1 Hinu, wandu na watuloli yiwa twenga twa watumikila wa Kilisito, na Sapanga katupegha lihengu kuwatangasila wandu ujumbi weni kuvikwa ng'ogha lipala kwa wandu. 2 Hinaa mundu mweni peghwa lihengu hali angupalwa aweli mtumikila mchakaka. 3 Ila kwa nenga ningutila ng'ogha panilamulwa na mwenga au njenga kaya, ila mweni baha niilamula ng'ogha. 4 Kwaikiva kumoyu nilamulwa ng'ogha na mghalu wowosi, ila hai ingulangiha ng'ogha yiwa nenga ngosela ng'ogha, Sapanga ndiwa mweni kunilamula. 5 Hinu mkotoho kumlamula mundu yoyosi pambila gha kuhika lipindi lyaki, mlindili mbaka paatehika Bambu. Mweni atelangiha kila kindu kijihigha mulwisa na kuvika lipala mawachilo yavile mumioyu gha wandu. Hinu kila mundu atesifilwa handa ingumpala asifilwe.

6 Walongo wa nenga, ningulongela mighalu hyogha hagha gha nenga na Apolo ili iweli mtanga kwa mwenga. Kwa mlandano wa nenga na Paulo ningupala mmanyi lukani lwa milando hai, "Mkamuli ghala yenikuyandikwa" Kukotoho kuwela hata mundu mmonga paghati mwa mwenga mweni kuidumbila mundu tenu na kumpughanya mundu ghangi. 7 Kwaikiva ni ghani kakughola wenga uwoneki mmaha kupiti wayaku? Ghuli ng'ogha Sapanga ndiwa mweni kukupegha vindu vyogha uvili navyu? Na ikiva mpeghwa hinu kwakyani mngulikwina handa vila mpeghwa ng'ogha?

8 Hinaa mpokela kala vyogha mnguvipala hinu muwela kala wanaisa. Muwela wankosi kangi bila twenga! Ni maha mngaliwela wankosi chakaka ili na twenga tuweli wankosi pamonga na mwenga. 9 Ila kwa twenga wandumindumi ningulola Sapanga katuvika kuwela wandu wa kupughanyika kupiti wogha, tuwela handa wandu weni kulamulwa kukomwa kuulongolo gha wandu tuwela kindu kya kiheku kuulongolo gha mlima wogha na kuulongolo gha watumikila wa kundumba na kuulongolo gha wandu. 10 Wandu watangala wangutulola twenga handa wandyungi kwaikiva gha kumtumikila Kilisito, ila mwenga mngujilola ni weni luhala kwaikiva mngumkovekela Kilisito! Twenga tunguwoneka handa tuwela ng'ogha na makakala, ila mwenga ndiwa weni makakala. Mwenga mngutundamilwa, ila twenga tungupughanywa. 11 Mbaka lisaa hali twenga tuvile na njala na kuyumilila na hilahila twahela nguu na kangi tungutovwa, na hilahila tuwela ng'ogha na ukaya, 12 kangi tungughola mahengu matopehu kwa mawoku gha twenga wenibaha, patulighwa, tunguwahighila, wandu pawatupokola twenga tungufumilila, hilahila na patuhakilwa twenga tungufumilila, 13 hilahila na lipindi pawangutukupikila twenga tunguwayanga maha. Mbaka hinaa tunguwoneka handa ndaka zya mlima wogha kangi twamaha ng'ogha kwa chochosi.

14 Ninguyandika ng'ogha hagha kwa lukani lwa kuwapughanyisa, ila ninguwavula handa wana ghangu niwapalile. 15 Hata handa mngaliwela na wavulwa watangala nesu kungalilu gha mwenga gha Kikilisito, ila muwela ng'ogha na watati watangala nenga niwelili tati wa mwenga kwa kuwayeghela Habali Maha. 16 Hinu ninguwaluwa pepai mgholi handa vila ningughola nenga. 17 Kwaikiva gha nagha ningumlaghila Timotheo kwa mwenga, mweni ni mwana ghangu mpalwa mwenikuwela ningumtumainila kulihengu lya Bambu. Mweni atewakumbusa njila ghangu hila ninguikovekela kukukongana na Kilisito. Njila gha kulama kula ninguvula kila mahala kumapinga gha wandu weni kumkwinila Kilisito.

18 Wandu ghangi paghati gha mwenga watumbula kala kulitutumula wakiliwachila yiwa nenga nitehika ng'ogha kangi kwa mwenga. 19 Ila Bambu paatepala nenga nitehika kwa mwenga kwa kuloposela. Hinu niteilolela mweni ng'ogha kila wanguwesa kulongela hagha weni kuitutumula, ila hilahila kila wanguwesa kukighola. 20 Kwaikiva Unkosi wa Sapanga uwela ng'ogha kumilando hela ila ghala wanguwesa kuyaghola kumakakala gha Sapanga. 21 Mngupala kyani? Nihiki kwa mwenga na mhimbati, au nihiki na moyu wa upalo na unyalinyali?