1 Hinu, iwelili pambila gha lichuwa lya mhambu wa Pasaka. Yesu amanyili yiwa lisaa lyaki lya kuhuka kumlimawogha na kuhuya kwa Tati ghaki litimila kala. Mweni awelili akiwapala wandu ghaki wala weni kuwela kumlimawogha, kangi awapalile nesu bila mwihu.

2 Yesu na wavulwa ghaki pawawelili wakilyegha mulyo wa lumihi. Lihyukana awelili kamlulunganya kala Yudasi mwana wa Simoni Isikalioti yiwa amhyuki Yesu. 3 Yesu aimanyile yiwa Tati kampegha ukulu wa kulongosa vindu vyogha na kangi yiwa ahumile kwa Sapanga na yiwa atehuya kangi kwa Sapanga. 4 Hinu, Yesu akahuka kuhuma mmesa pala pawawelili wakilyegha, akavika mmbali nguu ghaki gha panje, akatola kitambala akajiwopa kukibulibulilo. 5 Hinu akavika masi mundeleko, akatumbula kuwakuwa maghulu wavulwa ghaki na kuwapyata kwa kila kitambala ajiwopili. 6 Pakahika kwa Simoni Petelo, Petelo akamkonya, "Bambu, ghuli wenga ungupala kunikuwa nenga maghulu?"

7 Yesu akamyanga, "Utewesa ng'ogha kumanya hinaa, kila ningukighola ila haku kuulongolo utemanya."

8 Petelo akamlongela, "Nenga ngana kukuliwa maghulu na wenga" Yesu akamyanga,

"Nenga panileka kukukuwa wenga maghulu, wenga utewela ng'ogha pamonga na nenga katu."

9 Simoni Petelo akamyanga, "Bambu, paikawela nagha, ukotoho nikuwa maghulu weka yaki, ila unikuwi na mawoku pamonga na mutu!"

10 Yesu akamlongela Petelo yiwa, "Yula mweni kuyogha kala kapalwa ng'ogha kuyogha kangi, ila angupalwa kukuwa maghulu ghaki weka, kwaikiva mhigha ghaki wogha wambuleti. Na mwenga mwa mbuleti ila ng'ogha wogha." 11 Yesu ailongile nagha kwaikiva ammanyili kala yula atehika kumhyuka ndiwa kwaikiva akalongela, "Mmonga paghati gha mwenga kana ndaka."

12 Pakayomola kuwakuwa maghulu na kuvala kangi lihabiti lyaki, akatama pamesa, akawalongela, "Ghuli, mmanya kila niwagholela?" 13 Mwenga mngunikema nenga Mvula wa mwenga na Bambu. Ni chakaka pamlonga nagha, kwaikiva nenga ni mweni. 14 Hinu, ikiva Mvula na Bambu wa mwenga ninguwakuwa maghulu, inguwapala na mwenga kukuwilana mwenga kwa mwenga maghulu. 15 Nenga niwapegha mlandano hau, ili na mwenga mpati kugholelana handa vila niwagholela mwenga. 16 Ninguwalongela chakaka yiwa, mtumikila kamkulu ng'ogha kupiti bambu ghaki, hilahila yula mweni kulaghilwa kamkulu ng'ogha kupiti yula mweni kumlaghila. 17 Handa mumanya hagha, hinu mtehighilwa pamuyaghola.

18 "Hagha nilongela nilonga ng'ogha kwa mwenga wogha, ninguwamanya wala niwahaghulili. Ila ni ingupalwa nesu yatimili Mayandiko gha Sapanga, yula mweni kuwela ghanja ghangu na kalyegha mulyo pamonga na nenga kangalambukila." 19 Nenga ninguwalongela mighalu hai pambila gha lolosi lila kuhumila, ili mpati kukwinila yiwa Nenga ndiwa. 20 Ninguwalongela chakaka, "Mweni kumpokela yula nimlaghila kambokela nenga, na yula mweni kumbokela nenga kanipokela yula mweni kunilaghila nenga."

21 Badili gha kulonga hagha, Yesu akawela kaghasika nesu mmoyu hinu akalongela lipalalipala, "Mmonga paghati mwa mwenga atenihyuka."

22 Wavulwa wakalolesana, kwaikiva wamanyili ng'ogha yiwa ghani Yesu angumlongelela. 23 Mmonga wa wavulwa ghaki, mweni kuwela kapalwa nesu na Yesu awelili kasaghamila makombi gha Yesu. 24 Simoni Petelo akalangila liwoko kwa mvulwa yula na kulongela, "Umkonyi angumlongelela ghani milando hai."

25 Hinu yula mvulwa akamkonya Yesu kwa upabehi, "Bambu, ungumlongelela ghani?"

26 Yesu akayanga, "Yula nitempegha haki kipandi kya libumunda nikichwikili mkimbundi ndiwa hayu." Hinu akatola kipandi kya libumunda akakichwika mkimbundi, akampegha Yudasi mwana wa Simoni Isikalioti. 27 Yudasi pakapokela kipandi kila, Lihyukana likamyingila. Hinu Yesu akamlongela, "Kila ungupala kughola ugholi kwa kuloposela." 28 Ila kwahela hata mmonga paghati mwa wala wawelili pala mmesa kawesa kumanya yiwa liki kamlongela. 29 Kwaikiva Yudasi awelili muwika mapesa, amonga wa weni wakaliwachila yiwa awelilili kamlongela ahemeli vindu vyeni kupalwa lichuwa lila lya mhambu, au awelili kamlongela akawapeghi chochosi wandu kapuku.

30 Hinu, Yudasi paatolili kila kipandi kya libumunda, akahuma panji lipindi lilalila. Na hai iwelili uhiku.

31 Badili gha Yudasi kuhuka, Yesu akalonga, "Hinaa ukulu wa Mwana wa Mundu unguyenda kuwoneka lipalalipala na kangi ukulu wa Sapanga utewoneka kupitila mweni." 32 Mwana atewalangiha wandu vila Sapanga kawela mkulu, hilahila Sapanga atewalangiha wandu vila Mwana kawela mkulu, Sapanga ateghola hali njenji nesu. 33 Wana wanenga, nitewela na mwenga kwa lipindi mayaghani hela. Mwenga mtenihakula, ila hinaa ninguwalongela kila niwalongelili vilongosi wa Wayahudi yiwa, "Kula ninguyenda mwenga mtewesa ng'ogha kuhika!" 34 Ninguwapegha lilaghilo lyonu. Mpalani mwenga kwa mwenga. Handa vila nenga niwapala mwenga. 35 "Pampalana mwenga kwa mwenga wandu wogha watelimanya yiwa mwenga ni wavulwa wa nenga."

36 Simoni Petelo akamkonya, "Bambu, unguyenda kugha?"

Yesu akamyanga, "kula ninguyenda utewesa ng'ogha kunikovekela hinaa, ila utenikovekela kuulongolo."

37 Petelo akamkonya, "Bambu, kwa kyani nisindwi kukukovikela hinaa? Nenga niliyandala kuhova kwaikiva gha wenga."

38 Yesu akayanga, "Ghuli, chakaka uliyandala kala kuhova kwaikiva gha nengaa? Chakaka ningukulongela, pambila gha njogholu kutova lilowi utenikanila mihanja itatu."