1 Hinu walongo ghangu,

ningupala mmanyi maha habali gha hupo zila zinguhuma kwa Mpumulo wa Sapanga. 2 Mngumanya yiwa pamuwelili mummanya ng'ogha Sapanga, muwelili mkikweghwa na kulongoswa kuyupa ming'omung'omu yeni kuwesa ng'ogha kulongela. 3 Kwa nagha ningupala mmanyi yiwa kwahela mundu angulongoswa na Mpumulo wa Sapanga akalonga, "Yesu na alapilwe." Hilahila kwahela mundu mweni kuwesa kulonga, "Yesu ni Bambu," pakalongoswa ng'ogha na Mpumulo wa Sapanga.

4 Hinu, kuvile na hupo wekaweka ila Mpumulo mweni kuwapatila wandu hupo hazi kammonga hela. 5 Hilahila kuvile na utumikila wa wekaweka ila Bambu mwenikutumikilwa kammonga hela. 6 Kuvile na uwesa wekaweka wa kughola mahengu, ila Sapanga kammonga mweni kuwawesesa wandu kutimilisa. 7 Mpumulo wa Sapanga angumtanga kila mundu kughola lihengu lyaki ili kuwatanga waghangi. 8 Mpumulo wa Sapanga angumpegha mundu mmonga uweso wa lilando lya luhala na ghangi uweso wa lilando lya malangu vila angupala. 9 Mpumulo wa Sapanga yulayula angumpegha mmonga ukwinila na angumpegha ghangi hupo gha kulamisa wandu, 10 Mpumulo wa Sapanga hayu hayu angupegha mmonga uweso wa kughola ukangaso, ghangi uweso wa kulonga ujumbi wa Sapanga, na waghangi kumanya yiwa hupo hai inguhuma kwa Mpumulo wa Sapanga au ng'ogha, waghangi kulongela luga gha kihenja, na ghangi hupo gha kughalambula hazi luga gha kihenja. 11 Ila yulayula Mpumulo wa Sapanga mmonga angughola mighalu hai hyogha, akimpegha kila mmonga hupo wekaweka handa apalili Mpumulo wa Sapanga.

12 Handa vila mhigha uvile mmonga na weni uvile na vikongonu vitangala, na vikongonu havi pamonga na yiwa viwela vitangala vinguuchenga mhigha mmonga na ndiwa inguwela kwa Kilisito. 13 Kwaikiva twenga wogha tubatisilwi kwa Mpumulo mmonga ili tupati kuwela na mhigha mmonga, handa ni Wayahudi au Wandu wavile ng'ogha Wayahudi, handa ni wahusutu au wandu pekesu, natwenga wogha tupeghilwi Mpumulo mmonga.

14 Hinu mhigha unguchengwa ng'ogha kwa kikongonu kimonga hela ila unguchengwa kwa vikongonu vitangala. 15 Handa lighulu litelonga, "Nenga ng'ogha liwoku kwa nagha nenga ng'ogha wa mhigha," ghuli, lighulu ng'ogha mbandi gha mhigha kwaikiva gha nagha? 16 Na hilahila lipulukilo palitelonga, "Nenga ng'ogha lisu kwa nagha ng'ogha wa mhigha," ghuli lipulukilo ng'ogha mbandi gha mhigha kwaikiva gha nagha? 17 Handa mhigha wogha ungawela lisu, kuhyoghanila kungawela kugha? Au handa mhigha wogha ungawela pulikilo, mundu angaliwesa ghuli kumanya yiwa haki kingunugha? 18 Ila Sapanga kavika vikongonu havi vyogha kumhigha wa kila mmonga handa aipalile Sapanga mweni. 19 Handa vyogha vingawela kikongonu kimonga, mhigha ungawela kugha? 20 Uchakaka ni yiwa, mbandi zya mhigha zitangala, ila mhigha ni mmonga.

21 Lisu linguwesa ng'ogha kulilongela liwoku nenga "Ningukupala ng'ogha," wala mutu unguwesa ng'ogha kulilongela lighulu nenga "Ningukupala ng'ogha." 22 Ila badili ghaki, vila vikongonu vya mhigha vyenikuwoneka vilepelelwa, ndiwa vyenikuwela vingupalwa nesu. 23 Kangi vikongonu vyeni kuwoneka yiwa vyeni kupughanyika ndiwa tunguvitundamila nesu, na vikongonu vya mhigha vila tunguvilola ni vya honi ndiwa tunguvigubika nesu, 24 lipindi vila vikongonu vyeni kuyegha ng'ogha honi vingupala ng'ogha kugubikwa handa vikongonu vighangi. Sapanga mweni kavika maha vikongonu kumhigha, vikongonu vyeni kupughanyika kavighola vitundamilwi. 25 Kwa nagha kukotoho kuwela na mlekaniko, ila vikongonu vyogha vitangani. 26 Handa kikongonu kimonga pakinguvina, vikongonu vighangi vinguvina pamonga na kyeni, handa kikongonu kimonga kikapokela utundamilu, vikongonu vyogha vinguhekelela pamonga na kyeni.

27 Hinaa mwenga wogha ni mhigha wa Kilisito na kila mmonga wa mwenga ni kikongonu kya mhigha hau. 28 Kulipinga lya wandu weni kumkwinila Kilisito mtumbulo Sapanga awavikili hagha wandumindumi, wakakovekela walota, nakangi wakakovekela wavula, hinu akavika wala weni hupo zya kughola makangaso, na kulamisa na kutanga, vilongosi na weni kulonga luga zya kihenja. 29 Wandu wogha ng'ogha wandumindumi, wandu wogha ng'ogha walota, wandu wogha ng'ogha wavula, wandu wogha ng'ogha weni kughola makangaso. 30 Wogha ndiwa weni hupo zya kulamisa wavina, wogha ndiwa weni kulonga kwa luga zya kihenja, wogha ni weni kughalambula luga. 31 Hinu myangalai kuhakula kupokela hupo zila ngulu nesu.

Ila hinaa nitewalangiha njila gha chakaka nesu kupiti zyogha.