1 Badili gha hagha Yesu akahubhuka kulihiwa Galilaya lihina lyaki lighangi lingukemwa lihiwa Tibelia. 2 Lipinga likulunga lya wandu likamkovekela kwaikiva walolili makangaso agholili kwa kuwalamisa wavina. 3 Hinu Yesu akakwela kulitumbi akatama pamonga na wavulwa ghaki. 4 Lipindi hali mhambu wa Wayahudi waukema pasaka uwelili pabehi kuhika. 5 Hinu Yesu paalolili lipinga likulunga lya wandu lingumhikila, akamlongela Filipo "Tutehemela kugha mibumunda ili wandu hagha wawesi kulyegha?" 6 Alongile nagha kwa kumyesa Filipo, kwaikiva amanyili kala lila atelighola.

7 Filipo akamyanga, "Ghuli, wenga unguliwachila ng'ogha yiwa kutepalwa kuwela na msahala wa lichuva lyogha kwa mundu mmonga kuhemela libumunda kwa kila mmonga apati mayaghani?"

8 Mmonga wa wavulwa ghaki akemilwi Andelea, hayu awelili mlongu ghaki Simoni Petelo, akamlongela Yesu, 9 Andelea akalonga, "Baha kuwela na msongolo, mmonga kana mibumunda mihano gha shayili na vihomba vinung'una viivili, ila havi vitekwila niki kwa wandu watangala handa hagha?"

10 Yesu akalonga, "Muwatamisi wandu." Na mahala pala pawelili na manyahi mahupi hupi. Lipinga lila liwelili na walumi ielufu mhano. 11 Yesu akatola hila mibumunda, akamshukwile Sapanga, akawapegha wandu wawelili watama pala, akaghola hilahila kwa wala homba, kila mundu akapokela handa apalili kulyegha. 12 Wandu pawayukwite Yesu akawalongela wavulwa ghaki, "Mkunguli mulyo uhighalili ili ukotoho kuyaghamila chochose." 13 Hinu wavulwa wakakungula vipandi vya mibumunda na homba wahighalili na kumemesa vibeja ikumi na ivili.

14 Hinu wandu wala pawalolili mkangaso hula augholili Yesu, wakailongela, "Chakaka, mundu hayu ndiwa mlota wa Sapanga yula tumuwachililile atehika kumlimawogha." 15 Yesu akimanya yiwa waipalile kumtola wamgholi nkosi ghao, akahuka kangi, akayenda kulitumbi weka ghaki.

16 Paiwela lumihi wavulwa wa Yesu wakahuluka kuyenda kulihiwa. 17 Lipindi lila lwigha liyingilili kala na Yesu awelili kahika ng'ogha ili aweli na weni, wakakwela whatu ili wahubhuki kuyenda Kapelinaumu, 18 Liyegha likalipa liwelili linguwumba na masi gha lihiwa yakatumbula kutimbuka. 19 Wavulwa wa Yesu wayendelelili kuulongolo kunu wakitova mbondu kuutali wa kilomita itano au isita, wamwonili Yesu akityanga kunani gha masi, anguhika pabehi na whatu, wakatila nesu. 20 Ila Yesu akawalongela, "Ni nenga, mkotoho kutila." 21 Hinu kwa luheku wakamkalibisa Yesu muwhatu na lipindi mayaghani whatu hila ikahika kumlima myumu wawelili wanguyenda.

22 Kilau ghaki lipinga lya wandu wala wahighalili mbandi gha ivili gha lihiwa ndiwa wakamanya yiwa kuwelili na whatu imonga hela pala na Yesu kayingila ng'ogha ku whatu pamonga na wavulwa ghaki, ila wavulwa wawelili wayenda weka ghao. 23 Wandu waghangi wakahika na whatu zighangi kuhuma Tibelia, wakahika kumahala pala walyeghili hila mibumunda badili gha Yesu kumshukwile Sapanga. 24 Hinu wala wandu pawamanyili yiwa Yesu na wavulwa ghaki wawela ng'ogha mahala pala, wakakwela muwhatu zila, wakayenda ku Kapelinaumu wakimhaka.

25 Wala wandu pawamlola Yesu kumwambu gha ivili gha lihiwa wakamkonya, "Mvula uhikili ligha haku?"

26 Yesu akawayanga, "Uchakaka ninguwalongela, mungunihaka ng'ogha nenga kwa vila muwonili makakangaso, ila kwaikiva mlyeghili hila mibumunda na mkayukwite. 27 Mkotoho kughola mahengu kwaikiva gha kupokela mulyo weni kuwola, ila mgholi mahengu kwaikiva gha milyo weni kuwola ng'ogha, mulyo hau utewapegha ukomu wa machuwa hyogha bila mwihu kuhuma kwa Sapanga. Mwana wa Mundu ndiwa atewapegha mulyo hau, kwaikiva Tati Sapanga kampegha uweso wa kughola nagha."

28 Ndiwa weni wakamkonya, "Tugholi kyani ili tuwesi kughola lila Sapanga angulipala?"

29 Yesu akawayanga, "Mghalu angupala Sapanga muugholi ni kunikwinila nenga mweni kulaghilwa na mweni."

30 Hinu wakamlongela, "Uteghola mkangaso liki ili tukiloli tupati kukukwinila? Uteghola mghalu ghani?" 31 Wambuyi wa twenga walyeghili mulyo wenikukemwa mana kula kulivagha, handa vila iyandikilwi, "Awapeghili mibumunda kuhuma kundumba ili walyeghi."

32 Yesu akawalongela, "Uchakaka ninguwalongela, Musa kawapegha ng'ogha libumunda kuhuma kundumba, ila ni Tati wa nenga avile hinaa anguwapegha mwenga libumunda lya chakaka kuhuma kundumba." 33 "Kwaikiva libumunda lya Sapanga ni yula anguhuluka kuhuma kundumba ili awapeghi wandu wa mlima wogha ukomu."

34 Hinu wakamlongela, "Bambu, kuhumila lelu utupeghi hali libumunda machuwa hyogha."

35 Yesu akawalongela, "Nenga ndiwa libumunda linguwapegha ukomo, mundu atehika kwa nenga na kukwinila hayu atekolwa ng'ogha na njala, na kuyumililwa ng'ogha machuwa hyogha bila mwihu." 36 Ila handa niwalongilile yiwa mnilola ila mmbila kunikwinila. 37 Wogha wala angunipegha Tati watehika kwa nenga, na yula ahika kwa nenga nitemuwinga ng'ogha. 38 Kwaikiva nenga nihuluka ng'ogha kuhuma kundumba ili nigholi kila ningukipala nenga, ila nigholi kila angukipala Sapanga mweni kunilaghila. 39 Hagha ndiwa angupala Sapanga mweni kunilaghila, nikotoho myaghamisa hata mmonga paghati gha wala anipeghili ila niwahinduli wogha lichuwa lya mwihu. 40 "Kwaikiva kila angukipala Tati wa nenga ndiwa haki yiwa yula kamlola Mwana na kumkwinila aweli na ukomu wa machuwa hyogha bila mwihu, na nenga nitewahindula lichuwa lya mwihu."

41 Hinu Wayahudi wakatumbula kung'ung'ulika kwa vila Yesu alongile, "Nenga ndiwa libumunda lila lihuluka kuhuma kundumba." 42 Wakalonga, "Ghuli, hayu ng'ogha Yesu mwana wa Yusufu? Tungummanya tati ghaki na nyongu ghaki! Hinu anguwesaghuli kulonga yiwa kahuluka kuhuma kundumba?"

43 Yesu akawalongela, "Mkotoho kuling'ung'ula weni kwa weni." 44 Kwahela mundu kanguwesa kuhika kwa nenga ikiva Tati yula mweni kunilaghila kamlongosa ng'ogha kuhika kwa nenga, na nenga nitemuhindula lichuwa lya kumwihu. 45 Kukihitabu kya Sapanga mlota mmonga wa Sapanga ayandikili, "Wandu wogha watevulwa na Sapanga." Hinu kila yula angumhyoghanila Sapanga na kujivula kuhuma kwa Tati anguhika kwa nenga. 46 Hai ingumanisa ng'ogha yiwa kuwela na mundu amlolile Tati, ila mweni weka yaki ndiwa amwonili Tati. 47 Ninguwalongela uchakaka, yula angunikwinila kana ukomu wa machuwa hyogha bila mwihu. 48 Nenga ndiwa libumunda lya ukomu. 49 Wambuyi wa mwenga walyeghili mana kula kulivagha ila wakahwegha. 50 Ila hali ni libumunda weni kuhuluka kuhuma kundumba ili yoyosi atelyegha akotoho kuhwegha. 51 "Nenga ndiwa libumunda lyeni kuyegha ukomu lila lihuluka kuhuma kundumba, mundu yoyosi paalyegha libumunda hali atelikala machuwa hyogha bila mwihu. Na libumunda ningumpegha ni higha ghangu hau niteupegha kwaikiva gha ukomu wa wandu wa mlima wogha."

52 Hinu Wayahudi wakatumbula kusindana milando weni kwa weni wakilonga, "Anguwesaghuli mundu hayu kutupegha twenga higha ghaki tulyeghi?"

53 Hinu Yesu akawalongela, "Uchakaka, ninguwalongela, pamlyegha ng'ogha higha gha Mwana wa Mundu na kunywegha mwahi ghaki, mtewela ng'ogha na ukomu mghati mwa mwenga. 54 Mundu yoyosi angulyegha higha gha nenga na kunywegha mwahi gha nenga kana ukomu wa machuwa hyogha bila mwihu. Nenga nitemhindula lichuwa lya mwihu. 55 Kwaikiva higha gha nenga ni mulyo wa chakaka, na mwahi ghangu ni kinywegha kya chakaka. 56 Yeyosi mweni kulyegha higha gha nenga na kunywegha mwahi gha nenga, atelikala mghati mwa nenga na nenga nitelikala mghati ghaki. 57 Tati mweni ukomu kanilaghila nenga, na nenga ningulama kwaikiva gha Tati, hinu yula angunilyegha nenga atelama kwaikiva gha nenga. 58 Hinu, hali ndiwa libumunda lihuluka kuhuma kundumba, na hali ng'ogha lila libumunda wambuyi wa mwenga walyeghili kuluvagha hata nagha wakahova. Yula atelyegha libumunda hali atelama machuwa hyogha bila mwihu."

59 Yesu alongile milando hai pawelili akivula ku mlighuta lya kukonganika Wayahudi haku kapelinahumu.

60 Hinu watangala wa wavulwa ghaki pawayughanila wakalonga, "Mavulo hagha yangumanyikana ng'ogha kiuyuyughu. Ni ghani atewesa kuyapokela?"

61 Yesu amanyili bila kulongelwa na mundu yiwa wavulwa ghaki wangung'ung'ulikila lilando hali linguwahyomesa, akawakonya, "Ghuli, mghalu hau linguwaghola muweli na mang'ung'uliko? 62 Itewelaghuli hinu, pamumlola Mwana wa Mundu akikwela kuyenda kula awelili mtumbula? 63 Mpumulo wa Sapanga ndiwa yula mweni kuyegha ukomu, higha unguwesa ng'ogha chochosi. Milando niwalongilile ni milando yenikuhuma kwa Mpumulo wa Sapanga na yanguyegha ukomu. 64 Hata nagha, kuwela na wandu paghati gha mwenga weni kukwinila ng'ogha." Yesu ailongile nagha kwaikiva aimanyile kuhuma mtumbulo ni mkina ghani weni kukwinila ng'ogha, na vilavila ni ghani yula atemhyuka. 65 Hinu akayendelela kulonga, "Kwaikiva gha nagha niwalongelili yiwa kwahela mundu kanguwesa kuhika kwa nenga akiva kalongoswa ng'ogha na Tati ghangu."

66 Kuhumila lipindi lila wavulwa ghaki watangala wahuyili kuhyetu, wakaleka kutyanga na mweni kangi. 67 Hinu Yesu akawalongela wala ikumi na ivili, "Ghuli na mwenga mngupala kuhuka vila vila?"

68 Simoni Petelo akayanga, "Bambu, tuhuki tuyendi kwa ghani? Wenga uwela na milando gha ukomu wa machuwa hyogha bila mwihu." 69 "Twenga tungukwinila na tumanya yiwa wenga ndiwa yula mhaghulwa mweni kuhuma kwa Sapanga."

70 Yesu akawalongela, "Ghuli, niwahaghula ng'ogha mwenga ikumi na ivili? Hata nagha, mmonga wa mwenga angulongoswa na Lihyukana." 71 Yesu angulongela hagha kwa habali gha Yudasi, mwana wa Simoni yula ahikili kumyuka, pamonga na yiwa awelili mmonga wa wala ikumi na ivili.