1 Lichuwa lya mhambu wa Pendekositi palihika, wala wamkwinila Yesu wogha walikungulili mahala pamonga. 2 Bwitu, lilowi likayughanika kuhuma kunani, lilowi livile handa liyegha likalipa linguwumba, likaimemesa lila lighuta lyogha wawelili walikala. 3 Hinu, vikahumila vindu viwoneka handa mivalika gha lyoto na vyeni vikilandala na kumuhulukila kila mmonga ghao. 4 Wogha wakamemeswa Mpumulo wa Sapanga, wakatumbula kulonga luga ghangi handa Mpumulo vila kawawesesa.

5 Na kula Yelusalemu walikalili Wayahudi, wandu hagha wawelili wangumtundamila na kumyitikila Sapanga na wahumili kumilima wekaweka mlima wogha. 6 Pawayoghanila lilowi lila, lipinga likulunga lya wandu likalikungula. Wogha walikangasili nesu kwaikiva kila mmonga wa weni ahyoghanilili luga zyao zya kuwelekwa zikilongelwa na wala watumikila wa Sapanga. 7 Wakalikala lolowa na kulikangasa wakilonga, "Ghuli, hagha wogha tunguwayoghanila wakilonga nagha, wenikaya wa Galilaya ng'ogha? 8 Yiwaghuli, kila mmonga wa twenga anguwahyoghanila wakilonga kwa luga yaki gha kuwelekwa? 9 Wamonga wa twenga wahuma ku Apati na Amedi na Elamu, ghangi ni wenikaya wa Mesopotamia na Yudasia na Kapadokia na Ponto na Asia, 10 na Fulugia na Pamfilia na Misili na amonga gha mimbwani gha Libia pabehi na Kulene, wamonga ghangi ni wahenja kuhuma ku Ulumi, 11 Wayahudi na wandu wa milima ghangi wayingilili mudini gha Kiyahudi, wamonga wahumili ku Kilete na Arabia. Twenga wogha tunguwayoghanila wakilonga mighalu mikulunga gha Sapanga kwa luga gha twenga baha!" 12 Wogha wakakangaswa na wakalikala lolowa kunu wangukonyana, "Haki niki tungikiyoghanila?"

13 Ila wamonga wakawadanila wala watumikila wa Sapanga wakilonga, "Wandu hagha walowile dongela."

14 Hinu Petelo akagholoka pamonga na wala wandumindumi ikumi na imonga na kutumbula kuwalongela wandu kwa lilowi likulunga, "Walongu Wayahudi na mwenga wogha mlikala baha Yelusalemu, myoghanile kwa umaha haki nitewalongela." 15 Chakaka wandu hagha walowela ng'ogha handa mliwachila, kwaikiva ni saa itatu hela malawila. 16 Uchakaka ni hau mghalu hau ni hula ulongilwi na Yoeli mlota wa Sapanga,

17 "Kumachuwa gha mwihu, alonga Bambu,

nitewayitila wandu wogha Upumulo wa nenga.

Wana wa mwenga walumi na wadala watewalongela wandu Habali ghangu,

wahongolo wa mwenga watelola mawono na wagogolo wa mwenga watelota liloto."

18 Hina, hata kwa watumikila wa nenga walumi na wadala,

nitewayitila Mpumulo wa nenga machuwa ghala

na weni watelonga Habali ghangu. 19 Niteghola makangaso kunani mwa mahindu

na kilangihi pahi mumlimawogha,

kutekuwela na mwahi na lyoto na lyohi litopehu, 20 lijuwa litetaywa lwisa,

na mwehi utevile mkele handa mwahi, pambila gha kuhika lila lichuwa ngulunga na kwilikihi gha Bambu.

21 "Mundu yoyose atekuyupa kwa lihina lya Bambu atelokoka."

22 Petelo akayendelela kulonga, "Mwenga wandu wa Izilaili, mhyoghanili milandu hagha kwa umaha! Sapanga awalangilili mwenga yiwa angughola lihengu kwa kupitila Yesu wa Nazaleti. Mwenga wenibaha mngumanya yiwa kupitila Yesu ndiwa alaghilili vilangihi vya wekaweka kwa mwenga." 23 Sapanga ayandalili kala lukani lwaki yiwa Yesu atekamulwa na kuvikwa kumawoko gha wandu wahakata na mwenga mkamkoma kwa kumvamba kulipingika. 24 Ila Sapanga amhindulili Yesu kuhuma kuwahovili, akamkombola kumahakili gha kihu kwa ikiva ivile yuyughu ng'ogha kwa mweni kuwopwa na kihu. 25 Kwaikiva Daudi alongilili mighalu ghaki nagha,

"Nimwonilili Bambu kuulongolo ghangu machuwa hyogha,

avile na nenga upandi ghangu wa kuliyila hinu nitevile ng'ogha na holu."

26 Kwa nagha, moyu ghangu unguhekelela;

kangi ninguhekelela kwa mlomu ghangu,

hinu higha ghangu utelikala kwa ukwinila. 27 Kwaikiva uteuleka ng'ogha upumulo ghangu kumlima wa wahovili,

hilahila kumleka mmbulete nesu ghako awole haku kulimambi.

28 Wenga unilangilile njila zya ukomu,

utenipegha luheku nesu panivile pamonga na wenga.

29 "Walongo ghangu Waizilaili, ningupala kuwalongela lipalalipala mighalu imkolili Daudi, mbuyi wa twenga. Mweni akahova na kusikwa, kangi limambi lyaki livile baha kwa twenga mbaka lelu." 30 Ila kwaikiva Daudi awelili mlota wa Sapanga, amanyili yiwa Sapanga amlaghilili na kumlapila kilapo atemvika mmonga wa wawelekwa ghaki kukikalilo kyaki kya unkosi. 31 Daudi alolili kuulongolo mighalu itegholwa na Sapanga na kangi akalongelela kuhinduka kwa Kilisito pala paalongili,

"Alekilwi ng'ogha kumlima wa wahovili,

na higha ghaki uwolili ng'ogha kulimambi." 32 Hinu, Sapanga amuhindulili hayu Yesu na twenga wogha ni wandu tulola kwa mihu mghalu hula. 33 Badili gha Tati Sapanga kumpegha utundamilo mkulu kupiti wogha akapokela Mpumulo Mbuletenesu kuhuma kwa Tati, katuyeghela Mpumulo Mbuletenesu yula Sapanga alongilile yiwa atetuyeghela. Ndiwa hagha mnguyalola na kuyayoghanila. 34 Kwaikiva Daudi mweni baha, katolwa ng'ogha kuyenda kundumba, ila mweni ailongile,

"Bambu wa twenga Sapanga amlongelili Bambu ghangu,

tama upandi ghangu wa kuliyila." 35 "Mbaka niwaviki wahakata ghako pahi gha maghulu ghako."

36 Petelo akalonga, "Wandu wogha wa Izilaili wangupalwa kumanya kwa umaha yiwa hayu Yesu mumvambili, ndiwa hayu Sapanga amgholili kuvile Bambu na Kilisito Mkombola."

37 Hinu, wandu pawayoghanila milandu hila, wahomilwi kumioyu ghao, wakawakonya Petelo na wala wandumindumi ghangi, "Walongo wa twenga, tughole kyani?"

38 Petelo akayanga, "Kila mmonga wa mwenga aleki uhakata na kumkovekela Sapanga na kangi abatiswi kwa lihina lya Yesu Kilisito. Na Sapanga atekulekesela uhakata ghako. Na kupokela lila lilaghano lya Sapanga avile yula Mpumulo wa Sapanga. 39 Kwaikiva lilaghano lila ni kwa mwenga na wana wa mwenga na wogha wavile kutali na wala wogha Bambu Sapanga atewakema."

40 Petelo akawalongela kwa milandu ghangi mitopehu akilonga, "Mjilokoli kuhuma kukiwelekwa haki kihakata!" 41 Lichuwa lila wandu watangala wakwinilili habali zya Petelo, wakabatiswa. Na wandu ielufu itatu wakayongeseka mulipinga lya wakwinila wa Yesu. 42 Wogha wayendilelili kuivula kuhuma kwa wandumindumi wa Yesu, kulikala pamonga kiulongu, kulyegha mulyo pamonga na kuyupa.

43 Kila mmonga akakangaswa na Makangaso yatangala yagholilwi na wandumindumi hata kila mundu akamtundamila Sapanga. 44 Wakwinila wogha wayendilelili kulikala pamonga na vindu ghao wapeghanilili. 45 Wahusili vindu ghao na kupeghana mapesa kulandana na kila kipungula kwa kila mmonga. 46 Wayendilelili kukongana pamonga kila lelu Mlighuta lya Sapanga ila lipindi lya kulyegha mulyo, wakonganili mumaghuta ghao na kulyegha kwa luheku na moyu ukiva pekesu. 47 Wamuyinulili Sapanga, wakapalwa na wandu wogha. Kila lelu Bambu awayongiselili wandu walokolile.