1 Nenga Paulo mweni kukemwa kuwela mndumindumi kwa mapalo gha Sapanga niweli mndumindumi wa Kilisito Yesu, lihamba hali niyandikila nenga na Sositenesi mlongo wa nenga.

2 Tunguwayandikila mwenga weni kuwela lipinga lya wandu weni kumkwinila Kilisito Yesu haku kumlima wa Kolintu mwenga mkemwa muweli wandu wa Sapanga kukukonganika na Kilisito Yesu, pamonga na wandu wogha wakumahala wekaweka weni kumkwinila Bambu wa twenga Yesu Kilisito mwenikuwela Bambu wa mwenga na wa twenga hilahila.

3 Twenga tunguwayupila highili na kuponga kuhuma kwa Sapanga Tati wa twenga na Bambu wa twenga Yesu Kilisito.

4 Nenga ningumshukwile Sapanga machuwa hyogha kwaikiva gha mwenga kwavila awagholilile mwenga ghamaha kwa kupitila Yesu Kilisito. 5 Kwa kukongana na Kilisito kawapegha kila kindu kila mngukipala na hinaa mvile na uwesa wa kulongela kila kindu akipalile na kumanya kila kindu angupala mkimanyi. 6 Mighalu hai ingulangiha ghala tulongelile kumlongelela Kilisito kwa mwenga ni chakaka, 7 kwa nagha mlepelelwa ng'ogha hupo yoyosi kuhuma kwa Mpumulo wa Sapanga handa vila muwela mngulindila kwa luhujulu kuhuya kwa Bambu wa twenga Yesu Kilisito. 8 Sapanga atewaghola mgangamali mbaka mwihu, ili mkotoho kuwela na masitaka lichuwa lila atehuya Bambu wa twenga Yesu Kilisito. 9 Sapanga ateghola hagha kwaikiva mweni ni mchakaka. Mweni ndiwa kawakema mwenga mkongani na Mwana ghaki Yesu Kilisito Bambu wa twenga.

10 Walongu wa nenga, kuukulu wa lihina lya Yesu Kilisito pepahi ninguwaluwa, mjumilani kumighalu hyogha munguilongela ili pakotoho kuwela na mlekaniko paghati gha mwenga, nesunesu muweli na lukani limonga na liwachilo limonga. 11 Walongo ghangu, wandu waghangi wenikuwela kuukaya gha Kiloe wanilongela yiwa mwenga mvile na magombi. 12 Wandu hagha wanongela nenga nagha. Mundu mghangi angulonga yiwa nenga, "Ningumkovekela Paulo," na ghangi, "Angulonga nenga ningumkovekela Apolo," hilahila yungi angulonga, "Nenga ningumkovekela Petelo" yungi kangi kangulonga, "Nenga ningumkovekela Kilisito". 13 Ghuli, Kilisito kalekanika? Ghuli, Paulo ndiwa avambilwi mulipingika kwaikiva gha mwenga? Au ghuli, mbatisilwi handa wavulwa wa Paulo?

14 Ningumshukwile Sapanga kwaikiva nenga nimbatisa ng'ogha mundu yoyosi paghati mwa mwenga ila Kilisito na Gayo weka yau. 15 Kwa nagha kwahela mundu yoyose paghati mwa mwenga anguwesa kulonga yiwa abatisilwi handa mvulwa wa nenga. 16 Yina, ngumbuka hilahila nimbatisili Sitefano na wandu wa kaya ghaki, kihyetu na hagha ngumbuka ng'ogha yiwa nibatisili mundu mghangi kangi. 17 Kwaikiva Kilisito kanilaghila ng'ogha nenga niwabatisi wandu ila niwatangasili wandu Habali Maha, na nigholi nagha ng'ogha kwa milando gha ukambenga ukambenga lukani makakala gha kihu kya Kilisito kulipingika ikotoho kuwela yaghi yaghi.

18 Kwaikiva ujumbi wa kihu kya Kilisito kulipingika unguwoneka ni undyungi kwa wandu wenikuyaghamika, ila kwa twenga wenikuwela kunjila gha ulokola tungulola makakala gha Sapanga. 19 Kwaikiva Mayandiko gha Sapanga yangulonga,

"Niteyalamisa luhala lwa weni luhala,

na nitelema malangu gha weni kuwela na mavulo." 20 Hinaa, wawela kugha wala weni luhala? Wawela kugha wavula wa laghililo, wawela kugha weni umanyi wa kungingamana milando haku kumlima wogha, Sapanga kaghola luhala kumlima wogha kuwoneka yiwa ni undyungi.

21 Kwaikiva kuluhala lwa Sapanga wandu wanguwesa ng'ogha kummanya Sapanga kwa luhala lwau weni baha ila Sapanga kapala kuwalokola wala weni kukwinila kwa njila gha ujumbi hau tunguutangasa na hau ndiwa hula wala wandu weni luhala wanguulola yiwa ni undyungi. 22 Wayahudi wanguhakula vilangihi na Wayunani wanguhakula luhala ili wakwinili, 23 ila twenga tunguwatangasila mwenga Habali zya Kilisito yula mwenikuvambwa kulipingika. Habali yenikuwoneka inguwahoma moyu Wayahudi na undyungi kwa wandu wawela ng'ogha Wayahudi. 24 Ila kwa wala weni kukemwa na Sapanga, Wayahudi na wandu wawela ng'ogha Wayahudi, Kilisito ni makakala gha Sapanga na luhala lwa Sapanga. 25 Kwaikiva kila kinguwoneka yiwa ni undyungi wa Sapanga kivile na luhala kupiti luhala lwa kimundu, na kila kinguwoneka ulepelelu wa Sapanga kivile na makakala kupiti makakala gha kimundu.

26 Hinu walongo wa nenga mngumbuki pala Sapanga paawakemili. Kwa muwoneko wa kimundu watangala paghati gha mwenga muwonekanili handa muwela ng'ogha na luhala kuulongolo gha wandu, hilahila watangala paghati gha mwenga muwonekanili yiwa muwela ng'ogha na makakala kuulongolo gha wandu, kangi paghati gha mwenga muwonekanili yiwa weni kumanyikana nesu kuulongolo gha wandu. 27 Ila Sapanga akahaghula mighalu yeni kuwoneka kuulongolo gha wandu yiwa ni gha kindyungi, ili awatayi honi wandu weni luhala, kangi Sapanga kahaghula vindu vyeni ulepelelu kumlima wogha ili kuwataya honi wandu weni makakala. 28 Sapanga kahaghula vindu vyeni kupughanyika na wandu na kulemwa na vyeni kuwoneka yiwa vya maha ng'ogha, ili ayalamisi vila vinguwoneka na wandu yiwa vya maha kumawachilo gha kimundu. 29 Sapanga agholile nagha ili akotoho kuwoneka mundu wa kujiyinula kuulongolo ghaki. 30 Sapanga mwenibaha ndiwa awakonganisili mwenga na Kilisito Yesu. Na Sapanga kamghola Kilisito aweli luhala lwa twenga. Tunguwoneka yiwa wandu maha kuulongolo gha Sapanga na wandu weni kujumilwa na Sapanga na weni kukombolwa. 31 Hinu, handa iyandikwa ku Mayandiko gha Sapanga,

"Mweni kupala kujitutumula,

na ajitutumule kwa kila akigholile Bambu."