1 Hinu ningulonga nagha mapesa kwaikiva gha kuwatanga wandu wa Sapanga. Mgholi kila niwalaghilile kughola kwa wandu weni kumkwinila wamkwinila Kilisito haku kumlima wa Galatia. 2 Kila ijumapili mundu atoli mapesa yayeghwi kukovekelana na vila mpokela ili panitehika nikotoho kukungula mapegho kangi. 3 Kwa nagha panitehika kwa mwenga, wala wandu mtewahaghula paghati gha mwenga nitewalaghila na lihamba lya kuwamanyisa wayeghi na mapegho gha mwenga haku Yelusalemu. 4 Handa itewoneka ni maha na nenga kuyenda na mwenga, hinu, tuteyenda pamonga.

5 Nitehika haku kwa mwenga panipita kala ku Makidonia kwaikiva ningupalwa kuyenda ku Makidonia. 6 Ninguliwachila pangi ninguwesa kulikala na mwenga kwa machuwa mayaghani au nitelikala na mwenga lipindi lyogha lya lupepo lukani muwesi kunitanga kuyendelela na mwanja ghangu kokosi niteyenda. 7 Ningupala ng'ogha kulolana na mwenga na kuyenda hela. Ningutumaini nitelikala na mwenga kwa lipindi litali Bambu paatepala.

8 Ila nitehighala bahala ku Efesu mbaka lichuwa lya mhambu wa Pentekosite, 9 kwaikiva Bambu kanipegha fwasi maha gha kughola lihengu likulunga baha, pamonga na yiwa haku Efesu kuvile na wandu watangala wenikunikanila.

10 Timoseo pakahika kwa mwenga mumpokeli maha ili akotoho kuwela na holu kwaikiva mweni angughola lihengu lya Bambu handa nenga. 11 Hinu mundu yeyosi akotoho kumpughanya, ila mumtangi ayendeleli na mwanja kwa kuponga ili ahiki kwa nenga. Kwaikiva nenga ningumlindila nikiwela pamonga na wakwinila wayetu.

12 Hinaa ningulonga nagha kulongelela mlongo gha twenga Apolo, nimluwili nesu ahiki kwa mwenga pamonga na walongo waghangi. Ila mweni kangupala ng'ogha kuhika haku hinaa ila atehika haku paatepata fwasi.

13 Mlikali mihu, mgholoki kwa kugangamala kuukwinila wa mwenga, muweli mgangamala na weni makakala. 14 Mighalu gha mwenga hyogha na igholeki kwa upalo.

15 Hinaa walongo wa nenga mngummanya Sitefano na wandu wa kukaya ghaki weni ni wandu wa mtumbulo kumkwinila Kilisito kumbwani wa Akaya na weni wajihumisa kuwatanga wandu weni kumkwinila Kilisito hinu ninguwaluwa nesu, 16 hinu muwayitikili nesu wandu handa weni na waghangi wogha weni kughola lihengu hali pamonga na weni.

17 Ninguhekelela nesu pawahikile Sitefano na Fotunato pamonga na Akaiko, kwaikiva weni wanitangili kughola mahengu ghala nilepelelilwi kwaikiva mwenga muwelili ng'ogha haku niwela. 18 Weni wahekelesili moyu ghangu handa vila wahekelesili mioyu gha mwenga, wandu handa hagha ni maha kuwakumbwiki.

19 Malipinga gha wandu wenikumkwinila Kilisito haku Asia yanguwajambusa. Akila na Pilisila, pamonga na lipinga lyogha lya wandu wamkwinila Kilisito liwelili ukaya kwa weni wanguwajambusa ku lihina lya Bambu. 20 Walongo wogha wenikuwela haku niwela wanguwajambusa.

Wanguwajambusa kwa kulangiha upalo wa Yesu Kilisito.

21 Nenga Paulo ninguwajambusa, mweni kuyandikila kwa liwoku lyangu mweni baha.

22 Mundu yeyosi mwenikumpala ng'ogha Bambu na alapilwi.

Malanasa ingumaanisa Bambu wa twenga uhiki.

23 Ninguwayupila Bambu watwenga Yesu awapeghi umaha ghaki.

24 Ninguwapala mwenga wogha wenikumkwinila Yesu Kilisito.