1 Badili gha ghala, Yesu awahumili kangi wavulwa ghaki mmbali gha lihiwa lya Tibelia na lyeni lingumanyika lihiwa Galilaya. kawahumila kwa njila hai, 2 Simoni Petelo, Tomaso mweni kukemwa mvila na Natanaeli mwenikaya wa kana gha ku Galilaya, na wana waivili wa Zebedayo na wavulwa ghaki waghangi waivili wawelili pamonga. 3 Simoni Petelo akawalongela wayaki, "Nenga ninguyenda kulopola homba." Weni wakamlongela,

"Natwenga tutekovekelana na wenga," hinu wakayenda, wakakwela whatu, ila uhiku hula wapatili ng'ogha chochosi. 4 Malawila pakutumbula kulangala, Yesu agholokili mmbali gha lihiwa, ila wavulwa wamanyili ng'ogha yiwa kamweni. 5 Hinu Yesu akawakonya, "Waghanja mpata ng'ogha homba?"

Wakayanga tupata ng'ogha.

6 Hinu Yesu akawalongela, "Mtaghi nyafu upandi wa kuliyila wa whatu na mwenga mtepata homba." Hinu, wakatagha nyafu ila hinaa wakasindwa kukwegha nyafu kwaikiva gha homba vila wamema mnyafu.

7 Yula mvulwa mweni kupalwa nesu na Yesu akamlongela Petelo, "Hayu ni Bambu!" Simoni Petelo pakahyoghanila ghala, akajiwopa nguu ghaki kwaikiva awelili kavika mmbali nguu ghaki lipindi angughola lihengu, hinu akajumbila mmasi. 8 Ila wavulwa waghangi wakawela wakihika mmbali mwa lihiwa kwa whatu kunu wakikwegha wafu weni kumema homba. Na weni wawelili ng'ogha kutali na njengani, ila iwachililwa utali wa mita imia imonga. 9 Hinu pawahika kunjengani wakalola makala gha lyoto na kunani gha lyoto lila kuwelili na homba pamonga na libumunda vikinyanywa. 10 Yesu akawalongela, "Myeghi kunu amonga gha homba muwalopola."

11 Simoni Petelo akakwela muwhatu na kukwegha hula wafu mpaka njengani na hula wafu uwelili umema homba wakulu imia imonga na ihamsini na itatu, ila pamonga na wala homba kuwela watangala, hula wafu ulakatula ng'ogha. 12 Yesu akawalongela, "Mhiki mlyeghi mulyo." Ila kwahela hata mvula mmonga paghati gha weni kayesa kumkonya yiwa, "Ghuli, wenga kwa ghani?" kwaikiva wamanyili kala yiwa ka Bambu. 13 Yesu akahika, kutola lila libumunda, akawametulila kila mmonga kipandi kyaki, na akaghola vilavila kuwala homba.

14 Hai ikawela lihanja lya itatu Yesu kuwahumila wavulwa ghaki badili gha kuhinduka.

15 Pawayomola kulyegha, Yesu akamkonya Simoni Petelo, "Ghuli, Simoni mwana wa Yohanawenga ungunipala nenga kupiti hagha?" Na mweni akayanga,

"Hina, Bambu," "Wenga ungumanya vila ningukupala."

Yesu akamlongela, "Unileleli wanakondolu ghangu." 16 Akamkonya kangi liyanja lya ipili, "Simoni mwana wa Yohana ungunipala?" Simoni akayanga,

"Hina Bambu," "Wenga ungumanya vila ningukupala!"

Yesu akamlongela kangi, "Unileleli kondolu ghangu." 17 Hinu Yesu akamkonya liyanja lya itatu, "Simoni mwana wa Yohana, ghuli, ungunipala?"

Petelo akakolwa na holu kwa vila amlongile miyanja itatu, "Ghuli ungunipala?" akalongela, "Bambu, wenga ungumanya hyogha, wenga ungumanya vila ningukupala!"

Yesu akamlongela, "Unileleli kondolu ghangu." 18 Uchakaka ningukulongela, pauwelili mhongolu usyovelili kuliwopa mhunga na kuyenda kokosi kuupalili. Ila pautewela mgogolu utegholosa mawoku ghako, na mundu ghangi atekuwopa na kukuyegha kula wenga ungukupala ng'ogha. 19 Yesu alongili nagha ili kulangiha vila Petelo atehova, na kihu kyaki vila kitemtundamilisa Sapanga. Hinu akamlongela, "Unikovekeli."

20 Petelo akaghalambuka kuhyetu akamlola mvulwa mweni kupalwa nesu na Yesu, anguwakovekela, mvulwa hayu ndiwa yula atamili pabehi na Yesu lipindi wangulyegha mulyo na ndiwa amkonyili, "Bambu ni ghani atekuhyuka?" 21 Hinu petelo pamuwonili hayu, akamkonya Yesu, "Bambu, na hayu ghuli?"

22 Yesu akamyanga,"Ikiva ningupala ahighali mkomu mpaka pala nihika, wenga ingukughasa niki? Wenga ungovikeli nenga."

23 Hinu habali hila ikalandala paghati gha walongu wala wamkwinila Yesu yiwa yula mvulwa atehova ng'ogha. Ila Yesu ailongile ng'ogha ghala ila ailongile yiwa, "Ikiwela ningupala ahighali mkomu mbaka pala nihika, hali lingukughasa niki?"

24 Hayu ndiwa yula mvulwa amlongililile Yesu, na kuyandika milando hai. Na twenga tungumanya yiwa ayalongilile ni chakaka.

25 Kuwela na mighalu mitangala Yesu aigholile na handa hyogha yangaliyandikwa mlima wogha ungalikwila ng'ogha kuvika vihitabu vingaliyandikwa.