1 Nenga Paulo, mtumikila wa Kilisito Yesu na mndumindumi nihaghulilwi na kukemwa kwaikiva gha kutangasa Habali Maha gha Sapanga.

2 Habali hai Maha ndiwa hila Sapanga awalaghilili wandu kuhuma dahile kupitila walota kumayandiko ghaki. 3 Hai Habali Maha ingumlongelela Mwana wa Sapanga, Bambu wa twenga Yesu Kilisito, avile kwa umundu ghaki, awelili muwelekwa kuukolu wa Daudi, 4 na kwa uweso wa Mpumulo wa Sapanga, ahighilisilwi kuwela Mwana wa Sapanga kupitila uhinduki ghaki kuhuma kukihu. 5 Kwa njila ghaki Yesu, Sapanga anipeghili manemu gha kuvile mndumindumi ili nilongose milima hyogha ipati kumkwinila na kumtundamila, na kwa tendu hali lihina lyaki lipati kuyinuliwa. 6 Mwenga wogha hila hila ni paghati gha wandu wakemilwi ili mpati kuwela wandu ghaki Yesu Kilisito.

7 Hinu, ninguwayandikila mwenga wogha mvile ku Loma wenikuwela wangupalwa na Sapanga, akawahaghula muweli wandu ghaki.

Ninguwayupila kwa Sapanga Tati na kwa Bambu Yesu Kilisito awapeghi manemu na kulikala kwa kuponga.

8 Mtumbulo gha hyogha, ningumshukwile Sapanga wa nenga kwa njila gha Yesu Kilisito kwaikiva gha mwenga wogha, kwaikiva wandu wogha kumlima wogha wayoghanila ukwinila wa mwenga. 9 Sapanga yula ningumtumikila kwa moyu ghangu wogha kukutangasa Habali Maha gha Mwana ghaki, angumanya ningulonga uchakaka yiwa ninguwakumbwike 10 lipindi lyogha paniyupa. Ninguluwa Sapanga kumapalo ghaki, aniwesesi kuhika kwa mwenga. 11 Nivile na luhujulu lwa kuwatyangila ili niwatangi kughalilu gha mwenga gha kimpumulo, ili muwesi kugangamala kuukwinila, 12 ingumaanisa, mwenga mnitayi moyu kuukwinila ghangu na nenga niwatayi moyu kuukwinila wa mwenga.

13 Walongo ghangu, ningupala mmanyi yiwa mianja itangala nivikili lukani kuhika kwa mwenga, ila mbaka hinaa kuvili ma mghalu ungunikanisa. Ningupala kuhuma kwa mwenga niwaghole wandu wamkwinili Kilisito handa nigholili ku Wayahudi ng'ogha. 14 Kwaikiva ningupalwa kuwayendela huti wandu wogha. Wagiliki na wala Wagiliki ng'ogha, weni luhala na wala wavile ng'ogha na luhala kuwatangasila Habali Maha. 15 Ndiwa kwaikiva ningupala nesu kutangasa Habali Maha hilahila kwa mwenga mvile ku Loma.

16 Nenga nivile ng'ogha na honi kutangasa Habali Maha, kwaikiva hai ivile na uwesa wa Sapanga weni kuyegha ulokola kwa kila mweni kukwinila, kwa Myahudi mtumbulo na kwa Mgiliki hila hila. 17 Kwaikiva Habali Maha ingulangiha lipala yiwa Sapanga anguwaghola wajumiliki kuulongolo ghaki kwa njila gha kukwinila, kuhuma mtumbulo mbaka kumwihu, handa iyandikwa ku Mayandiko, "Mweni kujumilwa na Sapanga atelikala kwa ukwinila."

18 Lilaka lya Sapanga lihighiliswa Kuhuma kundumba kunani gha uhyuka na uhakata wogha wa wandu wenikuwela kwa njila zyau zihakata wanguungingama uchakaka ukotoho kumanyikana. 19 kwaikiva mghalu hyogha yeni kuwesa kumanyikana kumlongelela Sapanga ni lipala kwa weni, kwaikiva Sapanga mweni kalivika lipala kwa weni. 20 Pamonga na yiwa alumbili mlima wogha, uwesa ghaki wa machuwa yayendelela na ulungu ghaki, pamonga na yiwa viwoneka ng'ogha kwa mihu, vingumanyika lipala. Wandu wanguwesa kumanya mighalu hai kukovekelana na vindu havi alumbili Sapanga. Kwa nagha wavile ng'ogha na njila yoyosi gha kulitetela. 21 Pamonga na yiwa wammanyili Sapanga, wamtundamila ng'ogha handa Sapanga wala kumshukwile, ila mawachilo ghao yawelili yabyodoka na mioyu ghao gha undyungi itayilwi lwisa wakawesa ng'ogha kumanya ujumbi wa Sapanga. 22 Wangulikwinisa yiwa weni luhala, ila ni wandyungi. 23 Badili gha kumyupa Sapanga mweni kulikala machuwa hyogha bila mwihu, ila wahyukila kuyupa ming'omung'omu yeni kugholwa na wandu mweni kulikala ng'ogha machuwa hyogha bila mwihu na mlandano wa mbongo, mikokolo na viumbi vya kukwava. 24 Kwaikiva gha nagha, Sapanga kawaleka wakovekeli lumatamata lwao luhakata lwa mioyu ghao na kugholana mighalu gha honi ku mihigha ghao. 25 Waleka kukwinila uchakaka wa Sapanga wakakovekela uhwangi, wakatundamila na kutumikila viumbi badili gha Mulumba, avile ndiwa angupalwa kutundamilwa machuwa hyogha bila mwihu! Hina. 26 Kwa nagha, Sapanga akawaleka wakovekeli lumatamata luhakata. Hata wadala wahyukile kutumila mihigha ghao handa Sapanga aipalile. 27 Na hagha walumi hilahila, wakaleka kukovekela vila wangupalwa kugholelana wangwana na wahumbu, wakawonelana luhujulu weni kwa weni. Walumi wakagholana mighalu gha honi, na nagha wangujiyeghela wenibaha kunyokolwa kwa vitendu vya weni vihakata. 28 Kwaikiva wandu wakanili kummanya Sapanga, Sapanga akawaleka wakovekeli kumawachilo ghao mahakata, wakaghola ghala yavile wapalilwi ng'ogha kughola. 29 Wandu hagha wamemeswa matendu mahakata, wamema uwonefu, lumatamata luhakata na lumatamata lwa kila kindu kiweli kya wenga. Kulolelana wifu, kukomana, magombi, kungongana, mawachilo mahakata. Weni hilahila ni weni kulongelela milandu gha wandu, 30 na weni kukupikilana na wandu weni kumpala ng'ogha Sapanga, na weni kinyengu na utatala na mikwinakwina na weni uhakata na weni kulema kuwayitikila watati na wanyongo ghao, 31 wandyungi, wangutimilisa ng'ogha kila wangukilongela, wavile ng'ogha na upalo na luhungu kwa waghangi. 32 Wangumanya yiwa selia gha Sapanga ingulonga yiwa wandu weni ndyangilu handa hai, wangupalwa kuhova, pamonga na kuvile na liyandiko hali weni wangughola hagha na ngulu gha hagha, wangujumilana na wala weni kughola hagha.