1 Pamonga na hyogha, walongu wa nenga ningupala mngumbuki yiwa watati wa twenga wogha wala walongosilwi na Musa wawelili pahi gha lihindu wakigholokelwa, na wogha wahubhukili maha kubahali gha Shamu. 2 Pawalongosilwi na lihindu na kuphiti paghati gha bahali, wogha wakawela wabatiswa kuwela watumikila wa Musa. 3 Wogha walyeghili mulyo hula hula weni kuhuma kwa Sapanga. 4 Hilahila wogha wakanywegha kinywegha kimonga kya kimpumulo kihumile kwa Sapanga, kwaikiva wanyweghili masi yahumili kumghomba, na mghomba hula awelili ni Kilisito mweni. 5 Ila wandu watangala kulipinga lyau wamhekelesili ng'ogha Sapanga, hinu wakahova na mihigha ghao ikalandala kuluvagha.

6 Hinu mighalu hai hyogha ni mlandano kwa twenga ili kutukanisa twenga tukotoho kuwela wandu weni kuwela na lumatamata lwa kughola mighalu mihakata handa weni vila wagholile. 7 Mkotoho kuyupila mang'omung'omu, handa wamonga ghao vila wawela, handa yailonga mayandiko, "Wandu watamili pahi wakalyegha na kunywegha, hinu wakayimuka na kuhina kwa honi." 8 Hinu twenga tukotoho kughola ngongola handa waghangi vila waigholile, kwaikiva kwa lichuwa hali limonga mbaka wakahova wandu ielufu ihisilini na itatu. 9 Hinu tukotoho kumyesa Bambu, handa wamonga ghao vila wamyesili, wakahova kwa kulumwa na wanjoka. 10 Mukotoho kung'ung'ulika handa wamonga ghao wagholili, wakomilwi na mtumikila wa kundumba wa Sapanga mkoma wandu.

11 Mighalu hai hyogha iwakolile weni ili twenga tuivuli, hagha yayandikwa ili kutuvula twenga tweni kulikala kumachuwa gha kumwihu.

12 Kwa nagha mundu mweni kuliwachila yiwa kagholoka maha kuukwinila hinu alihungi ili akotoho kuguwa. 13 Mayeso hagha mnguyapokela ni ghala ghala yeni kuwakola wandu waghangi. Sapanga kamchakaka, na mweni atewaleka ng'ogha myeswi kupiti uwesa wa mwenga. Ila pamyeswa mweni atewapegha makakala gha kufumilila na njila gha kuhukila.

14 Kwa nagha walongo ghangu wapalwa, muleki kuyupa mang'omung'omu. 15 Ningulonga na mwenga wandu weni malangu, mliwachili hagha ninguwalongela. 16 Kila kikombi kya highili kila tungukihighila, tungukongine na mwahi gha Kilisito. Patulyegha libumunda tungukongana na mhigha gha Kilisito. 17 Kwaikiva libumunda ni limonga, Pamonga na yiwa twenga twa watangala, twa higha immonga, kwaikiva wogha tungupeghana libumunda hali limonga.

18 Hinaa mloli kila wangughola wandu wa mlima wa Kuizilaeli, wenikulyegha litambiku kuluhanja, wangukongana kukumpegha litambiku Sapanga. 19 Hinu nilongi kyani? Yiwa mulyo wenikutambikilwa ling'omung'omu ni kindu kupiti mulyo? Na hagha mang'omung'omu, ghuli, ni kindu chakaka kupiti ming'omung'omu? 20 Ng'ogha, ila kila ningupala kulonga ni yiwa, mitambiku gha wandu wenikummanya ng'ogha Sapanga wanguwapegha mahoka na ng'ogha kwa Sapanga. Nenga nipala ng'ogha mwenga mgholi pamonga na mahoka. 21 Mngupalwa ng'ogha kunyweghela kikombi kya Bambu kunu mngunyweghela kikombi kya mahoka. Mngupalwa ng'ogha kulyegha mulyo gha Bambu na kunu mungulyegha mulyo gha mahoka. 22 Ghuli, tungupala kumghola Bambu aweli na lilaka? Ghuli, twenga tuwela na makakala kupiti mweni?

23 Wandu waghangi paghati gha mwenga wangulonga vindu vyogha vilekeselwa ila ng'ogha vyogha vingutanga ila nenga ningulonga pamonga na yiwa vindu vyogha vilekeselwa ng'ogha vyogha vyeni kuwesa kuwatanga. 24 Mundu yoyose akotoho kulihakulila fwaida mwenibaha, ila awahakulile fwaida na waghangi.

25 Mlyeghi chochose kinguhuswa kusoku, mkotoho kukonya lilando lolose kwaikiva gha lukani lwa mioyu gha mwenga. 26 Kwaikiva Mayandiko gha Sapanga yangulonga, "Mlima wogha na vyogha vivile mghati ni hindu gha Bambu."

27 Handa ukiyeghelwa mulyo na mundu mweni kumkwinila ng'ogha Kilisito na wenga ukiyitikila kuyenda kulyegha, ukalyeghi chochosi akukemilili ukileka kukonya kwaikiva gha lukani lwa moyu ghako. 28 Ila handa mundu yoyose akikulongela, "Mulyo hau ugholelwa litambiku lya mang'omung'omu," hinu ukotoho kulyegha ili mundu yula mweni kuwalongela akotoho kughasika mumoyu na mwenga hilahila mkotoho kughasika. 29 Ningulonga hagha, kwaikiva gha maghaso gha kumawachilo, na ng'ogha maghaso kwa mwenga ila yula mweni kuwalongela,

Pangi mtenikonya, "Kwa kyani mawachilo gha mundu mghangi yalamuli nenga kya kughola, nenga napekesu kughola kila ningukipala." 30 Ningumshukwile Sapanga pambila gha kulyegha mulyo ghangu, handa ningughola nagha kwa hela mundu yeyosi kanguwesa kulonga ni maha ng'ogha nenga kulyegha hau.

31 Hinu, lolose mgholile, handa ni kulyegha au kunywegha, mgholi hyogha kwa kumyinula Sapanga. 32 Mukotoho kughola mghalo wowosi utewaghola wandu waghangi kughola mahakata, kwa Wayahudi au Wayahudi ng'ogha au kwa lipinga lya wandu wamkwinila Sapanga, 33 muweli handa nenga, ningupala kuwahekelesa wandu wogha kumighalu hyogha ninguighola. Kwaikiva ninguhakula ng'ogha fwaida kwaikiva gha nenga mwenibaha ila ninguwahakulila wandu fwaida ili walokolwi.