1 Yesu pakayomola kuyupa, akayenda kumwambu gha kilweni kya Kediloni, pamonga na wavulwa ghaki. Mahala pala pawelili na kitawa, hinu Yesu akayingila mula pamonga na wavulwa ghaki. 2 Yula Yudasi, mweni kumhyuka Yesu, amanyili mahala pala kwaikiva mihanja itangala Yesu akonganili na wavulwa ghaki haku. 3 Hinu, Yudasi akayenda kutola lipinga lya watovangondu na wagholokela kuhuma kwa watambika wakulu na Mafalisayo, wakahika na mweni kukitawa wakiwela na limbamba na miyengi na migoha. 4 Yesu akimanya yala hyogha yatemhumila, akajihumisa kuulongolo ghao akawakonya, "Ni ghani mngumhakula?"

5 Weni wakamyanga, "Ni Yesu wa Nazaleti,"

Yesu akawayanga, "Nenga ndiwa."

Yudasi mwenikumhyuka awelili kagholoka pala pamonga na weni. 6 Hinu Yesu pakalongela, "Nenga ndiwa," weni wakahuya kuhyetu, wakaguwa pahi. 7 Yesu akawakonya kangi, "Mungumhaka ghani?"

Weni wakalonga, "Yesu Mnazaleti."

8 Yesu akawalongela, "Nenga niwalongela kala yiwa ni nenga, hinu ikiwela mngunihakula nenga muwaleki hagha wandu wayendi zyau." 9 Alongile vila lukani yahumili yala alongili, "Wala unipeghili nimyaghamisa ng'ogha hata mmonga."

10 Simoni Petelo awelili na lipanga, hinu, akalihomola, akamdumula lipulikilo lya mbandi gha kuliyila mtumikila wa Mtambika Mkulu. Mtumikila hayu akemilwi Maliko. 11 Hinu Yesu akamlongela Petelo, "Uhuyisi lipanga mumhaku ghaki. Ghuli, ungumanya ng'ogha yiwa ningupalwa nihakilwi handa vila Tati ailamulile yiwa nihakilwi?"

12 Hinu lila lipinga lya watovangondu wa Loma na mkulu ghao pamonga na wala wagholokela wa wakulu wa Wayahudi wakamkamula Yesu na kumuwopa. 13 Hinu wakamyegha huti kwa Anasi, mkwahanu wa Kayafa. Kayafa awelili Mtambika Mkulu wa lipindi lila. 14 Hayu Kayafa ndiwa yula haku kuhyetu awelili kawalongela Wayahudi yiwa mbaha mundu mmonga ahovi kwaikiva gha wandu wogha.

15 Simoni Petelo pamonga na mvulwa ghangi wakamkovekela Yesu. Hayu mvulwa mghangi awelili akimanyikana na Mtambika Mkulu, hinu akayingila pamonga na Yesu kulyugha lya lighuta lya Mtambika Mkulu. 16 Ila Petelo agholokili panji pabehi na mlyango, hinu yula mvulwa mghangi mweni kuwela akimanyikana kwa Mtambika Mkulu akahuma panji na kulongela na mhinja muwopola mlyango, na mhinja hatu kamlekesela Petelo ayingili mghati. 17 Yula mhinja akamkonya Petelo "Ghuli, wenga kwa mmonga wa wavulwa wa mundu hayu?"

Petelo akayanga "Nenga ng'ogha."

18 Lichuwa lila kuwelili na lupepu hinu watumikila pamonga na wagholokela wawelili wakiyota lyoto, na Petelo akajichotika paghati na weni wakitindila lyoto lila.

19 Hinu Mtambika Mkulu akamkonya Yesu mighalu gha wavulwa ghaki na mavulo ghaki. 20 Yesu akayanga, "Nenga nilongela lipalalipala machuwa hyogha kunu wandu wakiwela wanguniyughanila. Niwelile nikivula kumaghuta gha kukonganikila Wayahudi pamonga na kulighuta lya Sapanga haku ni mahala wangukonganika Wayahudi wogha na nilongile ng'ogha kwa kifisu." 21 Hinu, kwa kyani ungunikonya nenga? "Wakonyi wala wenikuniyoghanila niki niwalongile. Weni wangumanya kila niwalongela."

22 Pakayomola kulonga ghala mgholokela mmonga mweni kuwela kagholoka pala akamtova kuwuso, kunu akikonya, "Ghuli, kwa kyani ungumyanga Mtambika Mkulu nagha?"

23 Yesu akamyanga, "Handa nilongile lya uhakata, ulangihi uhakata hau, ila handa nilongile uchakaka kwa kyani ungunitova?"

24 Hinu Anasi akamyegha Yesu akiwela kawopwa kwa Mtambika Mkulu Kayafa.

25 Lipindi lila Simoni Petelo akiwela pala anguyota lyoto, wamonga wa wala wawelili pala wakamkonya, "Ghuli, wenga ng'ogha mmonga gha wavulwa ghaki?"

Petelo akakanila "Nenga ng'ogha."

26 Mmonga wa wala watumikila wa Mtambika Mkulu, mlongu ghaki yula mundu mweni kudumulwa lipulukilo na Petelo, akamkonya, "Ghuli, nenga nikuwonili ng'ogha kula kukitawa mkiwela pamonga na mweni?"

27 Petelo akakanila kangi liyanja lingi, "Ng'ogha nenga" Na njogholu akalila.

28 Hinu malawila pee, wakamtola Yesu kuhuma kwa Kayafa, wakamyegha kulighuta lya kilongosi wa Waloma. Ila weni wayingila ng'ogha mghati gha lighuta lyaki, kwaikiva watili kuyingila kutewaghola wajumilwi ng'ogha kukumyupa Sapanga na hinu wakasindwa kulyegha mhambu wa Pasaka. 29 Hinu kilongosi wa Waloma mwenikukemwa Pilatu akawayendela panji, akalonga, "Ni mahakata ghani mundu hayu kaghola mbaka mumyeghi kwa nenga?"

30 Weni wakayanga "Handa hayu angaliwela ng'ogha na mahakata tungalimyegha ng'ogha kwa wenga."

31 Hinu Pilatu akawalongela, "Hinu, mumtoli mwenga, mkamtosi kwa kukovekelana na malaghilo lya mwenga."

Wayahudi wakamlongela. "Twenga malaghililo gha twenga yangutulemesa kukoma mundu." 32 Wala wandu walongile nagha ili lila lilando alongile Yesu kulangiha ni kihu kyani atehova lipati kuwoneka.

33 Kwa nagha Pilatu akayingila kangi mghati akamkema Yesu, na kumkonya, "Wenga ndiwa Nkosi wa Wayahudi?"

34 Yesu akayanga, "Ghuli, milando hai ungulongela ni ghako mweni au uyoghanila kwa wandu waghangi habali zyangu?"

35 Pilatu akayanga, "Ghuli, unguliwachila nenga ni Myahudi? Wandu wa kumlima ghako na watambika ndiwa weni kukuyegha kwa nenga. Ghuli wenga ughola liki?"

36 Yesu akamyanga "Unkosi wa nenga ng'ogha wa mlima wogha hau. Handa unkosi wa nenga ungawela wa mlima wogha hau watumikila ghangu wangalinitovanila ili nikotoho kukamulwa na Wayahudi. Ila unkosi ghangu ng'ogha wa mlima wogha hau."

37 Hinu Pilatu akamkonya, "Ghuli, wenga kwa Nkosi?"

Yesu akayanga, "Wenga ulongila yiwa nenga na Nkosi. Nenga niwelekwa kwaikiva gha lihengu hali, na kwaikiva gha nagha nihika kumlimawogha niwalongeli wandu chakaka na kila mmonga mweni kukwinila uchakaka hayu angunihyoghanila."

38 Pilatu akamkonya Yesu, "Ghuli, uchakaka ni niki?"

Badili gha kulonga ghala Pilatu akayenda panji kangi akawalongela wala vilongosi wa Wayahudi, "Nenga nilola ng'ogha lilando lya kumtosa mundu hayu. 39 Ila musyovelela kuniluwa niwawoposeleli muwopwa mmonga lipindi lya mhambu wa Pasaka. Ghuli, hinaa mngupala niwawoposeleli Nkosi wa Wayahudi?"

40 Weni wakatova lilowi wakilonga, "Ng'ogha mundu hayu, tungupala utuwoposeleli Balaba!" Balaba awelili mpokola.