1 Myangalai kuwela na upalo na kupala nesu hupo zya mpumulo, nesu nesu hupo gha kuwatangasila wandu ujumbi wa Sapanga. 2 Kwaikiva mundu yoyosi mweni kulongela luga gha kihenja, kangulonga ng'ogha na wandu ila angulonga na Sapanga. Kwaikiva kwahela mundu yoyose angummanya, mundu hayu angulongela kwa makakala gha Mpumulo wa Sapanga kumighalu yeni kifisu. 3 Ila mundu hayu angutangasa ujumbi kuhuma kwa Sapanga, angulongela na wandu milando gha kuwagangamalisa ukwinila na kuwataya moyu na kuwapegha kiheku pawawela na lung'ai. 4 Mwenikulonga kwa luga gha kihenja angujichenga mwenibaha, ila yula mweni kulongela ujumbi kuhuma kwa Sapanga angulichenga konganiko lya wandu wamkwinila Kilisito.

5 Ningapala kila mmonga wa mwenga alonge kwa luga gha kihenja, ila ningapala nesunesu wogha mtangasi ujumbi kuhuma kwa Sapanga. Kwaikiva mweni kulonga ujumbi kuhuma kwa Sapanga angughola maha kupiti yula mweni kulongela luga gha kihenja, ili lipinga lya wandu wamkwinila Kilisito lyogha lipati kuchengwa. 6 Hinaa walongo wa nenga, handa nikihika kwa mwenga na kulongela na mwenga kwa luga gha kihenja, ghuli itewatanga niki? Itewatanga ng'ogha chochosi ila panitewalongela ghala Sapanga kanigubutulila na panikawapegha umanyi pamonga na kuwavula lilando lya Sapanga hai nitewela niwatanga.

7 Hata vindu viwela ng'ogha na ukomu vivili na lilowi lyaki, hindu handa, mluli au sese. Mundu anguwesa ghuli kuumanya uyimbo handa vyombu havi vinguhumisa ng'ogha lilowi lya uyimbo hula wa kuhinwa? 8 Kangi handa lipembi lihumisa ng'ogha lilowi lyeni kumanyika ng'ogha, ni mtovangondu ghani ateliyandala kuyenda kungondu? 9 Hilahila na mwenga, handa mkilonga milando imanyika ng'ogha, mundu atemanyaghuli kumanya kila mkilongile? Kwaikiva mtewela handa wandu wenikulongela na liyegha. 10 Chakaka kuwela na luga zitangala haku umlima wogha, na zyeni luga zyogha zingumaanisa kindu. 11 Hinu handa nitewesa ng'ogha kumanya kila akilongela mundu kupitila luga ghaki nitewela mhenja kwa mundu hayu na mweni atewela mhenja kwa nenga. 12 Hilahila na mwenga. Kwaikiva mngupala kupokela hupo kuhuma kwa Mpumulo wa Sapanga, myangalayi nesu mpati hupo zyeni kuwatanga wandu kuchengwa ukwinila.

13 Kwaikiva gha nagha, mundu mweni kulongela kwa luga gha kihenja na ayupi ili awesi kuwaghalambulila wandu kila angukilongela kwa luga gha kihenja. 14 Kwaikiva, paniyupa kwa luga gha kihenja mpumulo gha nenga ndiwa anguyupa, ila malangu ghangu yangutumikana ng'ogha lipindi hali. 15 Ghuli Nigholi ghuli hinu? Niteyupa kwa mpumulo ghangu na niteyupa kwa malangu ghangu na vilavila niteyimba kwa mpumulo ghangu na niteyimba kwa malangu ghangu. 16 Msifili Sapanga kumpumulo weka, paikawela kuvili na mundu mghangi mwenikumanya ng'ogha kila ungukilongela ghuli, atewesa ghuli kulongela "hina", na kwa kumshukwile Sapanga ikiva kamanya ng'ogha kila ungukilongela? 17 Unguwesa kumshukwile Sapanga kuuchakaka ila itemtanga ng'ogha mundu mghangi kumchenga kuukwinila.

18 Ningumshukwile Sapanga yiwa nenga ningulongela kwa luga gha kihenja kupiti mwenga wogha. 19 Ila paniwela paghati gha lipinga lyeni kumkwinila Kilisito nimbaha nilongeli milando miitano au minjechi ili nipati kuwavula waghangi kupiti nilongeli milando itangala nesu kwa njila gha kulongela kwa luga gha kihenja.

20 Walongo ghangu, mkotoho kuliwachila handa wana wang'enya, ila kuhabali gha uhakata muweli handa wana wanung'una. Pamuliwachila muweli handa wandu wakomi. 21 Kumayandiko gha Sapanga iyandikilwi yiwa,

"Bambu angulonga, nitelonga na wandu hagha

kwa milando gha kihenja,

na nitelongela na wandu hagha kwa milomu gha kihenja,

ila wateniyoghanila ng'ogha." 22 Hinu kulonga kwa luga gha kihenja ni kilangihi kwa wandu wenikukwinila ng'ogha na ng'ogha kwa wandu wenikukwinila. Ila kulongela ujumbi wa kuhumila kwa Sapanga ni kwaikiva gha wandu weni kukwinila na ng'ogha kwa wandu wenikukwinila ng'ogha.

23 Hinu paikawela lipinga lya wandu wamkwinila Kilisito lyogha likakongananika kuyupa na kila mmonga akalonga kwa luga gha kihenja, na kuulongolo wakayingila wahenja wakwinila ng'ogha, ghuli, watelonga ng'ogha yiwa wogha muwela na lukwali? 24 Ila, wogha pawawela wakiutangasa ujumbi wa Sapanga, hinu akahika mundu mweni kukwinila ng'ogha, hyogha ateyahyoghanila kuhuma kwa wogha yatemghola amanyi uhakata ghaki, kangi yatemghola mundu hayu aghalambuki na kuleka sambi. 25 Mighalu gha kifisu kumoy ghakik itemanyika na atetova manung'una na kumyupa Sapanga akilonga, "Chakaka Sapanga kamonga na mwenga mahala haku."

26 Ghuli, walongo ghangu tulongi kyani? Pamngukongana pamonga kumyupa Sapanga, mmonga anguyimba uyimbo, na mghangi anguvula na mghangi angughola hupo gha kughalambula ujumbi wa Sapanga na mghangi angulonga luga gha kihenja na mghangi angughalambula ghala yangulongelwa kwa luga gha kihenja. Hyogha yangupalwa yaweli yeni lukani lwa kuchenga lipinga lya wandu wamkwinila Kilisito. 27 Handa mundu yoyose pakalonga luga gha kihenja, hinu walonge wandu waivili au waitatu na ng'onga kupiti hagha, mmonga badili gha ghangi na lasima paweli na mundu wa kughalambula hai milando yeni kulongelwa. 28 Ila handa paikawela kwahela mundu mweni kughalambula, hinu mundu hayu mwenikulongela lilando lya kihenja na alikali jii kulipindi lya wandu weni kumkwinila Kilisito, na alongi na nafusi ghaki mweni na Sapanga. 29 Wandu wenikulongela ujumbi kuhuma kwa Sapanga pawawela waitatu hinu na walongi mmonga mmonga. 30 Ila haku mkonganila pakawela na mundu mmonga angulongela na mghangi paghati gha wala weni kuhyoghanila kapokela ugubutulo kuhuma kwa Sapanga, hinu yula mweni kulongela na atami nuu. 31 Kwaikiva wogha mnguwesa kulongela mmonga badili gha ghangi ujumbi mpeghilwi na Sapanga ili mpati kuivula na kutaywa moyu. 32 Hupo gha kulongela ujumbi kuhuma kwa Sapanga ingupalwa kuwela pahi gha ulongosi wa yula apeghilwi hupo hai. 33 Kwaikiva Sapanga ng'ogha Sapanga wa magombi Sapanga wa kulikala kwa kuponga.

Handa vila iwela kulipinga lyogha lya wandu wenikumkwinila Kilisito vila wawela wandu wa Sapanga, 34 wadala wangupalwa kutama nuu kumapinga gha wandu wamkwinila Kilisito pawakonganika. lipinga lya wandu wamkwinila Kilisito. Wapalwa ng'ogha kulonga, ila wangupalwa wayitikili handa Sapanga vila angulongela kulaghililo lya ghaki. 35 Handa wangupala kukonya wakawakonyi wangwana ghao kuukaya, kwaikiva ni honi kwa mdala kulonga mulipinga lya wandu wamkwinila Kilisito.

36 Ghuli, lilando lya Sapanga lihumili kwa mwenga weka yenu? Au liwahikilile mwenga hela? 37 Handa mundu pakaliwachila yiwa kana hupo gha kulongela ujumbi kuhuma kwa Sapanga au kana Mpumulo gha Sapanga, amanyi yiwa hagha ninguwayandikila mwenga ni laghililo kuhuma kwa Bambu. 38 Ila handa mundu pakapughanya mghalu hau na mweni apughanyiswi.

39 Kwa nagha walongo ghangu, mngupalwa kuwela na luhujulu nesu lwa kutangasa ujumbi wa Sapanga, ila mkotoho kumkanisa mundu kulonga kwa luga gha kihenja. 40 Ila kila kindu kigholeki kwa umaha na kwa vila ingupalwa kuwela.