Lisitila, kuwelili na myitikila mmonga akemilwi Timoseo. Nyongo ghaki awelili Muyahudi, na mweni awelili akwinila ila tati ghaki awelili Mgiliki. 2 Timoseo akwinililwi na wala walongu wa Lisitila na Ikonia. 3 Paulo apalili Timoseo walongolani na mweni mmwanja, kwa nagha amyingilisili jandu. Agholili nagha kwaikiva Wayahudi wogha walikalili pandi zila wamanyili yiwa tati ghaki Timoseo awelili Mgiliki. 4 Pawawelili wangutyanga kumimbwani wawapeghili wandu yala malaghililo wapeghilwi na wandumindumi na wagogolo wa wandu wamkwinila Yesu Kilisito kula Yelusalemu, na wakawaluwa wayakoli. 5 Nagha, yala mapinga gha wandu wamkwinila Kilisito yaendelelili kuvile na makakala kuukwinila, na lipinga lya wakwinila liyongesekili kila lichuwa.

6 Paulo na wayaki wapitila kumimbwani gha Fulugia na Galatia, wakiva walemeswa na Mpumulo wa Sapanga wakotoho kutangasa Habali Maha kula Asia hyogha. 7 Pawahika kummbaka gha mmbwani wa Musia, wapalili kuyingila kumumbwani Bitunia, ila Mpumulo wa Yesu kawalongela kawalekesela ng'ogha wayingile. 8 Hinu, wapitili Musia, wakayenda mbaka wakahika kummbwani Tiloa. 9 Lipindi lya uhiku, Paulo akapokela mawonu yavile amwonili mundu mmonga wa Makidonia agholokili pala na kumluwa, "Hubhuka, uhiki Makidonia ututangi." 10 Badili gha Paulo kupokela mawonu ghala, tukaliyandala mwanja kuyenda Makidonia kwa kuloposela, tukijihighilisila yiwa Sapanga atukemili tuwatangasile Habali Maha haku Makidonia.

11 Kuhuma Tiloa, Tuyendili mwanja kwa whatu mbaka ku Samotilake, na kilau ghaki tukagholosa whatu ku Neapoli ili tughuluki. 12 Kuhuma kula tuyendili mwanja wa maghulu mbaka Filipi, mmbwani mkulu wa Makidonia mmbwani hula ulongosilwi na wandu wa Ulumi. Tulikalili kummbwani hula kwa machuwa mayaghani. 13 Lichuwa lya kupumulila tuhumili panji gha mmbwani, tukayenda mmbali gha lweni tukiliwachila ni mahala pa Wayahudi kuyupa. Tutamili pahi, tukalongela na wadala walikungulili mahala pala. 14 Mmonga wa wala watuyoghanilili avile mdala myupa Sapanga akemilwi Lidia mwenikaya wa Tuatila, avile anguwusa nguu zya zambalau. Bambu akaghubutula moyu ghaki hata akapokela hila milandu Paulo avile angulonga. 15 Badili gha hayu mdala pamonga na walongu ghaki kubatiswa, atuluwili tuhiki ukaya kwa mweni akilonga, "Ikiva uchakaka mmlola yiwa nenga ningumkwinila Bambu, mhiki ukaya kwa nenga mkatami." Akatuluwa nesu tuyendi.

16 Lichuwa limonga, patuwela tunguyenda mahala kuyupa, mhinja mmonga awelili na lihyukana limuwesesa kutunga ndunga akongine na twenga. Mhinja hayu awelili anguwaghola wandu wamtumili kughola lihengu lya kutunga ndunga wapokeli mapesa ngoo na hindu ngoo. 17 Hinu, hayu mhinja amkovikilili Paulo na twenga, akitova lilowi na kulonga, "Hagha wandu ni watumikila wa Sapanga avile kunani nesu. Wanguwatangasila njila gha kulokolwa." 18 Awelili angughola nagha kwa machuwa yatangala hata lichuwa limonga Paulo ahyomili, akamhyukila na kumlongela yula lihoka, "Ningukulaghila kwa lihina lya Yesu Kilisito, muhumi hayu." Na lisaa lilalila lihoka likahuka.

19 Wandu wamtumilili yula mhinja pawalolili yiwa ukwinila gha kupokela mapesa kwa weni unguhuka wakawakamula Paulo na Sila wakawakulughula mbaka paluagha, kuulongolo gha walamula. 20 Badili gha kuwayegha kwa vilongosi wa Waloma, wakalongela walamula, "Wandu hagha ni Wayahudi, na weni wanguukologhanya mmbwani wa twenga. 21 Wanguwavula wakolamlima mighalu hila ivile lilaghililo lya twenga wandu wa Loma lingukanila kuhyoghanila na kukovekela." 22 Hinu lipinga lya wandu liwelili pala likatumbula kuwapundangila Paulo na Sila, na weni vilongosi wakalaghila wawawopoli nguu kwa makakala na kuwatova hiyatu. 23 Badili gha kutovwa nesu wakavikwa mghati, na mgholokela wa lighuta lya wawopwa akalaghila kuwavika pahi gha ugholokela mkalipa. 24 Kwa kukovekela malaghilo hagha, yula mgholokela akawavika mukyumba kya mghati nesu kya lighuta lya wawopwa na kuwawopa maghulu ghao ku mahimbati makulunga. Wandu waivili wawopwa maghulu ghao mahimbati makulunga

25 Pabehi na uhiku wa mandandu Paulo na Sila wawelili wakiyupa na kuyimba uyimbo wekaweka wa kumuyinula Sapanga, kunu wawopwa ghangi wakiva wanguyoghanila. 26 Bwitu, kukahumila mhihimu mkulunga wa mlima hata kitumbulo kya lighuta gha wawopwa kikahihimila na palapala milyango hyogha gha muuwopwa ikawopoka na minyololu gha wawopwa wogha ikadumuka na vihungo kuwopoka. 27 Yula mgholokela akayimuka, na mweni paalola yiwa milyango gha lighuta lya wawopwa iwela lipala, akahomola lipanga lyaki ili alikomi, kwa ikiva awachilili yiwa wawopwa wahukili. 28 Ila Paulo akakema kwa lilowi likulunga, "Ukotoho kulikoma mweni kwa ikiva twenga wogha twabaha."

29 Hayu mgholokela akapala limbamba liyeghwi na palihika limbamba, akabhutukila mghati, akajidanga kuulongolo gha maghulu gha Paulo na Sila kunu akihihimila kwa holu. 30 Hinu akawalongosa panji na kuwakonya, "Wabambu ghangu, nigholi kyani mbati kulokoka?"

31 Weni wakamyanga, "Mkwinili Bambu Yesu na wenga utelokoka pamonga na walongu ghako wogha." 32 Hinu, wakamtangasila lilando lya Bambu mweni pamonga na wandu wogha wavile mghati ghaki. 33 Yula mgholokela akawatola lisaa lilalila gha uhiku akawaghulula vilonda vya weni, hinu mweni na walongu ghaki wabatisilwi lipindi lilalila. 34 Kangi akawatola Paulo na Sila mbaka ukaya ghaki, akawapegha mulyo. Mweni na walongu ghaki wogha wakamema na luheku kwa ikiva hinaa wavile wangumkwinila Sapanga.

35 Kilau ghaki pamuhi, vilongosi wa waloma wakawalaghilila watovangondo ghao wakilonga, "Muwawoposoli wala wandu, muwaleki wayendi."

36 Yula mgholokela amlongelili kangi Paulo yiwa, "Walamula walaghilili yiwa wenga na Sila muwoposolwe. Hinaa mnguwesa kuhuma na kuyenda kwa holu ng'ogha."

37 Ila Paulo akawayanga, "Ikiva tughola ng'ogha uhakata, wakatutova hyatu mahala paluagha na twenga ni wandu wa Loma. Kangi, watuvikili mulighuta lya wawopwa na hinaa wangulaghila watuleki tuyendi kwa kughiha! iwesekana ng'ogha! Ingupalwa hagha weni wahiki baha watuwopoli."

38 Wala watovangondo wakawalongela mighalu hagha walamula, na weni pawayoghanila yiwa Paulo na Sila wavile wandu wa Loma, watilili nesu. 39 Nagha, wayendili kuwaluwa kwa hula uhakata wawagholili na badili gha kuwahumisa mlighuta lya wawopwa wawaluwili wahuki kummbwani hula. 40 Paulo na Sila wahumili mulighuta lya wawopwa, wakayenda ukaya kwa Lidia. Kula wawawonili walongu wamkwinila Kilisito na pawayomola kuwataya moyu wakayenda.