1 Paikawela na mundu yoyosi paghati mwa mwenga kana magombi na mkwinila myaki, kwa kyani amyeghi myaki kwa njengakaya gha wandu wakwinila ng'ogha? badili gha kumyegha kwa wandu weni kumkwinila Sapanga? 2 Ghuli mmanya ng'ogha yiwa wandu weni kumkwinila Sapanga watewalamula wandu wamlima wogha hau? Hinaa handa mwenga wenikumkwinila Sapanga mtelamula wandu wamlima wogha hau hinu kwa kyani mngusindwa kulamula mighalu misokombi sokombi? 3 Ghuli mmanya ng'ogha yiwa mtewalamula watumikila wa kundumba wa Sapanga? Handa ni nagha hinu mngupalwa kuyomola mighalu misokombi misokombi gha kila lelo. 4 Pamuwela na mkologhanyu kungalilu gha kila lelo kwa kyani muwakemi wandu wenikuwela na ngalilu twenga tuijumila ng'ogha kulipinga lya tumkwinila Kilisito wagholi ndulumu? 5 Ningulonga nagha ili mloli honi. Ghuli kwahela hata mundu mmonga mweni luhala paghati gha mwenga mwenikuwesa kuwagholela ndulumu gha mighalu misokombi sokombi paghati gha mwenga weni kumkwinila Kilisito? 6 Badili ghaki mzyowela yula mweni kukwinila Kilisito kumyegha mkwinila myaki kuulongolo gha njengakaya na kuwaleka wandu weni kumkwinila ng'ogha Kilisito wamlamuli.

7 Kichakaka kwa kitendu haki inguwonesa yiwa kwahela mundu mweni uweso wa kughola ndulumu. Ghuli kwakyani ingawela ng'ogha maha mwenga kugholelwa mahakata? Ghuli ingaliwela maha ng'ogha mwenga kupokolwa hindu? 8 Badili ghaki, mwenga ndiwa mngughola mahakata na kupokola, na kangi mnguwagholela hagha hata wakwinila wayenu. 9 Ghuli mngumanya ng'ogha yiwa hagha wahakata wateyingila ng'ogha kuunkosi wa Sapanga? Mkotoho kuingonga weni ng'ogha wangongola hata weni kuyupa ming'omung'omu na wala weni kuwonjana walumi kwa walumi au wadala kwa wadala, 10 hata waihi na hata weni lumatamata lihakata na hata walowela na hata walongelela wandu mahakata na hata wapokola na wandu hagha wogha wateyingila ng'ogha ku Unkosi wa Sapanga. 11 Wamonga wa mwenga muwelili nagha, ila hinaa mlekeselwa mahakata, mkagholwa wandu wa Sapanga, na kugholwa wamaha kuulongolo ghaki na kukonganiswa na Sapanga kwa kupitila Bambu Yesu Kilisito na kwa Mpumulo wa Sapanga wa twenga.

12 Mundu anguwesa kulonga nagha, "Nenga nilekeselwa kughola kindu chochosi." Ila ng'ogha kila kindu kyeni umaha. Ningujumila yiwa ninguwesa kughola kila kindu ila nitelekesela ng'ogha kindu chochosi kinilongosi. 13 Unguwesa kulonga, "Mulyo ni kwaikiva gha mtima na mtima ni kwaikiva gha mulyo." Mhigha wa mundu ulumbwa ng'ogha kwaikiva gha ngongola ila kwa kumtumikila Bambu, na hayu Bambu ndiwa mweni kugholokela mihigha. 14 Kwa makakala ghaki Sapanga amuhindulile Bambu na kangi atetuhindula na twenga kwa makakala ghaki.

15 Ghuli mmanya ng'ogha yiwa mihigha gha mwenga ni vikongonu vya Kilisito? Ghuli nitoli vikongonu vya Kilisito nivikonganisi na mhigha wa mngongola? Ng'ogha nagha. 16 Ghuli ingumaanisa ng'ogha yiwa mundu mweni kukongana na mngongola hayu kamhigha mmonga na mundu hayu? Kwaikiva Mayandiko gha Sapanga yangulonga, "Hagha waivili watewela mhigha mmonga." 17 Ila yula mweni kukongana na Bambu anguwela na mpumulo mmonga na Bambu.

18 Hinu mlikali kutali na ngongola. Kwaikiva mundu pakaghola sambi angughola panji gha mhigha ghaki ila mundu pakaghola ngongola anguugholela sambi mhigha ghaki mweni. 19 Ghuli mmanya ng'ogha yiwa mihigha gha mwenga ni Lighuta lya Mpumulo wa Sapanga, mweni kuwela mghati mwa mwenga, yula mpeghilwi na Sapanga? Kwa nagha mwenga ng'ogha hindu gha mwenga baha ila mwenga ni hindu gha Sapanga, 20 kwaikiva mwenga muhemelilwi kwa mapesa ngenju. Kwa nagha mumyinuli Sapanga kupitila mihigha gha mwenga.