1 Tulonge kyani hinu? Ghuli, tuyendeleli kughola sambi ili manemu gha Sapanga yapati kuyongeseka? 2 Katu iwesekana ng'ogha. Lula lumatamata lwa kughola sambi mghati gha twenga luhovile, tutewesaghuli kuyendelela kughola sambi? 3 Mmanyang'ogha yiwa twenga wogha tuwelili tubatiswa ku Kilisito Yesu tubatisilwi na kukongana na kukihu kyaki? 4 Patubatisilwi tukonganili na kihu kyaki, tukasikwa pamonga na mweni, ili handa vila Kilisito kahindulwa kuhuma kukihu kwa kitendu kikulu kya Tati, hilahila na twenga tupati kulikala ngalilu hyonu. 5 Ikiva, twenga tukonganikili na mweni kukihu, hilahila tutekongana na mweni kwa kuhinduliwa kuhuma kukihu handa mweni. 6 Kwaikiva tungumanya yiwa hula umundu wa twenga wa dahile uvambilwi mulupingika pamonga na Kilisito, lukani tukotoho longoswa kangi na sambi na kuwela na uhusutu wa sambi. 7 Kwaikiva mundu yoyose pakahova anguwela pekesu kutali na sambi. 8 Hinu ikiva tuhovili pamonga na Kilisito, tungukwinila yiwa tutelama kangi pamonga na mweni. 9 Kwaikiva tungumanya yiwa Kilisito kahindulwa kala kuhuma kukihu na atehova ng'ogha kangi, kihu kitewela ng'ogha na unkosi kangi kwa mweni. 10 Hinu, kwaikiva ahovili lihanja limonga hela, sambi iwela ng'ogha na makakala kangi kwa mweni, na hinaa angulikala kuukonganiko na Sapanga. 11 Hila hila na mwenga mngupalwa mujivalangi mhova kwa yala yangulongela sambi ila mliloli yiwa mngulikala kuukonganiko na Sapanga, kupitila Kilisito Yesu. 12 Hinu, mkotoho ileka sambi iweli kindu kikulu nesu kumihigha gha mwenga na kuyitikila lumatamata lwaki luhakata. 13 Hila hila mkotoho kuleka mihigha gha mwenga ikawela kyombu kya kughola mahakata na sambi. Kihyetu na hagha, mjiyeghi weni kwa Sapanga handa wandu kahuma kukihu na kuyingila kuukomu, na mtumili higha handa kyombu kya kughola yala gha maha kwa ukwilikihi wa Sapanga. 14 Ila sambi itewela ng'ogha na unkosi kangi kwa mwenga, kwaikiva muwela ng'ogha pahi gha selia gha Sapanga ampeghili Musa, ila hinaa mngukala kuulungwana wa Sapanga.

15 Hinu tulongi kyani? Ghuli sambi iyendeleli kuwela na unkosi kunani gha twenga? Kwaikiva tuvile ng'ogha pahi gha selia ila pahi gha manemu gha Sapanga? Katu hata mayaghani! 16 Chakaka mwenga mngumanya yiwa pamtangana mwenga maweni handa wahusutu na kumyoghanila mundu mtenu. Mwenga mnguwela wahusutu kwa hayu mungumyoghanila. Pamlihumisa kuwelam wahusutu wa sambi mtehova, ila pamuwela wahusutu wa kumjumila Sapanga mtejumilwa kuulongolo ghaki. 17 Pamonga na yiwa muwelili wahusutu wa sambi haku dahile, hinaa ningumshukwile Sapanga kwaikiva muwela wayitikila kwa mioyu gha mwenga hyogha kwa mavulo mpeghilwi. 18 Ningumshukwile Sapanga kwaikiva kawapegha upekesu ili mkotoho kuwela wahusutu wa sambi, akaghola muweli handa wahusutu ghaki ili mgholi mighalu yeni kumhekelesa. 19 Ningutumila luga gha uhusutu ili iweli handa mlandano kwa wenga upati kumanya, kwaikiva gha ulepelelu wa mwenga. Handa vila haku mtumbulo pamyitikila kulongoswa na mighalu mihakata, ila hinaa mngupalwa mlihumisi mwenga maweni kughola ghala anguyapala Sapanga, ili muweli watumikila ghaki. 20 Pamuwelili wahusutu wa sambi muwela ng'ogha mkighola ghala awelile akipala Sapanga. 21 Hinu mpokelili fwaida liki kwa mighalu hila mgholili kukovekelana na mighalu hila mnguiwonela honi hinaa? Kwaikiva mwihu gha hagha ni kihu. 22 Ila hinaa mkombolwa kuhuma kuuhusutu wa sambi na muwela watumikila wa Sapanga, fwaida muwela nayu hinaa ni kughululwa na kupokela ukomu wa machuwa hyogha bila mwihu. 23 Kwaikiva mahipo gha sambi ni kihu, ila fwaida gha Sapanga ni ukomu wa machuwa hyogha bila mwihu ku Kilisito Yesu Bambu wa twenga.