1 Ghuli, nenga na ng'ogha mundu pekesu? Ghuli, nenga na ng'ogha mndumindumi? Ghuli, nenga nimlola ng'ogha Yesu Bambu wa twenga? Ghuli mwenga mumkwinila ng'ogha Bambu kupitila lihengu lya nenga? 2 Pamonga na yiwa wandu waghangi wangunilola nenga yiwa mndumindumi ng'ogha, ila kwa mwenga nenga na mndumindumi kwaikiva kukwinila kwa mwenga kungulangiha yiwa nenga nilaghilwa na Bambu.

3 Havi ndiwa ningulitetela kwa wandu weni kunikonya. 4 Ghuli twenga tungupalwa ng'ogha kupokela mulyo au vinywegha kwaikiva gha lihengu tungulighola? 5 Ghuli, mnguliwachila twenga tusindwa kuwela na mwanja na wahumbu wa twenga weni kukwinila handa waigholile wandumindumi waghangi na walongo ghaki Bambu na Petelo? 6 Au ni nenga na Balinaba hela twenikulasimika kughola lihengu ili tuwese kupokela vindu vya kututanga vya kila lelo? 7 Ni mtovangondo ghani mweni kuyenda kungondo na kuihemelela mweni hindu? Ghuli ni mtukutula ghani mweni kutukutula misabibu na akotoho kulyegha matungula gha misabibu? Ghuli mhungaji ghani mweni kuhunga na kuleka kunywegha maweli gha lipinga lila angulihunga?

8 Milando hai ninguilonga ng'ogha milando gha wandu hela ila hata laghililo lya Musa ndiwa lingulongela. 9 Kwaikiva iyandikwa kulaghililo lya Musa, "Ukotoho kumwopa ng'ombi mlomo paangunyukutula nganu." Ghuli, Sapanga angulongelela habali zya ng'ombi? 10 Ghuli, paailongile milando hai atulongelili ng'ogha twenga? Chakaka yayandikilwi kwaikiva gha twenga, kwaikiva wogha waivili mtukutula na mbena wangupalwa wapokeli lihomosi kila mmonga. 11 Hilahila na twenga patutangasa ujumbi wa Sapanga kwa mwenga, ni handa kukulila mbeyu gha kimpumulo kwa mwenga, ghuli tungupalwa ng'ogha kupokela hindu kwaikiva gha ngalilu hai kuhuma kwa mwenga? 12 Handa mwenga mngujumila kuwapegha waghangi hindu gha kuwatanga kungalilu ghao, hata twenga mngupalwa kujumila kututanga.

Ila twenga tunguwaghasa ng'ogha mtuhipi hila hindu mngupalwa kutupegha ila tungufumilila kuhyogha lukani tukotoho kuwayambusa wandu wakotoho kukwinila Habali Maha gha Bambu wa twenga Yesu Kilisito. 13 Ghuli mwenga mngumanya ng'ogha yiwa wala watumikila wa kulighuta lya Sapanga wangupokela mulyo ghao kuhuma kulighuta lya Sapanga? Ghuli wala weni kutumikila kuluhanja wangupokela mbandi gha litambiku hali? 14 Hilahila, Bambu alaghilili yiwa wala wangutangasa Habali Maha wapati mtanga kuhuma kwa wala weni kupokela Habali Maha.

15 Ila nenga nitumila ng'ogha hata fwasi imonga paghati gha hazi fwasi. Wala niyandika ng'ogha ili iweli nagha kwa nenga, ni mbaha nenga nihovi kupiti kumghola mundu yoyosi aningingami nikotoho kujiyinula yiwa ninguitangasa Habali Maha bila mahipo. 16 Handa ninguwatangasila wandu Habali Maha mghalu hau ng'ogha wa kuisifila, ila hali ni lihengu lya nenga nipeghilwi na Bambu niligholi, chondi nenga handa nitewatangasila ng'ogha wandu Habali Maha. 17 Handa ningalihaghula lihengu hali mweni hinu ningalindila mahipo, ila hinaa ningupalwa kughola kwaikiva Sapanga ndiwa mweni kunipegha lihengu hali niligholi. 18 Kupitila hali nenga ninguhipwa liki? Mahipo gha nenga ni kuwatangasila wandu Habali Maha bila kuhipwa, nikileka kuluwa kindu chochosi kila kingunipala nipokeli kwaikiva gha kughola lihengu lya kutangasa Habali Maha.

19 Hata nagha nenga namhusutu ng'ogha wa mundu yoyose, ila nijigholile kuwela mhusutu wa kila mundu, ili niwese kuwayegha watangala nesu kwa Kilisito. 20 Paniwelili nikighola lihengu na Wayahudi niwelili handa Myahudi, ili niwapati Wayahudi kumkwinila Kilisito. Pamonga na nenga mweni ningulongoswa ng'ogha na laghililo lya Sapanga ampeghili Musa, ila niwelili handa niwela nikilongoswa na laghililo, lukani niwapati weni kulongoswa na laghililo lya Sapanga ampeghili Musa. 21 Paniwela nikighola lihengu na wandu wawela ng'ogha na laghililo niwelili nikilama handa weni ili niwatangi wawesi kumkwinila Kilisito. Panilonga nagha ng'ogha yiwa nenga niyitikila ng'ogha laghililo kuulongolo gha Sapanga, chakaka nenga ningulongoswa na laghililo lya Kilisito. 22 Hila hila paniwela nikilama na wandu wagangamala ng'ogha kukummanya Sapanga, nikalikala handa mundu nigangamala ng'ogha kukummanya Sapanga ili niwapati wandu weni kugangamala ng'ogha. Nigholile kila njila kwa wandu wogha ili wawesi kulokolwa amonga gha weni.

23 Ningughola hagha hyogha kwaikiva gha Habali Maha, ili niwese kupokela na waghangi highili zyaki. 24 Ghuli, mmanya ng'ogha yiwa wala wenikutula mbilu wangutula wogha ila mwenikulongoha ndiwa mwenikupokela hupo? Mtuwi mbilu handa nagha ili mpati hupo. 25 Kila mundu mweni kuliugha kumghalu wa kutuwa mbilo anguilemesa mighalu mitangala, na angughola nagha ili apokeli hupo yeni kuyalamika, ila twenga tungughola nagha ili tupokeli hupo yeni kuyalamika ng'ogha. 26 Hata nenga ningutula nesu ili nisindi. Ndiwa ningutovana, ili nikotoho kuwela handa mundu mweni kutovana yaghiyaghi, 27 ila naughola mhigha ghangu ili uwesi kufumilila, ningughola nagha lukani paniyomola kuwatangasila wandu waghangi nikotoho kulemwa.