1 Walongo kiuchakaka ingulongwa yiwa paghati mwa mwenga kuvile na ngongola na hai ngongola iwesa ng'ogha kuwoneka hata kwa wandu wamkwinila ng'ogha Kilisito. Nilongelwa yiwa mmonga paghati mwa mwenga anguwonja na mhumbu wa tati ghaki. 2 Mnguwesa ghuli kujitutumula? Ingaliwela maha kwa mwenga kumuwonela luhungu mundu hayu na mundu mweni kughola nagha abaghulwi paghati gha mwenga. 3 Pamonga na yiwa napamu ng'ogha na mwenga ila moyu ghangu upamonga na mwenga, hinu handa vila niwela baha haku nimlamula kala mundu hayu mweni kughola mghalu hau wa honi. 4 Pamngulikungula pamonga kulihina lya Bambu wa twenga Yesu, na nenga napamonga na mwenga kimpumulo haku, na makakala gha Bambu Yesu yanguwela bahala. 5 Mngupalwa mumyegheli Lihyukana mundu hayu ili mhigha ghaki uyalamiswi na mpumulo ghaki ulokolwi lichuwa lila lya kuhika kwaki Bambu Yesu.

6 Maha ng'ogha mwenga kujitutumula! Mwenga mmanya ng'ogha simika mayaghani inguwesa kututumusa ukowa wogha ugholwa na ngandilu? 7 Hinu mjighululi kwa kumuhumisa mundu hayu mhakata paghati gha mwenga na kughola nagha ni handa muhumisa simika gha dahile, kwa nagha mtewela wandu wahyonu handa ukowa mhyonu ukandilwi wenikuwela ng'ogha na simika na havi ndiwa ngalilu gha mwenga iwela. Kwaikiva Sapanga amgholile Kilisito aweli litambiku handa Mwanakondolu wa Pasaka ili atulokoli. 8 Hinu, tukotoho kuhina mhambu wa Pasaka kwa simika lya dahile ingumaanisa kwauhakata na sambi, ila tuhini kwa mibumunda ivikwa ng'ogha simika imaanisa kwa moyu mbuleti na uchakaka.

9 Niwayandikilile kulihamba lyangu yiwa mkotoho kukonganika na wandu weni kughola sambi gha ngongola. 10 Panilongile nagha nimaanisa ng'ogha yiwa mwenga mkotoho konganika na wandu wogha kumlima hau, kihyetu kyaki mngalipalwa muhuki kumlima wogha hau ili mlilekanisi na wala waghola ngongola, au weni lumatamata, au wapokola na wala weni kuyupa ling'omung'omu. 11 Ila niwayandikilile yiwa mkotoho kukonganika na mundu yeyosi mwenikulonga yiwa angumkwinila Kilisito handa mwenga, kunu akiwela mngongola, au mwimi, au mwenikuyupa ling'omung'omu, au mjongesela, au mlowela na mlulunganyi. Mundu wa nagha hata pakulyegha mkotoho kulyegha na mweni.

12 Kwaikiva ng'ogha lihengu lya nenga kuwalamula wandu wenikuwela ng'ogha kulipinga lya wandu weni kumkwinila Kilisito. Ila mwenga mngupalwa kuwalamula wandu wenikuwela kulipinga lya weni kumkwinila Kilisito Mayandiko yangulonga. 13 Sapanga atewalamula wandu wenikuwela ng'ogha kulipinga lya Kilisito. Kwaikiva iyandikwa Kumayandiko gha Sapanga, "Mhumisi mhakata kulipinga."