1 Ningupala kummanyisa kwa mwenga mhacha wa twenga Foibe, mtumikila ku lipinga lya wandu wamkwinila Kilisito lya Kenikilea. 2 Ninguluwa mumpokeli hayu namweni hilahila kamkwinila Kilisito handa twenga na kumpegha mtanga wowose ateupala kuhuma kwa mwenga, kwa ikiva mweni awelili mtanga kwa wandu watangala, nenga nikiva mmonga wa weni. 3 Munijambusili Pilisika na Akila mngwana ghaki, watumikila wayangu ku Kilisito Yesu. 4 Weni wayesili hata wajihumisili weni baha kwaikiva gha nenga hata wakalola kulama kwau kwakindu ng'ogha. Tungupalwa kuwashukwile na ng'ogha nenga hela ila hilahila mapinga hyogha yala yamkwinila Kilisito gha wavile ng'ogha Wayahudi. 5 Munijambusili hilahila lipinga lya wandu wamkwinila Kilisito lila lyeni kungukonganika ukaya kwau Pilisika na Akila. Mnijambusilini na ghanja ghangu Epaineto, hayu awelili mundu wa mtumbulo kumkwinila Kilisito kula Asia. 6 Munijambusilili Malia, hayu awelili kaghola lihengu kwa kuyangala kwa ikiva gha mwenga. 7 Munijambusili Andiloniko na Yunia, walongo ghangu wavile wawelili mlighuta lya wawopwa pamonga na nenga. Wandumindumi wanguwamanya nesu hagha wandudumindumi wakola mlima, weni wammanyili Kilisito pambila gha nenga. 8 Munijambusili Ampiliato, mghanja ghangu nimpalile kwaikiva kakonganika na Bambu. 9 Hilahila munijambusili Ulibano, mghola lihengu myetu ku Kilisito, pamonga na ghanja ghangu mpalwa Sitakisi. 10 Munijambusili Apele hayu ayesilwi na akahighilisa kukwinila kwaki ku Kilisito. Muwajambusi wogha weni kuwela ukaya kwa Alisitobulo. 11 Mnijambusili mlongu ghangu Helodioni. Muwajambusi wamkwinila Kilisito wogha weni kulikala ukaya kwa Nalikisi. 12 Mnijambusili Tilifaina na Tilifosa, wala wadala wangughola lihengu kwa kuyangala ku Bambu. Mumjambusi ghanja ghangu mpalwa Pelisisi, mdala ghangi agholili lihengu kwa makakala ku Bambu. 13 Munijambusili Lufo, hayu ni mundu anguyangala nesu kughola lihengu lya Bambu kwa umaha, na nyongo ghaki mweni kuwela handa nyongu ghangu hilahila. 14 Mnijambusili Asinikilito na Filegoni na Helime na Patiloba na Helima na walongo wogha wamkwinilile Kilisito weni kuwela pamonga na weni. 15 Mnijambusili Filologo na Yulia na Nelea na mhacha ghaki, Olimpa na wandu wogha wamkwinilile Kilisito wenikuwela pamonga na weni. 16 Mulijambusi mwenga kwa mwenga kwa kilangihi kya upalo. Wandu wogha wenikumkwinila Kilisito wenikuwela haku wanguwajambusa.

17 Walongo ghangu, ninguwaluwa nesu mliloleli na kutama kutali na wala wandu weni kuyambusa mikologhanyiko na kubaghula lipinga lya wamkwinila Kilisito kwa kulema kughola kila mvulilwi. 18 Kwaikiva wandu handa hagha wangumtumikila ng'ogha Bambu Kilisito, ila wangutumikila lumatamata lwao weni baha. Kwa kuwalongela milando pyeku gha uhwangi, wangubyodosa mioyu gha wandu weni kumanya ng'ogha kila kivulwa ni chakaka au uhwangi. 19 Kila mundu kayoghanila vila mngutundamila Habali Maha, na kwa mghalu hau nenga ninguhekelela. Ningupala muweli na luhala kuvila vya maha, ila mkotoho kuwela wamaha ng'ogha kumighalu mihakata. 20 Sapanga, mweni kuyegha wandu walikali kwa kuponga, atepondangila Lihyukana na kuwapegha mwenga makakala gha kumsinda. Umaha wa Bambu wa twenga Yesu Kilisito na uweli pamonga na mwenga. 21 Timoseo, mghola lihengu myangu anguwajambusa. Hilahila Lukio na Yasoni na Sosipatilo, mlongo ghangu wanguwatakila mwenga manemu. 22 Nenga Telitio, mweni kuyandika lihamba hali handa Paulo anilongilile niyandiki, ninguwajambusa ku Bambu. 23 Gayo, avile ni mweni kaya ghangu na wa lipinga lya wandu wamkwinila Kilisito lyogha lya ukaya ghaki, anguwajambusa. Elasito, mvika mapesa wa mmbwani hau, pamonga na Kwalito mlongo wa twenga kangi wanguwajambusa. 24 Umaha wa Bambu wa twenga Yesu Kilisito uweli pamonga na mwenga. Hina.

25 Hinaa tumsifili Sapanga kwaikiva ni mkulu, mweni kuwesa kuwaghola mwenga mgangamali kuukwinila weni kuyegha Habali Maha gha Yesu Kilisito iwelili nikiwatangasila mwenga. Haku dahile Habali Maha hai iwelili mukifisu. 26 Ila hinaa kifisu haki kigubutulwa na kumanyika kupitila mayandiko gha kilota kwa kukovekelana na selia gha Sapanga wa machuwa hyogha bila mwihu, lukani wandu wavile ng'ogha Wayahudi wapati kumkwinila na kumyitikila. 27 Sapanga mweni kuwela weka, mweni luhala, asifilwi kwaikiva gha ukulu ghaki machuwa hyogha bila mwihu kwa kupitila Yesu Kilisito. Hina.