1 Pambila gha mlima wogha kulumbwa Lilando awelili, hayu Lilando awelili pamonga na Sapanga na mweni Lilando awelili Sapanga. 2 Kuhuma mtumbulo hayu Lilando awelili pamonga na Sapanga. 3 Sapanga alumbili kila kindu kwa kupitila Lilando. Kwahela chochose kyeni kulumbwa bila Lilando. 4 Lilando ndiwa kawesesa kila kindu kulama, kwaikiva mweni ndiwa kayegha mhana kwa wandu wogha. 5 Mhana hau ungulangasa mulwiha, na lwiha liwesili ng'ogha kuusinda.

6 Sapanga amulaghilile mundu mmonga mweni kukemwa Yohana. 7 Yohana ahikile kuwalongela wandu habali gha mhana hau, ili wandu wogha wapati kuhyoghanila na kukwinila. 8 Yohana awelili ng'ogha hau mhana, ila ahikili kulongelela hau mhana. 9 Hau ndiwa mhana wa chakaka, unguhika kumlimawogha, na kuwalangasila wandu wogha.

10 Hinu, hayu Lilando awelili mumlimawogha, pamonga na yiwa kwa kupitila mweni Sapanga alumbile mlima wogha, ila mlima wogha uwesile ng'ogha kummanya. 11 Ahikili kumlima ghaki, ila wandu ghaki wampokelile ng'ogha. 12 Ila wala wogha wampokelili na kumkwinila, awagholile waweli wana wa Sapanga. 13 Hagha wawela ng'ogha wana wa Sapanga vila wandu wanguweleka. Waweleka ng'ogha kwaikiva wandu wangupala hela kuwela na wana. Hilahila wanguweleka ng'ogha kwaikiva mundu angupala kuwela na mwana, ila waweleka na Sapanga mweni.

14 Hayu Lilando akawela mundu, na akalikala paghati gha twenga, na twenga tukaulola ukulu ghaki, ukulu wa mwana wa weka wa Tati, kangi akiwela kamema umaha na uchakaka.

15 Yohana awalongelelili wandu mighalu gha mundu hayu, akalongela kwa lilowi, Hayu ndiwa yula niwalongelili yiwa, "Hayu mweni kuhika badili gha nenga ni mkulu kupiti nenga, kwaikiva awelili haku pambila gha nenga kuweleka."

16 Kwaikiva ni mmaha nesu, twenga wogha tupokela highili zitangala nesu. 17 Kwaikiva dahile Sapanga ayeghili laghililo kwa kupitila Musa, ila hinaa umaha na chakaka tupokela kwa Yesu Kilisito. 18 Kwahela mundu yoyose amwonile Sapanga, ila Mwana weka yaki, mweni kapamonga na Tati hinu kwa nagha katulangiha vila Sapanga kawela na mweni ni Sapanga.

19 Lichuwa limonga vilongosi wa Wayahudi wawayeghili watambika na walawi kuhuma ku Yelusalemu wamkonyi Yohana yiwa, "Wenga ni ghani?"

20 Yohana akawayanga kinaga ubaga, "Nenga ng'ogha Kilisito mkombola ahaghulilwi na Sapanga."

21 Hinu wakamkonya kangi, "Wenga ni ghani? Ghuli, wenga ni Elia?"

Yohana akayanga, "Ng'ogha, ng'ogha nenga." Wakamkonya kangi,

"Ghuli wenga ni yula mlota wa Sapanga?"

Yohana akawayanga, "Ng'ogha, ng'ogha nenga,"

22 Ndiwa wakamlongela, "Hinu utulongeli yiwa wenga kwa ghani ili tupati lilando lya kuwayeghela wala watulaghilili. Wenga mweni ungulonga niki?"

23 Yohana akawayanga, "Nenga ndiwa yula mwenikuwela mlota Isaya alongelile habali zyaki,

‘Nenga ni lilowi lya mundu mweni kutangasa kuhuma mluvagha,’

Mgholi njila gha Bambu."

24 Ndiwa wala wandu wawelili walaghililwi na Mafalisayo, 25 wakamkonya Yohana, "Handa wenga ng'ogha Kilisito, ng'ogha Elia, ng'ogha yula mlota wa Sapanga, kwa kyani hinu ungubatisa?"

26 Yohana akawayanga, "Nenga ningubatisa kwa masi, ila paghati gha mwenga kawela yula mwenga mungummanya ng'ogha. 27 Hayu anguhika kuulongolo gha nenga, nenga nipaliwa ng'ogha hata kumuwoposola ngoi zya makubasi ghaki." Mundu kavala makubasi

28 Mighalu hai ihumilili haku ku Betania, kumwambu gha lweni Yoludani mahala Yohana awelili angubatisa.

29 Kilau ghaki Yohana amwonili Yesu akimhikila, akalonga, "Hayu ndiwa mwanakondolu wa Sapanga anguhumisa sambi sya wandu wogha!" 30 Hayu ndiwa niwalongelili mighalu ghaki paniwalongelile, "Kuulongolo gha nenga anguhika mundu mmonga kawela mkulu nesu kupiti nenga, kwaikiva awelili pambila gha nenga kuweleka." 31 "Nenga mweni baha nimmanyili ng'ogha, ila nihika kubatisa kwa masi ili apati kuhighiliswa kwa wandu wa Izilaeli."

32 Hinu Yohana akawalangiha akilonga, "Nenga niwelili na nikamlola Mpumulo kuhuma kundumba akihuluka handa ngunda vila anguhuluka na akatama kunani ghaki." 33 Nenga nimmanyili ng'ogha, ila yula anilaghilili kubatisa kwa masi, hayu kanilongela kala, "Mundu yula utemlola akihulukilwa na Mpumulo kuhuma kundumba na kulikala kunani ghaki, hayu ndiwa atewabatisa wandu kwa Mpumulo ghangu." 34 Ndiwa Yohana akalongela, "Nenga mweni baha nilola kwa mihu ghangu mghalu hau na ningulongela yiwa hayu ndiwa Mwana wa Sapanga."

35 Kilau ghaki, Yohana awelili kagholoka kangi mahala haku pamonga na wavulwa ghaki waivili. 36 Paamlolili Yesu angutyanga, akalonga, "Mumloli, hayu ndiwa Mwanakondolu wa Sapanga."

37 Wala wavulwa waivili pawamhyoghanila Yohana akilonga milando hai wakamkovikela Yesu. 38 Yesu akaghalambuka akawalola wakimkovikela, akawakonya munguhaka kyani?

Wakamyanga, "Rabi," ingumanyisa ni mvula, "Ungulikala kugha?"

39 Yesu akawalongela, "Muhiki na mwenga mtelola." Wala wavulwa wakamkovekela, wakalola mahala awelili angulikala, wakalikala na mweni lichuwa lila. Kwaikiva iwelili kala isaa ikumi lumihi.

40 Mvulwa mmonga paghati gha wavulwa waivili wenikuwela wayoghanilili milando gha Yohana, na kumkovekela Yesu lihina lyaki awelili akikemwa Andeleya mlongo ghaki Simoni. 41 Bahala Andeleya akahuka na kuyenda kumuhakula Simoni mlongu ghaki na kumlongela, "Tumlola Masia" Ingumanisa, "Kilisito." 42 Hinu mweni akamyegha kwa Yesu.

Yesu akamlola na kulonga, "Wenga ni Simoni mwana wa Yohana. Utekemwa Kefa" Kigiliki ni Petelo ingumaanisa mghomba.

43 Kilau ghaki Yesu alamulili kuyenda ku Galilaya. Haku akakongine na Filipo, akamlongela, "Ungovikeli." 44 Filipo awelili mwenikaya wa Betisaida mmbwani wawelili wakikala akina Andelea na Petelo. 45 Filipo amwonili Natanaeli, akamlongela, "Tumlola Mundu yula Musa ayandikile habali zyaki ku kihitabu kya laghililo, na walota wayandikile habali zyaki, lihina lyaki ni Yesu, Mwana wa Yusufu, mundu wa mmbwani wa Nazaleti."

46 Natanaeli akamkonya Filipo, "Ghuli lilando lya maha linguwesa kuhuma ku Nazaleti?"

Filipo akamlongela "Uhiki uloli."

47 Yesu paamwonili Natanaeli anguhika kwa mweni, akatumbula kulongelela habali zya Natanieli akilonga, "Mloli, hayu ni muizilaeli wa chakaka kahela uhakata mghati ghaki."

48 Natanaeli akamkonya, "Uwesaghuli kunimanya?"

Yesu akamuyanga, "Pauwelili pahi gha libiki lya tini, hata pambila gha Filipo kakukema, nikulolili."

49 Pala Natanaeli akamlongela, "Mvula wenga ni Mwana wa Sapanga. Wenga ndiwa Nkosi wa Izilaeli."

50 Yesu akamyanga, "Ghuli, ungukwinila kwaikiva nikulongelili yiwa nikuwonile pauwela pahi gha libiki lya tini? Hinu utelola mighalu mikulunga ipiti hagha." 51 Yesu akayendelela kulonga, "Ninguwalongela chakaka, mtelola kundumba kukiwoposoka na watumikila wa kundumba wa Sapanga wakikwela na kuhuluka kunani gha Mwana wa Mundu."