1 Malawila pee lipindi kukali na lwisa kulichuwa lya ijumapili, Malia yula anguhuma ku Magidala akayenda kulimambi akalola lila liganga lihumiswa na kuvikwa mmbali mwa mlyango wa limambi. 2 Hinu hayu akayenda kwa kutula mbilo mbaka kwa Simoni Petelo na kwa yula mvulwa ghangi mwenikuwela apalilwi nesu na Yesu, akawalongela, "Bambu kahumiswa kulimambi na twenga tumanya ng'ogha wamyegha kugha."

3 Petelo na yula mvulwa ghangi wakahuya kuyenda kulimambi. 4 Hinu wogha wakatula mbilo ila yula mvulwa ghangi akamlongola Petelo na kuhika njenji. 5 Pakaghondama ili aloli mghati, akalola hila nguu mbuleti gha kusikila ila kayingila ng'ogha mghati. 6 Kuhyetu ghaki akakovekela Simoni Petelo, akayingila mula mlimambi akalola hila nguu mbuleti, 7 pamonga na kila kitambala wamwopili Yesu kumutu. Kila kitambala kivikwa ng'ogha pabei na nguu mbuleti gha kusikila, ila kiwelili kibindwa na kuvikwa kumahala weka. 8 Hinu yula mvulwa ghangi mweni kulongola kuhika kulimambi, akayingila hilahila mghati akalola na akajumila. 9 Kwa lipindi lila Petelo pamonga na wavulwa waghangi wawelili wambila kumanya ghala mayandiko yailongile, ingupalwa ahinduki. 10 Hinu wala wavulwa wakahuya ukaya.

11 Ila Malia akahighala akigholoka panji gha limambi akilila. Paawelili angulila, akagondama, kusyungulila mula mlimambi, 12 akawalola watumikila wa kundumba wa Sapanga waivili wenikuvala nguu mbulete na kugholoka pala mhigha wa Yesu pauwelili uvikwa mmonga akiva kagholoka mbandi gha kumutu na ghangi kagholoka mbandi gha kumaghulu. 13 Wala watumikila wa kundumba wa Sapanga wakamkonya "Nyongo, ungulilila niki?"

Mweni akawalongela, "Wahumisa higha gha Bambu ghangu, nenga manya ng'ogha kula wayenda kuuvika."

14 Badili gha kulonga hagha, akaghalambuka kuhyetu, akamlola Yesu kagholoka pala, ila mweni kammanya ng'ogha yiwa ni Yesu. 15 Yesu akamkonya, "Nyongo, ungulilila niki? Ungumhakula ghani?"

Malia kunu akiwachila yiwa yula kamgholokela wa kitawa kila akamlongela, "Bambu, handa utolile mhigha ghaki nongeli umvika kugha nenga nikautoli."

16 Hinu Yesu akamkema, "Malia!"

Mweni Malia akaghalambuka na kumlongela kwa kiebulania, "Raboni!" akimaanisa "Mvula".

17 Yesu akamlongela, "Ukotoho kungola, kwaikiva nambila kuyenda kunani kwa Tati ila uyendi kwa walongu ghangu ukawalongeli, nenga ninguyenda kunani kwa Tati wa nenga na hayu ni Tati wa mwenga, Sapanga wa nenga na Sapanga wa mwenga."

18 Hinu Malia akayenda kuwalongela wavulwa yiwa kamlola Bambu, hinu akawalongela hyogha yala Yesu amlongile.

19 Lumihi lwa ijumapili wavulwa wawelili walikungula kulighuta limonga na kutata milyango kwaikiva wawelili wanguwatila vilongosi wa Wayahudi. Bwitu Yesu akawagholokela paghati ghao, akawajambusa, "Kuponga na kuweli na mwenga". 20 Pakahyomola kulonga ghala, akawalangiha mawoku ghaki na lubafu lwaki. Hinu wala wavulwa wakahekelela nesu kumlola Yesu. 21 Hinu Yesu akawalongela kangi, "Kuponga na kuweli na mwenga, ninguwalaghila mwenga handa vila Tati anilaghilili nenga." 22 Pakayomola kulonga ghala, akawapulililila mbumulilo akalonga, "Mpokeli Mpumulo wa Sapanga. 23 Pamuwalekesela wandu sambi syau Sapanga atewalekesela sambi syau, na wala wogha muwalekesela ng'ogha Sapanga atewalekesela ng'ogha sambi syau."

24 Tomaso, mmonga wa wala ikumi na ivili, mwenikukemwa mvila, awelili ng'ogha pamonga na wavulwa wayaki lipindi Yesu pahikili. 25 Hinu wavulwa waghangi wakamlongela, "Tumwonili Bambu."

Tomaso akawalongela, "Nenga panilola ng'ogha likovu lya misumali mumawoku ghaki, na kutaya kyala kulikovu lya mlubafu, nitejumila ng'ogha."

26 Hinu badili gha machuwa inane, wavulwa ghaki wakiva mghati gha lighuta kangi na kunu Tomasi akiwela hamu pamonga na weni. Milyango ikiwela itatwa, ila Yesu akahika akagholoka paghati gha weni akalonga, "Kuponga na kuweli na mwenga!" 27 Hinu akamlongela Tomaso, "Uyeghi kyala kyaku, uloli mawoku ghangu, uyeghi na liwoku lyako uyavisi mulubafu lya nenga, ukotoho kuwela na holu wenga ukwinili hela."

28 Tomaso akayanga, "Wenga ni Bambu ghangu na kangi wenga ni Sapanga ghangu."

29 Yesu akamlongela, "Ghuli, wenga ungukwinila kwaikiva unilola? Mbaha wala wanilola ng'ogha, ila wangunikwinila."

30 Yesu agholile kuulongolu gha wavulwa ghaki makangasu ghangi matangala yenikuwela yayandikwa ng'ogha kuhitabu haki. 31 Ila hagha yayandikwa ili muwesi kukwinila yiwa Yesu ndiwa kilisito, Mwana wa Sapanga na kwa kumkwinila mpati kuwela na ukomu wa machuwa hyogha bila mwihu.