1 Walongo ghangu, ningumanya yiwa mungumanya chakaka hagha mbala kulongela kwa mwenga, kwaikiva mwenga ni wandu weni kumanya selia gha Sapanga ampeghili Musa kwa umaha. Selia limlongosa ng'ogha mundu yula kahova kala ila ni kwa mundu yula kamkomu. 2 Mhumbu aposilwi, kwa mlandano, mhumbu anguwopwa na selia kwa mngwana ghaki kwa lipindi lyogha lya ukomu ghaki, ila hayu mngwana pakahova, hayu mhumbu anguwela pekesu kuhuma kuselia hila limkolili. 3 Hinu mhumbu hayu pakaposwa na mngwana ghangi lipindi mngwana ghaki kamkomu, hayu angukemwa mngongola, ila mngwana ghaki pakahova, mhumbu hayu kapekesu kuhuma selia, na paikawela kaposwa na mngwana ghangi, hayu mhumbu kamngongola ng'ogha. 4 havi ndiwa iwela kwa mwenga hila hila hata mwenga muwopwa ng'ogha na selia kwaikiva muhova pamonga na Kilisito kulipingika, hinaa mwenga ni wandu ghaki Sapanga hayu mweni kuhindulwa ili muwesi kughola lihengu maha lya Sapanga. 5 Kwaikiva patulamili ngalilu gha kihigha, lumatamata lwa kughola sambi isoselilwi na selia mghati mwa twenga na kutuyeghela kihu. 6 Ila hinaa, tuwela pekesu kuhuma kuvihungu vya selia, kwaikiva tunguwela tuhova kukovekelana na mighalu hila ituwopili. Hinu tunguwesa kumtumikila Sapanga kwa kukovekela njila hyonu pahi gha unkosi wa Mpumulo ghaki, tukileka kukovekela njila zya dahile pahi gha unkosi wa selia iyandikilwi.

7 Hinu tulongi kyani? Yiwa selia gha Sapanga ampeghili Musa ni sambi? Ng'ogha! Ila pangaliwela ng'ogha sambi selia ingamanyika ng'ogha. Ningalimanya ng'ogha yiwa lumatamata ni liki ikiva selia ingaleka kulonga, "Lumatamata lunguhakata." 8 Ila kwa kuwela kwa selia, sambi ikapeghwa njila hata kuyinula njila wekaweka zya lumatamata mghati mwa nenga kwa njila gha selia, kwaikiva paiwela ng'ogha selia sambi inguwela ni kindu kihova. 9 Haku dahile nilamili handa nipalile mweni ila selia paihikile nikamanya yiwa ni mweni sambi na nenga nikahova. 10 Nikalola yiwa selia zyenikupalwa kunyeghela ukomu, kwa nenga zikaniyeghela kihu. 11 Kwaikiva sambi kwa kupata fwasi kuselia, iningongili na kwa kupitila hai selia, ikanikoma. 12 Selia hazi zinguhuma kwa Sapanga ni zyamaha na zinguwoneka handa zingupalwa kuwela. 13 Chakaka kindu haki kya maha kitewesa ng'ogha, kuniyambusila kihu! Ila sambi ndiwa iniyambusilile kihu kwa njila gha selia maha. Liwelili lukani lwa Sapanga yiwa selia ziweli zingulangiha yiwa sambi ni kindu kihakata.

14 Chakaka ng'ogha nenga mweni kughola mahakata, ila sambi yenikulikala mghati gha nenga. 15 Chakaka nimanya ng'ogha kindu nikighola, kwaikiva kila mbala kukighola, nikighola ng'ogha, ila kila nikihyomela, ndiwa ningukighola. 16 Hinu handa ningughola kila nipala ng'ogha kughola, ningujumila yiwa selia ni maha. 17 Ila kwa uchakaka, ng'ogha nenga mweni kughola lila nilipala ng'ogha ila ni hila sambi itamili mghati mwa nenga. 18 Ningumanya yiwa mghati mwa nenga likala ng'ogha mghalu maha, pamonga na yiwa kupala kughola mghalu maha ningupala, ila lila lya maha kulighola niwesa ng'ogha. 19 Ingumaanisa, badili gha kughola hula mghalu maha niupala kuughola, ningughola hula mghalu niupala ng'ogha kuughola. 20 Hinu handa ningughola lila nipalile ng'ogha kughola, ingumaanisa yiwa ng'ogha nenga kangi mweni kughola hagha, ila ni hila sambi yeni kulikala mghati mwa nenga. 21 Panipalile kughola lya maha ninguilolela ningughola lila lya maha ng'ogha. 22 Kwaikiva kuumundu ghangu wa mghati ninguihekelelela selia gha Sapanga. 23 Ila ningulola yiwa kuvile na selia ghangi ingughola lihengu muhigha gha nenga, selia hila yeni kungingamana na hila selia yeni kujumila malangu ghangu. Hai ingunighola niweli mhusutu wa selia gha sambi yeni kughola lihengu mhigha ghangu. 24 Chondi nenga ni ghani atenilokola kuhuma kumhigha hau weni kuniyeghela kihu? 25 Ningumshukwile Sapanga kwaikiva mweni ndiwa atenilokola kupitila Yesu Kilisito Bambu wa twenga. Hinu nenga baha ningutumikila selia gha Sapanga ghangu, ila kwa ngalilu ghangi ningutumikila selia gha sambi.