1 Kuwelili na mundu mmonga akemilwi Nikodemu hayu awelili Mfalisayo na awelili kilongosi wa Wayahudi. 2 Lichuwa limonga Nikodemu amyendelili Yesu uhiku, akamlongela, "Labi, tungumanya yiwa wenga ni mvula ulaghililwi na Sapanga, kwaikiva kwahela mundu kanguwesa kughola makangaso unguyaghola ikiva Sapanga kapamonga ng'ogha na mweni."

3 Yesu akamlongela, "Ningukulongela uchakaka, iwesekana ng'ogha mundu kuyingila ku Unkosi wa Sapanga ikiva kawelekwa ng'ogha lihanja lya ivili."

4 Nikodemu akamkonya, "Anguwesaghuli mundu kuwelekwa akiva mundu mkomi? Ghuli anguwesa kuyingila mumtima wa nyongo ghaki akaweleka kangi?"

5 Yesu akayanga, "Ningukulongela uchakaka, ikiva mundu kaweleka ng'ogha kwa masi na Mpumulo wa Sapanga, anguwesa ng'ogha kuyingila ku Unkosi wa Sapanga. 6 Mundu anguweleka kihigha na tati pamonga na nyongo, ila wandu wangughalambuswa na kuwela wana wa Sapanga na Mpumulo wa Sapanga. 7 Hinu ukotoho kukangasa kwa kukulongela yiwa ungupalwa uwelekwi lihanja lya ivili. 8 Luyegha linguwumba kuyenda kula lingupala, na lilowi lyaki linguhyoghanika ila uwesa ng'ogha kumanya kula linguhuma wala kula linguyenda, hilahila na mundu awelikilwi na Mpumulo uwela nagha."

9 Nikodemu akamkonya, "Mghalu hau unguwesekanaghuli?"

10 Yesu akamlongela, "Wenga ni mvula mkola mlima ku Izilaeli, ghuli mighalu hagha unguyamanya ng'ogha?" 11 Ningukulongela wenga chakaka, tungulongela kila tukimanya na tungutangasa kila tukilolile kwa mihu, ila mwenga mjumila ng'ogha ujumbi wa twenga. 12 Ikiva niwalongela mighalu yangugholeka ku mlima wogha mwenga mnikwinila ng'ogha, mtewesaghuli kunikwinila nikiwalongela mighalu gha kundumba? 13 Kwahela mundu kayenda kundumba ila Mwana wa Mundu, avile kahuluka kuhuma kundumba.

14 Handa vila Musa paayinulili kunani njoka wa shaba kula kulivagha, na Mwana wa Mundu ateyinuliwa kunani vila vila, 15 ili kila mundu yamukwinila aweli na ukomu wa machuwa hyogha bila mwihu. 16 Kwaikiva Sapanga apalili nesu mlima wogha hata akamuhumisa Mwana ghaki wa weka, lukani kila mundu mweni kumkwinila hayu Mwana akotoho kuyaghamila, ila apokeli ukomu wa machuwa hyogha bila mwihu. 17 Kwaikiva Sapanga kamyegha ng'ogha Mwana ghaki kutosa mlima wogha, ila kuulokola.

18 Yeyosi angumkwinila Mwana angulamulwa ng'ogha, ila yula kamkwinila ng'ogha katoswa kala, kwaikiva kamkwinila ng'ogha Mwana wa weka wa Sapanga. 19 Utoso weni ndiwa hau, mhana uhikili kumilimawogha ila wandu wakapala lwigha kupiti mhana, kwaikiva mighalu ghao ni mihakata. 20 Kwaikiva kila yula angughola mahakata anguhyomela hau mhana na wala kahika ng'ogha kumhana, ili mighalu ghaki ikotoho kuloleka lipala lipala. 21 Ila wala wangughola yala yawela gha chakaka wanguhika kumhana, lukani yala wayaghola yalangihi yiwa wamyitikila Sapanga.

22 Badili gha hagha, Yesu na wavulwa ghaki wayendili mbaka kumbwani wa Yudasia wakatama haku pamonga machuwa mayaghani, na kubatisa wandu. 23 Yohana na mweni awelili akibatisa wandu haku Ainoni kula pabehi na ku Selemu, ingumanyika haku kuwelili na masi yatangala, wandu watangala wamyendelili na mweni akawabatisa. 24 Lipindi hali Yohana awelili ambila kawopwa ng'ogha mlighuta lya wawopwa.

25 Hinu pahumilili masindano paghati gha wavulwa wa Yohana na Myahudi mmonga kwaikiva gha kuliwofula pambila gha kuyupa. 26 Hinu wavulwa wala wakamyendela Yohana na kumlongela, "Mvula, yula mundu awelili pamonga na wenga kumwambu gha lweni Yolidani, na wenga uilongilie mighalu ghaki, hinaa angubatisa na wandu watangala wangumyendela."

27 Yohana akawayanga, "Iwesekana ng'ogha mundu kuwela na kindu ikiwela Sapanga kampegha ng'ogha. 28 Mwenga maweni baha ni walangihi wa nenga kwaikiva niilongile, ‘Nenga ng'ogha kilisito ila niyeghwa ili nimlongoleli.’ 29 Mdala mweni kuposwa kanguwela wa bambu wa uposo, ila ghanja ghaki bambu wa uposo yula kagholoka pabehi na kuhyoghanila kuhuma kwa mweni, anguhekelela nesu paahyoghanila lilowi lya bambu wa uposo. Mghalu hau ungunihekelesa nesu. 30 Ingumpala Yesu awoneki mkulu nesu, na nenga niwoneki mnung'una nesu."

31 Mwana wa Sapanga kahika kuhuma kundumba ni mkulu apiti wogha, na yula ahuma kumlimawogha ni wa mlima wogha na angulongela mighalu gha mlima wogha. Ila yula anguhika kuhuma kundumba ni mkulu apiti wogha. 32 Mweni angulonga ghala kayalola na kuyahyoghanila kuhuma kwa Sapanga, ila wandu mayaghani hela ndiwa weni kukwinila ujumbi ghaki. 33 Ila mundu yeyosi kakwinila ujumbi ghaki anguhighilisa ghala angulongela Sapanga ni gha chakaka. 34 Yula kayeghwa na Sapanga angulonga milando gha Sapanga kwaikiva Sapanga angumpegha mundu hayu Mpumulo ghaki ili amlongosi kwa kila kindu angukighola na kulonga. 35 Tati angumpala Mwana na kampegha kila kindu akigholokeli. 36 Mundu yula kamukwinila Mwana kana ukomu wa machuwa hyoga bila mwihu, na yula kamkwinila ng'ogha Mwana atewela ng'ogha na ukomu wa machuwa hyogha bila mwihu, kwaikiva Sapanga ateyendelela kuwela na lilaka na mundu hayu.