1 Kulipindi lilalila Nkosi Helodi akatumbula kuwahakila wamonga wa lipinga lya wamkwinila Kilisito. 2 Amkomili Yakobu mlongu ghaki Yohanakwa lipanga, 3 paalolili yiwa mghalu hula uwahekelelesa Wayahudi, akayendelela akamkamula Petelo kangi. Hai ihumililili lipindi lya mhambu wa mibumunda ivikilwi ng'ogha simika. 4 Badili gha kumkamula Petelo akamvika muuwopwa, pahi gha ugholokela wa vipinga vinjechi vya watovangondo vivile na watovangondo wanjechi kila kimonga na Helode aliwachilili kumvika panji kuluagha wamlamuli kuhova badili gha mhambu gha Pasaka. 5 Hinu, Petelo paawelili muuwopwa, lipinga lya wandu wamkwinila Kilisito liwelili lingumyupila kwa Sapanga kwa moyu.

6 Uhiku, pambila gha kuhika lichuwa lila Helodi angamuhumisa Petelo muluagha, Petelo awelili kawonja paghati gha watovangondo waivili. Awelili kawopwa minyololu miivili, na wagholokela wawelili wangugholokela kumlyangu wa mulighuta lya wawopwa. 7 Bwitu, Mtumikila wa kundumba wa Sapanga akagholoka pabehi na mweni na mhana ukalangasa kila kyumba kya lighuta lya wawopwa. Mtumikila wa kundumba wa Sapanga akamtika mulikombi akamyinula akilonga, "Ugholoki kwa kuloposela!" Bwitu ila minyololu imwopwili mumawoku ikadumuka na kugua pahi. 8 Mtumikila wa kundumba wa Sapanga akamlongela, "Uliwopi luwoyi ghako, na uvali makobasi ghako." Akaghola nagha. Hinu yula mtumikila wa kundumba wa Sapanga akamlongela, "Vala likoti lyako, unikovekeli." 9 Hinu Petelo akahuka na mweni wakayenda panji gha lighuta lya wawopwa ila amanyili ng'ogha yiwa ghala yangugholwa na yula mtumikila wa kundumba wa Sapanga yawelili gha uchakaka hinu aliwachilili yiwa ni mawonu. 10 Waphitilili kukipinga kya watovangondo wawelili wakigholokela mlyango wa mtumbula na waivili, hinu wakahika kumlyangu wa lyuma wa kuhumila muuwopwa kuyingilila mumbwani. Hau mlyango ukajifughula weni, na weni wakahuma panji wakava wakityanga kunjila imonga na bwitu yula mtumikila wa kundumba wa Sapanga akamleka Petelo wekaghaki.

11 Pala ndiwa Petelo paamanyili yahumilili, "Hinaa ningumanya kwa uchakaka yiwa Bambu amyeghili mtumikila ghaki wa kundumba akanilokola kumawoku gha Helodi na kuhuma kumighalu hyogha Wayahudi wayalindilili yanihumili."

12 Paamanyili nagha ayendili monga kwa monga mbaka mulighuta kwa Malia nyongo ghaki Yohanalihina lyaki ghangi ni Maliku. Mula wandu watangala wawelili walikungulili wakiyupa Sapanga. 13 Petelo akatova mlyango wa panji, na mtumikila mmonga mhinja akemilwi Roda, akayenda mumlyango kuhyoghanila. 14 Hayu mhinja paamanyili lilowi lya Petelo akahekelela nesu, hata kafughula mlyango ng'ogha, akabhutuka mbilo mghati na kuwalongela wayaki yiwa "Petelo awelili kagholoka panji mumlyango." 15 Na weni wakamlongela, "Uvile na lukwali wenga!" Ila akayendelela kulonga yiwa ni uchakaka. Hinu wakalonga, "Hayu ni Mtumikila wa kundumba ghaki."

16 Kwa lipindi lila Petelo awelili anguyendelela kutova mlyango. kumwihu wakafughula mlyango, wakamlola, na kulikangasa nesu. 17 Petelo akawapegha kilangihi kwa kuwapungila liwoku ili watami nuu, akawalongela vila Bambu amhumilili mulighuta lya wawopwa. Akawalongela kangi, "Hinu muwalongeli Yakobu na wamkwinila Kilisito ghangi" kuulongolo akahuka kuyenda mahala ghangi.

18 Pakuchia, kuwelili na holu ngulu paghati gha wala watovangondo kwa ghala yawoneka kwa Petelo. 19 Helodi akalaghila wamhakuli, ila wawesa ng'ogha kumlola. Nagha alaghilili wala watovangondo wakonywi, akalaghilila wakomwi. Hinu Petelo akahuka kula Yudasia, akayenda Kaisalia kula alikalili kwa lipindi lihupi.

20 Nkosi Helodi awelili na lilaka nesu na wandu wa mimbwani gha Tilo na Sidoni, ila weni wakamyeghela wajumbi. Na kwa mtumbulo wakawesa kumghola Bulasito avile upandi wa weni. Bulasito awelili mundu wa pabei na mgholokela mkulu wa lighuta lya Nkosi. Hinu, wakamyendela Helodi wakamluwa wavile na ndulumu, kwaikiva mlima ghao ulikwinilili mlima wa Nkosi kwa mulyo.

21 Lichuwa limonga lihaghulilwi, Helodi akiva kavala nguu zyaki zya Nkosi na kutama kukikalilo kya kinkosi, akawatangasila wandu. 22 Wala wandu wakamtovela lilowi likulunga lya luheku wakilonga, "Hali ni lilowi lya Sapanga, gha mundu ng'ogha." 23 Na Palapala Mtumikila wa kundumba wa Sapanga akamguwisa Helodi pahi kwaikiva kampegha ng'ogha ukwilikihi Sapanga. Akalyeghwa na wang'ongolo.

24 Lilandu lya Sapanga likayendelela kulandala na kukula.

25 Na Balinaba na Sauli pawayomolili lihengu lyao, wakahuya ku Yelusalemu, wakiva pamonga na Yohana, wamkema hilahila Maliku.