1 Kwa wenga Teofili. Kukihitabu nikitumbulili kuyandika, niyandikili mighalu hyogha Yesu agholili kuhuma mtumbulo mbaka kumwihu, 2 mbaka lichuwa lila atolilwi kundumba. Badili gha kuwapegha malaghililo kupitila Mpumulo wa Sapanga wala wandumindumi awahaghulili. 3 Kwa machuwa ialobaini badili gha kihu kyaki mweni awahumilili mihanja itangala kwa njila ihighilisa lipala yiwa kamkomu. Wakamlola na mweni alongilili na weni mighalu gha unkosi wa Sapanga. 4 Paawelili akilyegha na weni akawalongela nagha, "Mkotoho kuhuka Yelusalemu, ila mlindili hila hupo awalaghilili Tati, hila muyoghanilili nikilonga kwa mwenga. 5 Yohanaabatisili kwa masi, ila kwa machuwa mayaghani yahika, mwenga mtebatiswa kwa Mpumulo wa Sapanganesu."

6 Lipindi wavulwa wakongine pamonga na Yesu, wakamkonya, "Ghuli, Bambu, lipindi hali ndiwa utehuyisa hula unkosi kwa Izilaili?"

7 Yesu akawalongela, "Machuwa na lipindi gha mighalu hagha vya pahi gha ulongosi wa Tati gha nenga, hinu lihengu lya mwenga ng'ogha kumanya yatehumila lipindi ligha. 8 Ila lipindi Mpumulo wa Sapanga paawahulukila mwenga, mtepokela makakala na mtewela wandu mlolile kwa mihu na kulongela ku Yelusalemu, kumlima gha Yudasia hyogha na Samalia na hata mwihu wa mlima wogha." 9 Paayomola kulonga ghala, wogha wakiva wangulola, akatolwa kuyenda kundumba, lihindu likamhigha wakotoho kumlola kangi.

10 Pawawelili wangukwenjula mihu kulola kunani, mweni akiyenda zyaki, bwitu wandu waivili wawelili wavala nguu mbulete pee wakagholoka pabehi na weni, 11 wakalonga, "Mwenga wandu wa Galilaya. Kwa kyani mngugholoka baha mkilola kunani? Yesu hayu avile atolilwi kuhuma kwa mwenga kuyenda kundumba atehika kangi handa nagha mumlola akiyenda kundumba."

12 Hinu wandumindumi wakahuya Yelusalemu kuhuma hula mtumbi ukemilwi mtumbi wa mizeituni uvile utali ghaki kilomita imonga kuhuma kummbwani Yelusalemu. 13 Pawahikili kummbwani Yelusalemu wayingilili kukyumba golofani pahala wavile wangulikala, na wawelili Petelo na Yohanana Yakobu na Andelea na Filipo na Tomasu na Batolomayo na Matayu na Yakobu mwana wa Alifayo na Simoni Zelote na Yudasi mwana wa Yakobu. 14 Hagha wogha wayendelelili kukongine na kuyupa pamonga na wadala, na Malia nyongo ghaki Yesu, na walongu zyaki.

15 Lichuwa limonga kumachuwa ghala, Petelo akagholoka paghati gha wala walongu wayitikila wakonganilili, wogha wavile wandu imia na ihishilini, 16 Petelo akalonga, "Walongu ghangu, ingupalwa Mayandiko yatimili, ghala Mpumulo wa Sapanga ailongile ghala yategholwa na Sapanga, kwa milandu gha Daudi, kwa habali zya Yudasi yula awalongolili wala wamkamulili Yesu. 17 Yudasi awelili mmonga wa lipinga lyetu, kwaikiva na mweni ahaghulilwi na Yesu pamonga na twenga kulihengu hali."

18 Mweni ahemelili litawa kwa ghala mapesa apokelili kwa kughola kitendu kyaki kihakata, akaguwila mula mulitawa kifulifuli, akabaluka na matumbu ghaki ghakamwaghika panji. 19 Wandu wogha walikalili Yelusalemu wakayoghanila habali zya mghalu hau, hinu kwa luga ghao, wakalikema lila litawa "Akelidama," ingumanyika hali ni "Litawa lya Mwahi."

20 Petelo akalonga, "Iyandikwa kuhitabu kya Zabuli,

Makaya ghaki patami wekaghaki,

mundu yoyose akotoho likala mghati ghaki." Kangi iyandikilwi,

"Mundu ghangi atole lihengu lyaki lya kughola."

21 "Hinu, ingupalwa mundu mmonga paghati gha wala watyangili na twenga lipindi lyogha Bambu Yesu paawelili angutyanga pamonga na twenga ahaghuliwi kukongana na twenga. 22 Hayu angupalwa avile mmonga wa wandu wawelili pamonga na twenga kuhuma Yohanaangubatisa mbaka lichuwa lila Yesu atolilwi kuhuma kwa twenga na kuyenda kundumba. Hayu ateghola pamonga na twenga lihengu lya kulongela kwa wandu uhinduki wa Yesu."

23 Hinu, wakahaghula kuvika mahina gha wandu waivili, wa mtumbula Yosefu akemilwi Balisaba vilavila akemilwi Yusito, na wa ivili ni Matia. 24 Hinu wakayupa, "Bambu wenga ungumanya mawachilo gha mioyu gha wandu wogha. Nagha, utulangihi ni ghani paghati gha hagha waivili umhaghulili, 25 ili atoli fasi hai gha kutumikila alilekili Yudasi akayenda mahala angupalwa alikali." 26 Wakahinisa mihu gha mlungu; na wahaghula wogha wakamhaghula Matia, na mweni akayongeswa kulipinga lya wala wandumindumi ikumi na imonga.