1 Lichuwa lya itatu kuwelili na mhambu wa uposo kummbwani wa kana, kumlima wa Galilaya. Kumhambu hau nyongo ghaki Yesu na mweni awelili pala. 2 Yesu pamonga na wavulwa ghaki wawelili wamluwa Yesu na wavulwa ghaki wayendi kumhambu wa uposo hula. 3 Divai paipelili, nyongo ghaki Yesu akamlongela, "Wandu wawela ng'ogha na divai."

4 Yesu akamyanga, "Nyongo, ukotoho kunilongela lila lya kughola. Lisaa lyangu lya kughola lihengu lyambila."

5 Pala nyongo ghaki akawalongela watumikila, "Chochosi atewalongela, mgholi."

6 Pala pawelili na ndeleku isita gha masi yeni kugholwa kwa maganga. Masi ghala yawelili pala kwa lukani lwa kujighulula handa wayovilile Wayahudi, kila lindeleku liwesa kuyingila madebi maivili au maitatu. 7 Yesu akawalongela, "Mumemesi ndeleku hasi masi." Weni wakamemesa neku neku. 8 Hinu Yesu akawalongela, "Hinaa mteki, mumyegheli mkulu wa mhambu," ndiwa wakateka masi na kumyeghela mkulu wa mhambu hula. 9 Yula mkulu wa mhambu hula akanywegha ghala masi yenikuwela yaghalambuka kuwela divai. Mweni kamanya ng'ogha kugha ihumili, ila wala watumikila watekili masi wamanyili. Mkulu wa muhambu akamkema bambu wa muhambu wa uposo mmbali, 10 akamlongela, "Wandu wanguyegha mtumbulo divai maha hata paiwakwila, na kuulongolo ikikovekela hila divai yuyughu. Ila wenga unguyegha divai gha maha mbaka hinaa."

11 Yesu agholili kilangihi haki kya utumbulo haku kana, Galilaya, akalangiha ukulu ghaki na weni wavulwa ghaki wakamkwinila.

12 Badili gha hagha, Yesu pamonga na nyongo ghaki, walongu ghaki na wavulwa ghaki, wakahuluka mbaka Kapelinaumu wakalikala haku machuwa mayaghani.

13 Paihika pabehi na lichuwa lya mhambu wa Pasaka gha Wayahudi, hinu Yesu akakwela kuyenda Yelusalemu. 14 Haku kweni lyugha kulighuta lya Sapanga akawalola wandu wakiwusa ng'ombi, kondolu na ngunda, na amonga walikalili mesa wakibadilisana mapesa. Mundu angubadilisa mapesa 15 Akaghola hyatu gha ngoi, akawatimula wogha panji gha lyugha lighuta lya Sapanga pamonga na kondolu na ng'ombi wa weni, akabidula mesa na kutaghilila kutali mapesa ghao, 16 akawalongela wala wawelili wanguwusa ngunda, "Muyahumisi hagha. Mkotoho kughola lighuta lya Tati wa nenga kuwela mahala pakuwusila vindu!" 17 Wavulwa ghaki waikumbukwile yiwa Mayandiko gha Sapanga yangulonga, "Upalo ghangu kulighuta lyako uteni nyanya mghati ghangu handa lyoto."

18 Ndiwa vilongosi wa Wayahudi wakamkonya Yesu, "Ghani kakulaghila wenga kughola mighalu handa hai?"

19 Yesu akawalongela, "Mlitenyuli lighuta hali lya Sapanga, na nenga nitelichenga kangi kwa lipindi lya machuwa itatu ."

20 Wala Wayahudi wakalonga, "Lighuta hali lya Sapanga lichengwili kwa lipindi lya machuva ialobaini na isita, ghuli wenga ungulonga utelichenga kwa lipindi lya machuwa itatu?"

21 Ila Lighuta lya Sapanga alilongelili Yesu liwelili ni higha ghaki. 22 Badili gha Yesu kuhinduka, wavulwa ghaki wakumbwikile ghala awelili akilongela na ndiwa wakayakwinila Mayandiko gha Sapanga na milando hyogha awelili akilongela.

23 Hinu Yesu paawelili Yelusalemu kumhambu wa Pasaka, wandu watangala wakamkwinila kwa vile walola vilangihi na makangaso ayagholile. 24 Ila Yesu kawakwinila ng'ogha kwaikiva awamanyili wogha kwa umaha. 25 Kahakula ng'ogha mundu yeyosi ili amlongeli vila wandu wawela, kwaikiva awamanyile wandu kinaga ubaga kumioyu ghao.