1 Hinaa kwa habali gha milyo ihumisilwi litambiku kwa ling'omung'omu tungumanya yiwa twenga wogha tuvile na umanyi. Umanyi ungutughola tujidumbi twaweni ila upalo unguwaghola watangala wagangamali kuukwinila. 2 Mundu yoyose yula mweni kuliwachila yiwa angumanya kindu, kwa uchakaka hayu angumanya ng'ogha chochosi handa vila angupalwa kumanya. 3 Ila handa mundu angumpala Sapanga, hinu na Sapanga angummanya mundu hayu.

4 Hinu kwa habali gha milyo yeni kuhumiswa litambiku kwa ling'omung'omu tungumanya yiwa ming'omung'omu ng'ogha kindu kumlima wogha ila tungumanya Sapanga ni mmonga hela. 5 Pamonga na yiwa kuvile na vindu vitangala vivile wandu wanguvikema milungu iweli kumlima wogha au haku kunani, pamonga na yiwa kuvile na milungu na mabambu watangala, 6 ila kwa twenga Sapanga ni mmonga hela avile ni Tati, ndiwa alumbili vyogha, na twenga tungulama kwaikiva gha mweni. Hilahila tuvili na Bambu mmonga hela avile ndiwa Yesu Kilisito kwa kupitila mweni hindu hyogha ilumbilwi na twenga tungulama kwa kupitila mweni.

7 Ila ng'ogha kwa wandu wogha weni kumanya uchakaka hau. Kwaikiva kuwela na wandu watangala weni kuzyowelela kuyupa ming'omung'omu wandu hagha mbaka hinaa pawalyegha milyo hai inguwaghola waliwachili ihumisilwa kwa ming'omung'omu hinu wanguilola wangughola sambi kwaikiva wakamala ng'ogha kuukwinila. 8 Mulyo uwesa ng'ogha kutuvika pabehi na Sapanga, hinu patuleka kulyegha tupungulwa ng'ogha chochosi na patulyegha kiyongeseka ng'ogha chochosi.

9 Ila muweli mihu na hau upekesu wa kulyegha mulyo wowosi, upekesu hau ukotoho kuwaghola wala weni kukamala ng'ogha kuukwinila wayingili kukughola sambi. 10 Kwaikiva mundu mweni kukamala ng'ogha kuukwinila pakakulola wenga mweni kumanya ungulyeghga kumighuta gha hai gha kuyupila ming'omung'omu, ghuli watekweghwa ng'ogha na weni kulyegha milyo ihumisilwi litambiku kwa ming'omung'omu? 11 Kwa njila hai, hayu mlongu mweni kukwinila kusokombi, ateyalamika kwaikiva gha umanyi ghako mlongo mwenikuwela Kilisito ahovili kwaikiva gha mweni. 12 Handa pamkaghola walongo wa mwenga wakoseli kwa njila hai na kuhakila mioyu ghao mtewela mumkosela Kilisito. 13 Kwa nagha, paitewela kila nitelyegha kitemyambusa mlongu mweni kukwinila agholi sambi, nitelyegha ng'ogha katu, kwaikiva panitelyegha nitemghola myangu mweni kukwinila ayingili kusambi.