1 Pawelili mundu mmonga lihina lyaki Lazalu, hayu awelili mvina. Mundu hayu awelili akilikala ku Betania pamonga na Malia na Malita wahacha ghaki. 2 Malia hayu ndiwa yula awelili kampakala Bambu mahuta gha kunungila na kumpyangula maghulu kwa hwila ghaki. 3 Hinu, wala wahacha ghaki Lazalu wakalaghila ujumbi kwa Yesu wakilonga, "Bambu, ghanja ghako ni mvina."

4 Yesu pakahyoghanila nagha, akalonga, "Uvina hau utemkoma ng'ogha, ila uteghola wandu wamuyinuli Sapanga, na kwa kupitila hali Mwana wa Sapanga hilahila ateyinulwa."

5 Yesu awapalili nesu Malita na walongo ghaki Malia pamonga na Lazalu. 6 Hata badili gha kuhyoghanila yiwa Lazalu ni mvina, Yesu akayendelela kulikala pala pala mahala awelili kwa machuwa maivili kuulongolo. 7 Badili gha machuwa maivili kuyenda akawalongela wavulwa ghaki, "Tuyendi kangi ku Yudasia."

8 Wala wavulwa wakamlongela, "Mvula lipindi mayaghani hela lipiti Wayahudi wapalili kukutova kwa maganga, wenga ungupala kuyenda haku kangi?"

9 Yesu akayanga, "Ghuli, pamuhi kuwela ng'ogha na masaa ikumi na ivili? Hinu, mundu paatyanga pamuhi kawesa ng'ogha kulikwala kwaikiva angulola lijuwa. 10 Ila mundu paatyanga uhiku atelikwala kwaikiva mhana uwela ng'ogha mghati ghaki." 11 Yesu pakayomola kulonga milando hila, akawalongela, "Ghanja wa twenga Lazalu kaghonja, ila nenga ninguyenda kumuyimusa."

12 Hinu wala wavulwa wakamlongela, "Bambu ikiwela kaghonja lughonu hayu atelama."

13 Weni waliwachilili yiwa Yesu ailongile kughonja handa kughonja lughono, ila mweni ailongilile kihu kya Lazalo. 14 Hinu, Yesu akawalongela lipalalipala yiwa, "Lazalu kahova, 15 ila ninguhekelela kwaikiva niwelili ng'ogha haku lipindi Lazalo akikolwa na kihu, ili mpati kukwinila, hinu tuyendi kula angulikala."

16 Tomasi yula mweni kukemwa mavila akawalongela wavulwa wayaki, "Handa ni kuhova tuyendi na twenga tukahovi pamonga na mvula."

17 Yesu paahikili ku Besania akalola limambi, liwela kavikwa Lazalo mghati ghaki ipiti machuwa manjechi. 18 Kimbwani kya Besania kiwelili pabehi na Yelusalemu, utali wa kilomita itatu. 19 Wayahudi watangala wahikili kuwataya moyu Malita na Malia kwa kuhwegha mhaja ghao.

20 Hinu, Malita pakahyoghanila yiwa Yesu anguhika, akayenda kumpokela ila Malia ahighalili ukaya. 21 Malita akamlongela Yesu, "Bambu, handa ungaliwela haku, mlongu ghangu angalihova ng'ogha. 22 Ila ningumanya yiwa hata hinaa chochosi utekiyupa kwa Sapanga, atekupegha."

23 Yesu akamlongela,"Mlongu ghako atehinduka."

24 Malita akamyanga, "Ningumanya yiwa atehinduka lipindi lya wandu kuhindulwa, lichuwa lya kumwihu."

25 Yesu akamlongela,"Nenga ndiwa mweni kuwahindula wandu na kuwapegha ukomu. Yula mweni kunikwinila nenga hata ikawela anguhova, atelama, 26 na Mundu yeyosi mweni ukomu na kunikwinila nenga, katu atehova ng'ogha. Ghuli, ungukwinila hagha?"

27 Malita akamlongela, "Hina Bambu! Nenga ningukwinila yiwa wenga ndiwa kilisito, Mwana wa Sapanga, yula atehika kumlimawogha."

28 Badili gha kulonga hagha, Malita akayenda kumkema malia, mhacha ghaki, akamlongela wakiwela weka ghao, "Mvula kabaha, angukukema." 29 Malia pakahyoghanila nagha, akayimuka kwa uloposelo, akamyendela Yesu. 30 Yesu awelili akali mnjila kayingila kukimbwani, awelili mahala palapala Malita paampokelili. 31 Hinu, Wayahudi wala welili ukaya pamonga na Malia wakimtaya moyu, pawamlolili kayimuka na kuyenda panji, wakamkovikela. Wakiliwachila yiwa awelili anguyenda kumambi kuililila kula.

32 Hinu, Malia pakahika mahala pala Yesu awelili, akamtundamilila manung'una kuulongolo gha maghulu ghaki akamlongela, "Bambu, handa ungaliwela baha, mlongu ghangu angalihova ng'ogha!"

33 Yesu paamlolile Malia akilila na wala Wayahudi wanguhika pamonga na mweni wangulila hilahila, Yesu akawela na lusungu pamonga na kunyengemala nesu. 34 Hinu akawakonya, "Mumsika kogha?"

wakamlongela, "Bambu, tuyendi ukaloli."

35 Yesu akalila masosi. 36 Hinu, Wayahudi wakalonga, "Mloli vila awelili kampala."

37 Ila amonga wakalonga, "Ghuli, hayu ng'ogha yula amuhumbulili mihu yula angalikulola, hinaa kasindwa kumghola Lazalu akotoho kuhwegha?"

38 Hinu Yesu akiwela na luhungu kumoyu, akayenda kumambi. Limambi lyeni liwelili mbaku na ligubikwa kwa liganga likulunga. 39 Yesu akalonga, "Mlihumisi hali liganga."

Malita mweni kuwela mlongu ghaki yula mweni kuhova akalonga, "Ila Bambu, lipindi hali atewela angununga kwavila wamuwika kala kulimambi machuwa manjechi yapiti."

40 Yesu akamlongela, "Ghuli, nikulongelili ng'ogha yiwa paukwinila, uteulola ukulu wa Sapanga?" 41 Hinu, wakalihusia lila liganga. Yesu akalola kunani kundumba, akalonga "Ningukushukwile Tati kwaikiva wenga unguniyughanila mayupu ghangu. 42 Ningumanya yiwa unguniyughanila machuwa hyogha. Ila ningulonga hagha kwaikiva wandu hagha wa bahapa wapati kukwinila yiwa wenga ndiwa mweni kunilaghila." 43 Pakayomola kulonga hagha, Yesu akakema kwa lilowi likulunga, "Lazalu! Uhumi panji!" 44 Yula awelili kahova akahuma panji, kunu kumaghulu kabindililwa nguu mbuleti gha kusikila mbaka kuwusu. Yesu akawalongela, "Mumwoposoli mumleki ayendi zyaki."

45 Hinu, Wayahudi watangala paghati gha wala wahikili kwa malia pawalolili mghalu hula augholile Yesu, wakamkwinila. 46 Ila amonga gha weni wakayenda kwa Mafalisayo na kuwalongela mighalu hyogha hila aigholili Yesu. 47 Hinu kuulongolo ghaki watambika wakulu na Mafalisayo wakawakema vilongosi wa njengakaya ngulu gha Wayahudi, wakalonga, "Tumgholi kyani? Mundu hayu angughola makangaso yatangala nesu. Mtambika wa Kiyahudi 48 Patumleka ayendeleli nagha wandu wogha watemkwinila, na hinu wandu wa kuhuma ku Loma watehika kukolonganya lighuta lya Sapanga lyetu na mlima watwenga."

49 Mmonga paghati gha weni, wamkema lihina lyaki Kayafa, yula awelili mtambika mkulu lichuva lila akawalongela, "Mwenga mmanya ng'ogha kindu chochosi!" 50 "Ghuli, mmanya ng'ogha yiwa ni mbaha mundu mmonga ahweghi kwaikiva gha wandu wogha, kupiti wandu wogha wa mlima hau wayalamiki?" 51 Kayafa ailongile ng'ogha milando hai kwa mawachilo ghaki mweni. Ila kwaikiva awelile Mtambika Mkulu lichuva lila, awelili akilota yiwa Yesu atehova kwaikiva gha mlima wa Wayahudi. 52 Kangi kuhova kwa mweni, ng'ogha kwaikiva gha mlima wa Wayahudi weka, ila awakunguli pamonga wana wa Sapanga wapaganyikili.

53 Hinu, kuhuma lichuwa lila wakulu wa Wayahudi wakahakula njila gha kumkoma Yesu. 54 Kwaikiva gha nagha, Yesu akawela kangutyanga ng'ogha lipala lipala ku Yudasia, ila akahuka pala, akayenda mahala pabehi na luvagha, kummbwani waukema Efulaimu. Akalikala haku pamonga na wavulwa ghaki.

55 Mhambu wa Wayahudi wa Pasaka uwelili pabehi, na wandu watangala wayendili ku Yelusalemu ili waliyandali kujumilika kuulongolo gha Sapanga pambila gha mhambu hau. 56 Hinu, wakawela wangumuhakula Yesu, pawalikungula ku Lighuta lya Sapanga, wakakonyana, "Ghuli, mnguliwachila mundu hayu atewesa ng'ogha kuhika kumhambu hau?" 57 Watambika wakulu na Mafalisayo walaghilili yiwa mundu pakamanya mahala pala kawela Yesu awalongeli ili weni wapati kumkamula.